Amanesoma Mak Aa Chwera Tɔn 7 - mzwDBL

Nabaala webaɡla

¹ Farisii tena la ne Tɔnjerema la bini bane baa le Jerusalam la pɛ nyoa dɛ ba cheme Yeesu sie.

² Farisii tena la ne ba dɔŋa Juu tena la bwa ta ba nɔɔra samɛ ŋwɛnɛ saŋ la tena la aa baɡla la ta naa, baa kwaa di, dɛkalkɛŋɔ ba kii.

³ Dɛ ba le yawa ta ba naa, ba dɔ yaɡla bɛl baa dɛ yaɡle kondikwaa baa kpɔa le yawa ta ba la, dɛɛ loo ba numoli ne polviine ne loɡa ɡɛ saŋ la tena aa baɡla la mɔɔ dɛɛ di kwa.

⁴ Farisii tena la ne Tɔnjerema la aa cheme Yeesu sie la, ba nao kɛ o habɔteŋra la bane chɔɡ ba kii la. Ba ta nɔɔra samɛ ɡɛ, dɛ kpɔ nɔndoŋa dɛɛ di kwa.

⁵ Ba bɔɔ Yeesu ŋɔ, “Ɛrɛ waa he habɔteŋra nɔ ɛɛ jo ya kii nɛɛ baa wola sarama ya naawa aa baɡle yaa ŋɔ yá sarame ya nɔɔra mɔɔ dɛɛ di kwaa nɔɔ?”

⁶ Anee Yeesu ŋɔ ba be ŋɔ, “He nɛra haa nyiŋi nɛra sie mɔɔ dɛɛ ɛ wa! Korowii keame Aesaya na he waa bol kɛrɛdɛ kɛ waa ŋɔa ŋɔ, ‘Nɛra nɔ te, nyoa ɡbo nee baa duu mɛ, kɛ ba tea bini te ta toe.

⁷ Nɛwɛnyini mmarare taa baa baɡle ŋɔ nɛ́ra teŋɛ, anomanta, pɛɛpɛɛ baa tom mɛ.’

⁸ Korowii waa he ɡel, dɛ berɛ lawɛ he saŋ la waa bini.”

⁹ Yeesu berɔ ŋɔ ba be ja ŋɔ, “Hé na ɡɛ haa vɛh Korowii waa la bil dɛ lawɛ he saŋ la waa bini!

¹⁰ Mosis Mmara la bini o ŋɔ, ‘Duu he nya ne he mɛɛ,’ dɛ, ‘Nomɛlbwa waa bol o nya ne o mɛɛ bwara wechɔɡe la, a chɛ kɛ ba kpoo.’

¹¹ Kɛ he te dɛ baɡle he saŋ la waane kɛŋɔ dɛ nɛn dɔ komɛl dɛ́ won kpɔ cha o nya ne o mɛɛ, dɛ ŋɔ ‘n ɛo Kɔɔban’ aa, Kɔɔban munii kɛŋɔ Korowii konee,

¹² amɔ haa sɛh ó kpɔ kon la cha o nya ne o mɛɛ kpa.

¹³ Hé kpɔ he saŋ la waa la haa dɛ baɡle la dɛɛ tɔ Korowii waa la ŋwɛnɛ. Waa haa dɛ ɛa ken warɔ.”

¹⁴ Yeesu yerɛ nɛra la ba o be ja dɛ ŋɔ, “Hé bwa no n be dɛ́ jemɛ kɛŋɔ

¹⁵ kwaa nɛn aa dɛ di la laa ɡela o ɛ nɛnchɔɡe, anɔ la aa dɛ le o nyoa wɛɛ bol la, anee ɡela o ɛ nɛnchɔɡe.

¹⁶ Nomɛlbwa waa dɔ deŋna dɛ no la, ó no.”

¹⁷ Yeesu ɡel nɛnlaa la bela dɛ ba dem, anee o habɔteŋra la bɔɔro sɛɡla la mun.

¹⁸ O ŋɔ ba be ŋɔ, “He ɡe aa a mun jemaa? Haa jemɛ kɛ kwaa haa dɛ di aa won ɡel he ɛ nɛnchɔɡe aa?

