Amanesoma Mak Aa Chwera Tɔn 8 - mzwDBL

Yeesu tɛ nɛra kaɡboŋa banaarɛ kondikwaa ba di

¹ A ta biɡre bɛlbwa nɛnlaa bane ba cheme Yeesu sie ja, kɛ dɛ ba ta komɛlbwa dɔe dɛ́ di. Anee Yeesu yerɛ o habɔteŋra la ba o sie dɛ ŋɔ ba be ŋɔ,

² “Nɛra nɔ waa dɛ domɛ n tea, dɛkalkɛ n ne baa soɡa tɔpera atoroo nɔ, taraken ba ta komɛlbwa dɔe dɛ́ di.

³ Dɛ n ɡel ba ɡɛ ba kpɔ lɔr kaa laa, baa ɡwɛɡre ŋwɛnɛ taa. Bane ɡe le bojaŋa.”

⁴ Belaa o habɔteŋra la chaŋo ŋɔ, “Ɛrɛɛ yaa ba ɛɛ dɛ́ dɔ paanoo tɛ ɡɛ nɛra nɔ dɔŋ bá di kpɔɡ nɔ baah nɔ?”

⁵ Yeesu bɔɔ ba ŋɔ, “Paanoo aŋwɛnɛɛ he dɔɔ?” Anee ba ŋɔ, “Anuanɛ.”

⁶ Belaa o ŋɔ nɛnlaa la be ŋɔ bá so harɛ, asɛ o kpɔ paanoo anuanɛ la dɛ jam Korowii dɛ mɔne do o habɔteŋra la nɔɔra ta dɛ ŋɔ bá bɔne tɛ nɛnlaa la, ba ɡe bɔne tɛɛ ba.

⁷ Dɛ ba dɔ pɛŋa tama ɡe, asɛ o kpɔa jam Korowii dɛ ŋɔ bá bɔne a ɡe tɛɛ ba. Ba bɔnɔ tɛɛ ba,

⁸ asɛ ba di dɛ vaɡre. Anɔ la aa kaa la, ba paa a su wɛɡrɛjena anuanɛ.

⁹ Nɛra baa di kwaa la ɛɛ ɛ nɛra kaɡboŋa banaarɛɛ.

¹⁰ Yeesu ɡelɔ ba peɡre. O ne o habɔteŋra la jo ɡbera la bini dɛ chaɡɛ Dalmanuta pera dɛ kaa.

¹¹ Belaa Farisii tena bane ba Yeesu be dɛ ba tɔŋlo dɛ daahno na dɛɛ nyin o ɛ nyokpowaane bá na dɛ́ jemɛ o waa kɛŋɔ o le Korowii be kpela.

¹² Yeesu hweero fuuu dɛ ŋɔ, “Ɛrɛɛ fini nɔ nɛra ɛɛ nyin nyokpowaa dɛ́ na nɔɔ? Kasinteŋ, maa wobɛlbwaa ɛ fini nɔ nɛra na.”

¹³ Asɛ dɛ ɡel Farisii tena la bela dɛ berɛ jo ɡbera bini kaa baŋ bɛl.

Farisii ne Hɛrɔd tena webaɡla aa do kɛ iisi

¹⁴ Yeesu habɔteŋra la soɔh, ba ta kondikwaa kpɔe, dɛ ba ɡe ta komɛlbwa dɔe ba be ɡbera la bini nemenɛ paanoo beŋkpoŋ.

¹⁵ Yeesu ŋɔ ba be ŋɔ, “Hé nyiŋi he te kɛrɛdɛ Farisii tena ne Hɛrɔd iisi wa.”

¹⁶ Ba ta o sɛɡla la mun noɛ, dɛ bol dɔŋa be ŋɔ paanoo baa wola dɔe waa o ken ɛɛ bol.

¹⁷ Belaa Yeesu aa no waa baa dɛ bol la, o pɛɛ ba ŋɔ, “Ɛrɛ waa hɛɛ pɛɛ dɔŋa paanoo bɛ dɔe waa nɔɔ? Saŋ la bwa haa waa mun no mɔɔ naa? Ɛrɛɛ he liire do toŋɡboŋ ken?

¹⁸ He dɔ sibie kɛ haa na naa? He dɔ deŋna ɡe kɛ haa waa no aa? Haa waa lii kɛɛ?

¹⁹ Maa mɔne paanoo anue tɛ nɛra kaɡboŋa banue ba di ka la, a kabora haa paa la, wɛɡrɛre aŋwɛnɛɛ he dɔɔ?” Anee ba ŋɔ, “Fi dɛ anɛ.”

²⁰ O berɛ bɔɔ ba ŋɔ, “Asɛ maa mɔne paanoo anuanɛ tɛ nɛra kaɡboŋa banaarɛ la, wɛɡrɛ dela aŋwɛnɛ ɡee he dɔɔ?” Ba ŋɔ, “Anuanɛ.”

²¹ O ŋɔ, “He ta a mun noɛ ja aa?”

