Amanesoma Mak Aa Chwera Tɔn 4 - mzwDBL

Mea dui sɛɡla

¹ Yeesu berɔ la Galilia Moo la nyoa dɛ kaa baɡle nɛra wa. Nɛra baa cheɡa baro la warɔ, anomanta, o jo ɡbera bini dɛ ka so nebaah tama, asɛ nɛra la ɡe che baŋ.

² Belaa o kpɔ sɛɡla dɛ bol waa chaɡ ba ŋɔ,

³ “Hɛ́ɛ no. Baa bɛlee ira dɛ kaa merɛ mea.

⁴ Waa ka dɛ merɛ mea la, ane lee ŋwɛnɛ nyoa, asɛ jumbii ba tɔɔ di.

⁵ Ane lee bwetala ta bela teera aa wola toole kohona. Teera la aa dawɛ bwetala la ta la aa kanɛ, a ta biɡre bɛlbwa mea la le. Kɛ a lune ta wone kaa bini.

⁶ Anomanta, wee aa lɔa la, a jwalɔ dɛ serewe.

⁷ Ane lee sɔɔhne baah dɛ le, asɛ sɔɔhne la kpeɡ dɛ lawa, a ta wone ɛ.

⁸ Asɛ anɔ la aa lee harɛdɛɛɡe ta la le, dɛ do wer dɛ ɛ. Ane ma fifraatotoro, ane ma fifraanunumɛla, asɛ ane ɡe ma lafare.”

⁹ Anee Yeesu ŋɔ, “Nomɛlbwa waa dɛ nyin dɛ́ no la, ó no.”

Mea dui sɛɡla mun baɡla

¹⁰ Aa ka Yeesu ne o habɔteŋra la ne nɛra baa dɛ teŋɛ o nɛɛ la, ba bɔɔro sɛɡla la mun.

¹¹ Anee Yeesu ŋɔ ba be ŋɔ, “Korowii ta o Kora bini wobɛlbwa kpɔe sɔh he te. Kɛ nɛra baa kaa la te, sɛɡla nee mɛɛ ba waa ba be bola,

¹² ásɛ a ɛ ɡɛ baa chwera ŋɔ, ‘Baa nyiŋuu kohona, kɛ baa a mun jema ba baa noo kohona, kɛ baa a jema ba, dɛkalkɛ baa ba liire chara ba bwa, ásɛ Korowii kpɔ ba wechɔɡa kɛ ba.’ ”

¹³ Belaa Yeesu bɔɔ ba ŋɔ, “He ta sɛɡla la mun noɛ yaa? Dɛ he ta onɔ mun noɛ yaa, ɛrɛɛ hɛɛ ba ɛɛ dɛ no sɛɡla bwa mun nɔ?

¹⁴ Nɛn la waa dɛ merɛ kwaa la, o cheɡɔ tɛ naate waa dɛ bol Korowii Wa.

¹⁵ Asɛ nɛra baa dɛ no Waa la bane do kɛ mea la aa lee ŋwɛnɛ nyoa jumbii tɔɔ di la, dɛkalkɛ ba baa no Korowii Waa la aa, buɡ la ta, dɛ Bɔnsam baa laa kpɔ ba nyu bini.

¹⁶ Nɛra baa dɛ no Waa la bane ɡe do kɛ mea la aa lee bwetala ta bela teera aa wola toole kohona kɛŋɔ a lune won kaa bini la, dɛkalkɛ ba baa no Korowii Waa la, dɛ ba sie lɛo.

¹⁷ Kɛ Waa la aa wola ban jooɡɛ la ɡelɔ aa won ba nyu bini ka. A cheɡɛ Korowii Waa ta waane puu ba aa, dɛ ba horɔ.

¹⁸ Asɛ nɛra baa dɛ no Waa la bane ɡe do kɛ mea la aa lee sɔɔhne baah la,

¹⁹ dɛkalkɛ ba no Korowii Waa la, kɛ dɛ ba soɡa bini ne kondɔɔh waa ne wepuu aa lɔ harɛ nɔ ta beɡre ba sie, baa ɡelɛ Waa la ɛɛ dɔ tɔnɔ.

²⁰ Nɛra baa dɛ no Korowii Waa la bane ɡe do kɛ mea la aa lee harɛdɛɛɡe ta dɛ le, asɛ dɛ ma fifraatotoro ne fifraanunumɛla ne lafare la, dɛkalkɛ ba no Korowii Waa la aa, ba dɛ kpoŋe a bini, dɛ́ ɡel a dɔ tɔnɔ.”

