Amanesoma Mak Aa Chwera Tɔn 11 - mzwDBL

Yeesu jo Jerusalam jirima ne

¹ Baa dɛ tel Jerusalam dɛɛ bɛne Bɛtfej ne Bɛtani la, Ɔlevere Bwejen la bɔr bela la, o tomɛ o habɔteŋra la banɛ ŋɔ bá tɔ sie,

² dɛ ŋɔ, “Hé la bwɛɛ nɔ waa lɔ he sie nɔ ta. Haa dɛɛ tel bela la, hɛɛ nao kɛŋɔ baa vɔwɛ keeɡo bie bɛl baa wola o ta soɡe bwa. Hé laa pur dɛ́ kpɔɔ ba.

³ Ásɛ dɛ nomɛl bɔɔ heyaa ŋɔ bɔkwaa hