Amanesoma Mak Aa Chwera Tɔn 3 - mzwDBL

Baa bɛl o nɔn aa sewa

¹ Yeesu la cheremi dea bela ja, dɛ baa bɛl o nɔn aa sewa lɔ bela.

² Dɛ nɛra bane lɔ bela dɛɛ nyin dɛ́ kpɔ waa dawɛ Yeesu nɛ. Asɛ baa nyiŋi kɛ wɛɛ chah baa laanee Ona Tɔpere la ta ásɛ ba dɔ o waa dɛ́ bol.

³ Asɛ Yeesu yerɛ baa la o nɔn aa sewa la ŋɔ ó ir ba che ba sie.

⁴ Belaa Yeesu bɔɔ ba ŋɔ, “Ɛrɛɛ Korowii Mmara la ɛɛ baɡle yaa ŋɔ yá ɛ Ona Tɔpere ta laɔ? A ɛ aŋwɛnɛ ta kɛ yaa ɛ nɛra wedɛɛɡa kɛɛ yaa ɛ nɛra wechɔɡa ɔ? A ɛ aŋwɛnɛ ta kɛ ya lɛ nɛra mkpa kɛɛ yá chɔɡ baɔ?” Waa bɔɔ ba ɡɛ la, ba ta wone bol wobɛlbwa.

⁵ Asɛ Yeesu nyiŋi ba bwa, o baah di. Gɛ ba liire aa do toŋɡboŋ kohona la ta o sie lɛɛ. Anee o ŋɔ baa la be ŋɔ ó tɛr nɔn. Waa tɛr o nɔn la, dɛ o nɔn la berɔ do kpeɡri.

⁶ Anomanta, Farisii tena la le cheremi dea la bini, asɛ ba ne Hɛrɔd nɛra la ka cheme dɛ vɔrɔwe Yeesu vɔrɔwa dɛ́ fee kpoo.

Gɛ nɛnlaa aa baa teŋɛ Yeesu nɛ

⁷ Asɛ Yeesu ne o habɔteŋra le kaa Galilia Moo la ta. Belaa nɛnlaa bane baa le Galilia harɛ teŋɛ o nɛ. Nɛra baa le Juda harɛ

⁸ ne Jerusalam ne Idumia harɛ ne Jɔɔdan Moo wee leebɔr, dɛ nɛra baa le bwɛjena Taaya ne Sidon pera bwa no o wa, dɛ ba o be.

⁹ Nɛra la warɔ kohona, anomanta, Yeesu ŋɔ o habɔteŋra la be ŋɔ bá nyin ɡbera bɛl tɛo ó jo o bini ásɛ nɛra la che baŋ dɛ bɛ o nɛɛ tɔ.

¹⁰ Waa chah nɛra kohona nomanta, weela tena la kar ta dɛ nyinu dɛ leɡe.

¹¹ Banɔ la kwaa aa dɛ ir ba nɛɛ la nao waa, ɡɛɛ ba choɡli o sie dɛ kpɔ takpeɡ dɛɛ bol waa o be, ŋɔ, “Henee Korowii Bie la!”

¹² Anee Yeesu kah ba ŋɔ ba bɛ o nɛnsoo baɡle.

Gɛ Yeesu aa le o toroma fi dɛ banɛ

¹³ Asɛ Yeesu ka che bwe bɛl ta, dɛ yerɛ nɛra waa dɛ nyin, anee ba ba o be.

¹⁴ Belaa o le ba bini fi dɛ banɛ dɛ ŋɔ bá teŋɛ o nɛɛ dɛɛ bol Korowii Wa.

¹⁵ O ŋɔ baa dɔ kpeɡrii dɛɛ doŋi kwaa aa dɛ ir nɛra nɛ.

¹⁶ Yeesu nɛra fi dɛ banɛ waa kpɔ ba laanee nɔ. Seemɔn waa pa o sɔn Pita la,

¹⁷ ne Sebedii bii Jems ne o nime Jɔn waa pa ba ɡe sɔn Bɔanɛjes la, o munii kɛ Sikpeɡ Tena,

¹⁸ ne Andriu ne Felep ne Batolomeo, ne Matiu ne Tɔmas ne Alfeɔs bie Jems, ne Tadeɔs, ne Seemɔn Sɛlɔt,

¹⁹ dɛ Judas Eskareɔt wáa le Yeesu tɛ ba kpoo la.

Yeesu ne Bɛlsebul

²⁰ Yeesu aa kaa dem la, nɛnlaa baa cheme o nɛɛ ja, o ne o habɔteŋra la ta bɔr dɔe dɛ́ di kwaa kwara.

²¹ Belaa Yeesu nɛra aa noa la, ba ba kpɔɔ le ba baah, dɛkalkɛ nɛra dɛ bol ŋɔ o dɛ we choɡla.

²² Asɛ Tɔnjerema bane le Jerusalam ba dɛ ba ŋɔ, “Bɛlsebul waa ɛ kwaa aa dɛ ir nɛra nɛɛ bwa kooro laanee tɛo kpeɡri o kpɔ dɛɛ doŋi kwaa la.”

²³ Anee Yeesu yer ba dɛ ŋɔ ba be ŋɔ, “Ɛrɛɛ Bɔnsam ɛɛ ba wona doŋi o tenten nɔ?”

²⁴ Dɛ sɛɡ ba ŋɔ, “Dɛ harɛ bɛl ta tena bini pere anɛ asɛ baa yo aa, o dɛ paɡre.

²⁵ Dɛ waane ba dem bɛl ta asɛ ba baah pere anɛ ba ɡbo ɛɛ yo aa, dem la aa won che.

²⁶ Dɛ Bɔnsam ɡe kora bini peraa, waa won che. O dɛ ba chɔɡa.”

²⁷ O berɛ ŋɔ, “Nomɛlbwa aa won jo bokpeɡa te dea dɛ́ ŋwɛ o laala, nemenɛ o tɔ sie won vɔrɔwo mɔɔ, dɛ́ won jo o dea dɛ́ pa o laala.”

²⁸ Belaa o ŋɔ ba be ŋɔ, “Kasinteŋ, Korowii won nɛra wechɔɡa ne nɛnhɛla baa dɛ ɛo la kpɔe dɛ́ kɛ ba.

²⁹ Kɛ nomɛlbwa waa ɛ Korowii Domadɛɛɡe la nɛnhɛla la te, waa kpɔ kɛo. Naate wechɔɡa ɛɛ dawɛ o nɛɛ saŋ bɛlbwaa.”

³⁰ Waa nɛra aa dɛ bol kɛ kwaa ir Yeesu nɛɛ la waa o bol ɡɛ waa nɔ.

Yeesu nya ne o nimanar

³¹ Yeesu aa lɔ dem bela la, o nya ne o nimanar baa che buse dɛ tomɛ nɛn ŋɔ ó yerɔ.

³² Dɛ nɛra warɔ dɛ so baro cheme, anee ba ŋɔ Yeesu be ŋɔ, “Nomoa, he nya ne he nimanar cheɡɛ buse dɛɛ yerɛ.”

³³ Asɛ Yeesu bɔɔ ba ŋɔ, “Umee n nya ne n nimanar ɔ?”

³⁴ Anee o laa nyu ir dɛ nyiŋi nɛra baa soɡa baro la, dɛ ŋɔ, “Hé na n nya ne n nimanar.

³⁵ Nomɛlbwa waa dɛ ɛ waa Korowii aa dɛ nyin laanee n nime ne n nimambie ne n nya.”