Kandea waa chɔŋɛ kon ta sɛɡla

²¹ Yeesu bɔɔ ba ja ŋɔ, “Ba choŋi kandea dɛ kpɔ kon dɛɛ pi o ta kɛɛ dɛ kpɔ dɛɛ do mpa lɔɡa ɔ? Kon ta laa ba kpɔ dɛɛ chɔŋaa?

²² Komɛlbwa waa sɔah ɛɛ le bochaahnee nɛra nao. Waa bwa baa tɔ a ta ɛɛ ba leo nɛra jemɛ.

²³ Anomanta, nomɛlbwa waa dɛ nyin dɛ́ no la, ó no.”

²⁴ Yeesu bolɔ ŋɔ, “Hé pese waa nɔ haa noa nɔ kɛrɛdɛ, dɛkalkɛŋɔ kpelaa ba ŋɔ, ‘Kon haa kpɔa maɡɛ kwaa tɛ he dɔŋ la tentenee baa ba kpɔe maɡɛ tɛ he ɡe la, dɛ́ berɛ jae ane.’

²⁵ Anomanta, naate waa dɔa la, baa jao anee ó dɔ kohona. Kɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa.”

Konduuli kpeɡa sɛɡla

²⁶ Yeesu ŋɔ, “Korowii Kora do kɛ baa bɛl waa du kwa,

²⁷ asɛ dɛ chɔ, dɛɛ ir tɔpere bɛlbwa, asɛ kwaa la le. O ta jemɛ ɡɛ aa ɛa a le.

²⁸ Harɛ laanee ɡela a le dɛ kpeɡ dɛ nɔnɛ.

²⁹ Belaa kwaa la aa ɛa dɛ be la, o kpɔ kere ka koma, dɛkalkɛŋɔ dɛ a koma telo.”

Mastad bii sɛɡla

³⁰ Anee Yeesu ŋɔ, “Bɔkwa konee yaa ba kpɔe dɛ maɡɛ Korowii Kora laɔ? Sɛɡla besoo yaa ba kpɔe baɡle o mun ɔ?

³¹ O waa tamaa won yɛɛra kɛŋɔ baa bɛl aa ira, dɛ kpɔ mastad bii dɛ ka du. O do jeɡaa ken ɡwaa harɛ nɔ ta kwaa bwa bie.

³² Kɛ o baa le dɛ kpeɡ aa, o kan ɡwaa konduula bwa, dɛ peɡri kpaljena, asɛ jumbii sɔh kɔne do o papooni lɔɡre.”

³³ Gɛɛ Yeesu kpɔ sɛɡla nɔ bwa dɔŋa dɛ bol waa ka tel kɛ nɛra la aa wona no a mun.

³⁴ Sɛɡla ɡbo nee wɛɛ bol waa ba be. Kɛ o ne o habɔteŋra la ɡbo te, o dɛ baɡ ba a bini.

Yeesu sɔɔh peujen bɛl nyoa

³⁵ Awola tenten jɔmɔra ne la, Yeesu ŋɔ o habɔteŋra la be ŋɔ bá ɡel ba kaa Galilia Moo la baŋ.

³⁶ Belaa ba ɡel nɛra la bela, dɛ jo ɡbera Yeesu aa lɔ o bini la bini, asɛ dɛ kpɔ ɡbeni la aa lɔ bela la ane ja.

³⁷ Baa dɛ kaa la, buɡ la ta, peujen bɛl tao, dɛ kpɔ nehɛma dɛɛ jo ba ɡbera la bini wɛɛ ba sui.

³⁸ Dɛ Yeesu te serɛ o kapuri dɛɛ chɔ dom ɡbera la mun ta. Anee o habɔteŋra la chumu dɛ ŋɔ, “Nomoa, yaa dɛ ba mora nɔ, he waane laa kɛɛ?”

³⁹ Asɛ Yeesu ir dɛ kɔr peu la ŋɔ, “Gel!” Dɛ berɛ ŋɔ nehɛma la be ŋɔ, “Hel!” Belaa peu la ɡel, asɛ bɔr hel kerker ken.

⁴⁰ Yeesu bɔɔ o habɔteŋra la ŋɔ, “Oo! Ɛrɛɛ hɛɛ ɔmɛ kohona ɡɛ nɔɔ? Ba le saŋ nɔ haa men yarada aa?”

⁴¹ Ba bwara hwah o waa taeh, ba bɔɔ dɔŋa ŋɔ, “Nɛn besoo siwii nɔ, peu ne nehɛma ɛɛ no o wobol nɔɔ?”