Amanesoma Mak Aa Chwera Tɔn 5 - mzwDBL

Yeesu chah baa bɛl kwaa aa dɛ ir o nɛ

¹ Yeesu ne o habɔteŋra la tawɔ kaa Galilia Moo la baŋ Gerasa harɛ ta.

² Belaa Yeesu aa le ɡbera la bini la, baa bɛl kwa aa dɛ ir o nɛɛ wɛɛ chɔ lala huɡribɔr den ba chemo.

³ A ɡɛ baa nɔ, ba fa yon lawɔ dɛ doo kpɛɛ, asɛ o yon laa kpɛɛ la kuuɡi. Hale ba dɛ doo jɔɡrɔre, asɛ o yon laa chaa.

⁴ Anomanta, nomɛlbwa aa won on lawɛ dɛɛ doo kpɛɛ ne jɔɡrɔre kpa.

⁵ Asɛ o chwa ka do lala huɡribɔr ne bela bwea ane aa lole. Belaa o do chɔɔ ne jwaana bɛlbwa dɛɛ valɛ bwea la dor dɛɛ dooɡe lɔŋɔre, dɛ kpɔ bwea dɛɛ mɔne o bwara.

⁶ Gɛɛ a do baa nɔ aa na Yeesu bojaŋ kɛ o dɛ ba la, o chwa dɛ ka ɡuŋi Yeesu sie,

⁷ dɛ kpɔ takpeɡ ŋɔ, “Yeesu, Nemenɛ Korowii Bie, bɔkwaa hɛɛ nyin n be nɔ? N kpɔ Korowii dɛɛ soŋe, bɛ men weweele do.”

⁸ Baa la bol ɡɛ waa nɔ, dɛkalkɛŋɔ dɛ Yeesu tɔ sie ŋɔ, “Konchɔɡe, le baa nɔ nɛ!”

⁹ Belaa Yeesu bɔɔro ŋɔ, “He sɔne ɛrɔɔ?” O ŋɔ, “N sɔne Dɔm, dɛkalkɛŋɔ ya warɔ pirim.”

¹⁰ Anee o soŋe Yeesu kohona ŋɔ o bɛ an doŋi le harɛ la ta.

¹¹ Bela la, dɛ parakooni damanta ane lɔ diŋɡoŋ bɛl ta dɛɛ di.

¹² Anee kwaa la aa dɛ ir baa la nɛɛ la soŋe Yeesu ŋɔ ó ɡel a kaa parakooni la nɛ.

¹³ Asɛ Yeesu tɛa ŋwɛnɛ, a le baa la nɛɛ dɛ ka jo parakooni la nɛ. Belaa parakooni damanta dɛ ɛ kaɡboŋa anɛ la bwa chwa biribiribiri dɛ wili diŋɡoŋ bɛl dɛ ka lee moo la ta dɛ serewe kwaraa.

¹⁴ Belaa nɛra baa dɛ nyiŋi parakooni la chwa, dɛ la bwɛɛ la ta ne daamune aa bɛne bela la ta, dɛ ka bol waa aa chiɡa la. Asɛ nɛra la le ba bwɛɛre ta dɛ ka na waa aa chiɡa,

¹⁵ dɛ la bela Yeesu aa lole la, dɛ ka na kɛ baa la konchɔɡa damanta fa aa ir o nɛɛ la, a bwa kaalɔ, o liire ba harɛ, o do laala dɛ so. Baa nao la, ba ɔmɔ.

¹⁶ Nɛra baa lɔ bela dɛ na la bol nɛra be waa aa chiɡ baa la ne parakooni la nɛ.

¹⁷ Belaa ba soŋe Yeesu ŋɔ ó le ba harɛ ta dɛ kaa.

¹⁸ Waa dɛ jo ɡbera bini la, anee baa la soŋo ŋɔ ó ɡel o ne o kaa.

¹⁹ Asɛ Yeesu vɛh dɛ ŋɔ o be ŋɔ, “Kaa dem he nɛra be, dɛ́ ka bol wejena Korowii aa ɛa tɛɛ, ne he sum waa naa la chaɡ ba.”

²⁰ Baa la chiɡ ŋwɛnɛ ta kaa, dɛ ka bol bela bwɛɛre fi ane aa pɛa baa yera Dekapɔles la tena be wejena Yeesu aa ɛa tɛo, asɛ a ɛ ba bwa nyokpoa.

Bitolo bɛl waa sewa ne hanweelate bɛl wa

²¹ Yeesu aa jo ɡbera bini dɛ berɛ kaa moo la baŋ le la, nɛnlaa bane baro cheme, o do nee nyoa.

