Mumpar 15 - mzwDBL

Korowii ne Abram fɔo fɔwa

¹ Waa la habɔɔ la, Korowii pili waane bini baɡle Abram dɛ ŋɔ, “Abram, bɛ ɔmɛ. Mɛɛ tɔe ɡbemɡbee dɛ́ tɛɛ kembɔr kohona.”

² Anee Abram ŋɔ, “Nemenɛ Korowii, bɔkwa konee hɛɛ ba kpɔe tɛ mɛ ó ɡwaa kɛŋɔ maa wola bie lolɛ bwa nɔɔ? N bonɔɔ Eliesa waa le Damaskɔs laanee dɛɛ ba n kapɛrɛ dii.

³ He nao kɛŋɔ he ta men bie tɛɛ anomanta, n bonɔɔna la bini bɛlee dɛ́ di n kapɛrɛ.”

⁴ Belaa o berɛ no kɛŋɔ Korowii aa bol waa o be ja ŋɔ, “N dɛ ŋɔ he be ŋɔ a ɡɛ bonɔɔ nɔ laa dɛ́ di he kapɛrɛ, he ɡbaɡba biee dɛ́ di.”

⁵ O nao kɛŋɔ Korowii aa lawɔ le buse dɛ ka ŋɔ, “Ha sie nyiŋi nyundua, dɛ́ na ɡɛ weweela aa wara, hɛɛ won kura aa? Gɛɛ mɛɛ ba ɡela he naanar warɛ.”

⁶ Belaa o yarada Korowii, asɛ Korowii che o yarada ta dɛ lɛo kɛ nɛndɛɛɡe o waa su o siwi.

⁷ O ŋɔ o be ja ŋɔ, “Menee Korowii, menee kpɔe le Ur waa lɔ Babelɔn harɛ ta, dɛ ba kpɔ harɛ nɔ tɛɛ o ɛ he ɡbabir kon saŋ bɛlbwa dɛɛ la.”

⁸ Belaa Abram bɔɔro ŋɔ, “Nemenɛ Korowii, ɛrɛɛ aa ba ɛɛ ń jemɛ kɛŋɔ n konee yɔ?”

⁹ Anee Korowii chaŋo ŋɔ, “Lawɛ nao ne booh dɛ pebal, a bini bɛlbwa waa di bene atoro, ne borɔnoma ne kulukuku bie ba tɛ mɛ.”

¹⁰ Asɛ o lawɛ a ɡɛ kwaa waa baɡla la ba tɛo, dɛ pere a bɛlbwa bini anɛ, dɛ bila asɛ a peɡra la sie chaɡɛ dɔŋa. Kɛ jumbii la te, o ta a bini peɡre.

¹¹ Belaa kokosakire tu ba harɛ ŋɔ á ba di ola la, asɛ Abram doŋa.

¹² Aa baa ka tama asɛ wee le harɛ la, Abram chɔ dom ka ɡarɛ. O dom chɔe bini la, bɔr biro kpirkpir ken ta o nɛ, asɛ ɔmee lawɔ kohona.

¹³ Belaa Korowii ŋɔ o be ŋɔ, “Jemɛ kɛŋɔ he naanar ɛɛ ka ɛ hɔɔhra nɛra bane harɛ taa, dɛ́ ɛ yoma, ásɛ ba ɛɛ ba hɔhɔrɔwa bene lafraanaarɛ.

¹⁴ Kɛ mɛɛ tɛr a ɡɛ harɛ la tena deŋnee. Ba ne bela lee dɛ ba la, kondɔɔh tenten nee baa ba bela lee ba.

¹⁵ Kɛ he te la, he nyumpona ɛɛ too kpelkpel ken mɔɔ he sewɛ bambisɔɔhna ne bá huɡe.

¹⁶ He naanar bele banaarɛ ɛɛ ba kaaloo mɔɔ, he naanar berɛ ba harɛ nɔ ta, dɛkalkɛŋɔ Amɔre tena wechɔɡa baa dɛ ɛ la ta tele kɛ bá dɔ deŋnetɛra mɔɔ.”

¹⁷ Wee aa joa asɛ bɔr bir la, kapɛla waa dɛ lawɛ nii ne vii bɛl soo siwi nii aa lɔ o ta wɛɛ le chuu deno ba kpɔ ola la baah.

¹⁸ Awolaa Korowii ne Abram fɔwɛ fɔo. Asɛ Korowii ŋɔ o be ŋɔ, “He naanaree n kpɔ a ɡɛ harɛ nɔ dɛɛ tɛ. O le Ijipt harɛ jwɛh ta dɛ ba Yufretis Moo ta.

¹⁹ Ken ne Kenis dɛ Kadmɔn tena harɛre bwa jao,

²⁰ dɛ kpoŋe ka le Hiti ne Pɛrɛs dɛ Refa tena,

²¹ ne Amɔre ne Keenan ne Girɡasi dɛ Jebus tena harɛre ta bwa.”