¹⁹ Aa he bambile bini kaa. He teene binii aa kaa, ásɛ dɛɛ berɛ dahara.” Yeesu aa bol waa nɔ la, o baɡlɔ kɛ kondikwaa bɛlbwa wer. Aa won ɡel nɛn ɛ nɛnchɔɡe.

²⁰ Dɛ ŋɔ, “Waa aa le nɛn bambile bini la, anee ɡela o ɛ nɛnchɔɡe.

²¹ Liichɔɡa ne jwamane, ne ŋwɛɛ ne nɛŋkpoa,

²² ne dɔŋa haahna nyina ne kwaa ta sibeɡra, ne musu wa ne nɛra faahra, ne pɛlchɔɡa we-ɛɛla ne kayɛɡlɛ, ne dɔŋa ŋwala ne karamani wa dɛ liire bɛ dɔe, bambile binii a le.

²³ Anee ɡela nɛn ɛ nɛnchɔɡe.”

Haah bɛl yarada dɔe wa

²⁴ Yeesu berɔ ir le bela kaa bwɛjen Taaya pera, dɛ ka jo dem bɛl ta, dɛ́ fee so bela tama ásɛ nomɛlbwa bɛ jemɛ, kɛ o ta wone sɔh.

²⁵ Belaa haah bɛl kwaa aa dɛ ir o bihaah nɛɛ no Yeesu waa dɛ ba ɡuŋi o sie,

²⁶ dɛ soŋo ŋɔ ó doŋi kwaa la le o bihaah la nɛɛ tɛo. Haah la ta Juu te ɛɛ, kɛ lola bini te, Siiria harɛ bobɛl baa dɛ yerɛ bela Finiisia tee.

²⁷ Waa wola Juu te ɛɛ la, Yeesu ŋɔ o be ŋɔ, “A chɛ kɛ bechale di kwaa vaɡre mɔɔ nyootena ɡe di. Aa were kɛ ba kpɔ bechale kondikwaa tɛ nyootena.”

²⁸ Haah la wono no a mun dɛ ŋɔ, “Kpelaa he ŋɔ, Nomoa, kɛ nyootena aa bechale kondikompuɡrere aa leera la ɡe di aa?”

²⁹ Yeesu ŋɔ, “Waa nɔ haa bola nɔ nomanta, kaa dem. Kwaa la le he bihaah la nɛ.”

³⁰ O la dem dɛ kwaa la le o bihaah la nɛ, asɛ o chɔ mpa ta.

Yeesu chah amumu bɛl

³¹ Yeesu berɔ le Taaya harɛ dɛ kpɔ Sidon ne Dekapɔles harɛ dɛ kaa Galilia Moo la ta.

³² Nɛra bane kpɔ baa bɛl waa wola waa no, wobol waa do kpeɡri tɛo ba Yeesu be, dɛ soŋo ŋɔ ó kpɔ o nɔn dawɛ o nɛ, ásɛ wɛɛ no wa, dɛ́ won waa bola.

³³ Yeesu kpɔ baa la le nɛra la baah ta, o ne o ɡbo ka che bokɛre, asɛ o kpɔ o nonie do baa la deŋna bini, dɛ berɛ ta nentane dɛ kpɔ leɡe o nyondoŋe,

³⁴ dɛ ha sie nyiŋi nyundua dɛ hwee fuuu, dɛ ŋɔ baa la be ŋɔ, “Efata!” O munii kɛŋɔ, “Pili.”

³⁵ Buɡ la ta la, baa la deŋna pilo, asɛ o nyoa chaa, o won waa bola kɛrɛdɛ.

³⁶ Yeesu aa chah baa la tonɛ la, o kah nɛra la ŋɔ ba bɛ nomɛlbwa be ŋɔ. Waa dɛ kah ba la, ate taa ba ta ɛɛ bol waa la kwara.

³⁷ Belaa nɛra baa noa la nyoa kpo taeh, ba ŋɔ, “O ɛ wobɛlbwa kɛrɛdɛ, hale o ɡelɔ amumure ɛɛ no wa, dɛ won waa bola.”