Mumpar 12 - mzwDBL

Korowii yera waa yerɛ Abram

¹ Awola bɛl, Korowii ŋɔ Abram be ŋɔ, “Ir, dɛ́ le harɛ haa soɡe o ta la ta, ásɛ dɛ bɛ he nɛra dawɛ, bɛ he mɛɛ buse nɛra ɡe dawɛ, dɛ́ kaa harɛ maa dɛ ba he baɡla nɔ ta.

² Mɛɛ ɡeloo he mun ya, dɛ́ warɛ su harɛ ta bwa, ásɛ dɛ tɛɛ hɛɛra. Mɛɛ ɡeloo he sɔn le ásɛ a che he nɛɛ nɛwɛnyina dɔ andɛɛɡa.

³ Mɛɛ cha nɛra la baa soŋe andɛɛɡa dɛɛ tɛɛ la. Nomɛlbwa waa taahnee la, ɡɛɛ mɛɛ ba o ɡe taahna, ásɛ a che he nɛ nɛwɛnyini bwa dɔ andɛɛɡa.”

⁴ Anomanta, Abram iro dɛ kaa ɡɛ Korowii aa ŋɔ o be la. O lawɛ Lɔt ja o nɛ ba bwa kaa. Waa le Haran ɡɛ saŋ dɛɛ kaa la, dɛ o di bene fifraanuanɛ dɛ anue.

⁵ O kpɔ o haah Sarai ne o nime Haran bie Lɔt, ne ba bwara laala bwa ne nɛndɔɔla baa dɔɔ ba Haran bela la, asɛ dɛɛ kaa Keenan harɛ ta.

⁶ Baa tel Keenan la, Abram ɡaaɡe harɛ la ta dɛ ka tel dajen bɛl mun More, o lɔ bwɛjen Sɛkem, dɛɛ nyin wɛɛ tomɛ Korowii bela. A ɡɛ saŋ baa tel bela la, dɛ Keenan tena soɡe harɛ la ta.

⁷ Belaa Korowii ba Abram be dɛ ba ŋɔ, “Harɛ nɔɔ mɛɛ ba kpɔe tɛ he naanar.” Anomanta, Abram pa bwea dawɛ dɔŋa nɛ bobɛl, dɛ kwaa saraha kon dɛ kpoo kwaa dɛɛ tɛ Korowii bela, kpɔe Korowii aa kpɔ o te baɡlo la wa.

⁸ Waa le bela la, o kpɔ sie chaɡɛ Bɛtel wee leebɔr. Bela ɛ deŋɡarere harɛ. O kwaa bobɛl dɛ baŋre o tɛnte dea Bɛtel ne Ai baah ta, asɛ Bɛtel do wee cholibɔr, Ai ɡe do wee leebɔr. Belaa o ɛ kon baa kpo kwaa dɛɛ ɛ saraha o ta tɛ Korowii.

⁹ Asɛ Abram berɛ le bela dɛ ir ka so bofale harɛ la tenten ta. Gɛɛ o so dɛɛ ir dɛ kpɔ sie chaɡɛ Nɛɡɛv pua hɛŋle ɡbo harɛ weekaŋle harɛbɔr.

Abram Ijipt harɛ ta ka soɡa wa

¹⁰ A kaa ba kɛ lɔrchɔɡe bɛl o nyoa aa kpeɡa chole Keenan harɛ la ta. Asɛ o ir bela dɛ kaa Ijipt harɛ ta ka so.

¹¹ Baa dɛ kaa a ka tama ba tel Ijipt la, o ŋɔ o haah Sarai be ŋɔ “Gɛ haa wera tolo nɔ,

¹² dɛ ya jo bwɛɛ nɔ ta ba na n ne hen, dɛ jemɛ kɛŋɔ he jaaree men naa, baa kpo mɛɛ dɛ́ ɡele.

¹³ Anomanta, ba pɛɛre ɡɛ naa, he ŋɔ ba be ŋɔ he dɔɔree men, ásɛ ba ɡel mɛ dɛ́ nyiŋ mɛ kɛrɛdɛ.”

¹⁴ Abram aa jo Ijipt harɛ ta la, ba na o haah la kɛ o wer kpela.

¹⁵ A ɡɛ saŋ la, Ijipt kooro nomonome nao kɛŋɔ haah la wer tolo, anomanta, ba kaa taa kooro la be asɛ o ɡel ba ka lawɔ ba o dem.

¹⁶ Kooro la koh o waa dɛ nyiŋi Abram kɛrɛdɛ, asɛ dɛ lawɛ boohna ne peera ne nae ne nyoɡmare ne yoma dɛ keeɡore tɛo.

¹⁷ Kɛ Korowii koh Sarai waa dɛ ɡel weechɔɡa ane ba le kooro la ne o dem tena bwa nɛ.

¹⁸ Belaa kooro la aa na ɡɛ la, o tomɛ ba ka yerɛ Abram ba, asɛ o pɛɛro ŋɔ, “Bɔkwa waa he ɛɛ mɛ kenɔ? Ɛrɛɛ he ta n be ŋɔe ŋɔ he haahnee yɔ?

¹⁹ Ɛrɛɛ he ŋɔ he nimambiee dɛ ɡel n kpɔɔ ɛ n haah nɔɔ? He haahnee la. Ba lawɔ, ásɛ dɛ kpɔɔ le kaa.”

²⁰ Kooro la ŋɔ o bonɔɔna be asɛ ba lawɔ le o harɛ la ta. O ne haah la ne komɛlbwa waa dɔa bwa.