²² Belaa cheremi dea nomonome la bɛl baa dɛ yerɔ Jaerɔs ba bela dɛ ba na Yeesu, dɛ ɡuŋi o sie dɛ lawɛ o nakpala,

²³ dɛ soŋo ŋɔ, “N poori, nomoa, n bihaah bwara dɛ weo wɛɛ ba sewa. Ba dɛ́ ba kpɔ he nɔɔra dawɛ o nɛɛ ásɛ o bwara do kpeɡri o ir.”

²⁴ Baa la ne Yeesu aa dɛ kaa la, dɛ nɛnlaa bane teŋɛ o nɛ dɛ fiilo do baah ta dɛɛ taɡɔ.

²⁵ Dɛ haah bɛl ɡe lole chal ɛɛ fuɡo bene fi dɛ anɛ,

²⁶ o chah, o komɛlbwa tonɛ, kɛ weela la ɡe ta ɡwaa o nɛ.

²⁷ Waa no Yeesu ɡbɔɡa la, o lii o nyu bini kɛŋɔ dɛ o la bela dɛ ka dɔ bɔr jo nɛnlaa la bini dɛ ka leɡe Yeesu batakaare kwaraa naa, wɛɛ ɡbaŋroo.

²⁸ Dɛ ir dɛ la bela dɛ ka jo ba baah ta, dɛ ka che Yeesu habɔɔ dɛ leɡe o batakaare.

²⁹ Buɡ la ta, chal la aa dɛ fuɡo la teŋe. O na o bwadabii bini kɛ o weela la kaalɔ.

³⁰ Belaa Yeesu na kɛŋɔ kpeɡri ane le o bini. O berɛ habɔɔ nɛnlaa la baah ta dɛ bɔɔ ba ŋɔ, “Umee leɡe n batakaare nɔɔ?”

³¹ Anee o habɔteŋra la ŋɔ, “He ɡbabir nao kɛŋɔ nɛnlaa nɔ aa bare cheme dɛɛ taɡɛ dɔŋa nɔ warɔ, ɡɛɛ he berɛ ŋɔ nomɛl leɡe naa?”

³² Anee Yeesu nyiŋi nɛra la bini kɛŋɔ o ken fe ɛɛ na naatee yaa?

³³ Haah la aa naa ɡɛ Yeesu aa ɛa tɛo la, o kpɔ ɔmee ne bochela dɛ ba ɡuŋi o sie, dɛ bol o weela la bwa waa baɡlo.

³⁴ Yeesu ŋɔ o be ŋɔ, “Tolo, he yarada lɛɛ. Kaa bosɔɔhna ne, ásɛ he bwara do kpeɡri.”

³⁵ Yeesu nyoa ta aa lɔ waa waa dɛ bol la ta la, nɛra bane le cheremi dea nomoa la dem dɛ ba ŋɔ nomoa la be ŋɔ, “He bihaah la sewɔ. Ɛrɛɛ hɛɛ ha nomoa nɔ jaɔ?”

³⁶ Yeesu ta waa baa dɛ bol la ta teŋɛ, dɛ ŋɔ nomoa la be ŋɔ, “Bɛ ɔmɛ, kɛ yarada mɛ.”

³⁷ Yeesu ta ɡelɛ nomɛlbwa teŋɛ o nɛ, nemenɛ Pita ne Jems dɛ Jɔn waa ɛ Jems nime la.

³⁸ Baa tel nomoa la dem la, Yeesu na nɛra baa dɛ do ɡbɔɡa dɛɛ wi kohona.

³⁹ Waa jo bela la, o ŋɔ, “Ɛrɛɛ hɛɛ do ɡbɔɡa dɛɛ wi nɔɔ? Bie la ta sewɛ, domii wɛɛ chɔ.”

⁴⁰ Waa ŋɔ ɡɛ la, ba mamɔ. Anee o doŋi ba bwa le buse, dɛ kpɔ bie la mɛɛ ne o nya, ne o habɔteŋra batoro la baa ja o nɛɛ la jo bela bie la aa chɔa la,

⁴¹ dɛ ka lawɛ bie la nɔn, dɛ kpɔ ba wobol ŋɔ, “Talita kum!” O munii kɛ, “Tolo, n ŋɔ hé ir che.”

⁴² Buɡ la ta, bitolo la ir che dɛ valɛ. Ba bwa bwara yɔr.

⁴³ Yeesu kah ba ŋɔ ba bɛ ɡel nomɛlbwa no, kɛ bá nyin kwaa tɛ bie la ó di. Gɛ saŋ la dɛ bie la dɔ bene fi dɛ anɛ.