Yeesu chah nyoŋe bɛl Bɛtsaeda

²² Yeesu ne o habɔteŋra la Bɛtsaeda. Asɛ nɛra bane kpɔ baa bɛl waa nyoŋa ba o be, dɛ ba soŋo ŋɔ ó kpɔ nɔn leɡe nyoŋe la ó sie pili.

²³ Belaa Yeesu lawɛ nyoŋe la nɔn dɛ kpɔɔ le bwɛɛ la dahara dɛ ka ta nentane do o sie ta, dɛ kpɔ nɔɔra dawɛ o nɛ, dɛ bɔɔro ŋɔ, “He dɛ na bɔr aa?”

²⁴ Nyoŋe la laa sie ir dɛ ŋɔ, “N na nɛra baa valɛ, kɛ n dɛ na ba kɛ daa ken.”

²⁵ Yeesu berɔ kpɔ nɔɔra dawɛ o sie ta ja, o nyiŋi bɔr jeiih ken, dɛ a maɡrɔ, name te wɛɛ na bɔr ɡereŋ.

²⁶ Asɛ Yeesu kaoh ŋɔ ó kaa o dem dɛ bɛ a waa bol tɛ nomɛlbwa bwɛɛ bini.

Pita baɡle Yeesu nɛnsoo

²⁷ Belaa Yeesu ne o habɔteŋra la la bwɛɛre aa lɔ Sisaaria Felepae lɔɡa. Baa dɛ kaa la, o bɔɔ ba ŋɔ, “Nɛn besoo nɛra ɛɛ lii mɛ nɔ?”

²⁸ Anee ba ŋɔ o be ŋɔ, “Nɛra bane ŋɔ Jɔn o fa aa dɛ sɔ nɛra Korowii nee laanee hen. Bane ŋɔ Korowii keame Elaejaa hen. Asɛ bane ɡe ŋɔ Korowii keamere la bɛlee hen.”

²⁹ O berɔ bɔɔ ba ŋɔ, “Nɛn besoo he ɡe ɛɛ lii mɛ nɔ?” Anee Pita ŋɔ, “Kristo la Korowii aa baɡɛ nyoa ŋɔ wɛɛ tomɔɔ ásɛ o ba lɛ yaa laanee hen.”

³⁰ Yeesu kah ba ŋɔ ba bɛ o waa bol baɡle nomɛlbwa.

Gɛ Yeesu aa bol o wahala nae ne o seo wa

³¹ Belaa Yeesu pa mun dɛɛ baɡle o habɔteŋra la kɛ a chɛ kɛ o Nɛn Bie la na wahala kohona waa bwa ta, ásɛ nomonome ne Sɔfonomonome ne Tɔnjerema vɛoh, ásɛ ba kpoo, ásɛ a tɔpetooro wee la, ó ir seo ta.

³² O bol ɡɛ waa nɔ ba be kaih ken. Anee Pita lawɔ le bokɛre dɛ kaoh ŋɔ o bɛ ɡɛ bol.

³³ Belaa Yeesu ha sie dɛ nyiŋi o habɔteŋra la dɛ kah Pita dɛ ŋɔ, “Le n jwɛh, Bɔnsam! Haa anla Korowii aa dɛ nyin la lii nemenɛ nɛra tetoowa.”

³⁴ Belaa o yerɛ nɛnlaa ne o habɔteŋra la dɛ ŋɔ ba be ŋɔ, “Dɛ nomɛlbwa dɛ nyin kɛ ó teŋɛ n nɛ aa, ó ɡel o tetookwaa nyina, dɛ́ kpɔ o te kɛ wɛɛ sɛh wahala nae ne seo bwaa, dɛ́ ba teŋɛ n nɛɛ kɛŋɔ nɛn waa kpɔ daɡaɡre che bá ka kpaaro pɛl o ta la,

³⁵ dɛkalkɛŋɔ nomɛlbwa o sie aa swɛɛ harɛ nɔ ta silɛɛ kwaa ta la, wɛɛ paŋɛ o nyuu. Ásɛ nomɛlbwa ɡe waa koh n ne Korowii Amanesoma nɔ waa dɛ kpɔ o nyu ta la, wɛɛ dɔ o nyuu.

³⁶ Dɛ nɛn dɔ harɛ nɔ ta kwaa bwa dɛ nyoɡre o nyu aa, bɔkwa tɔnɔɔ wɛɛ ba dɔe yɔ?

³⁷ Bɔkwaa nɛwɛnyini ɛɛ ba wona kpɔ dɛ́ charɛ o nyu ɔ?

³⁸ Wechɔɡ-ɛɛra ɡbo baa wola Korowii ɔmɛ nɔ, baa ba nyuu dɔ n bala tɔpere. Naate sihiih aa dɛ kpoe n ne waa nɔ taraken nɔ la, awola Men Nɛn Bie ne nyundua toromedɛɛɡa la aa ba n Mɛɛ jirima ne la, maa he heehra ba awola tɔpere.”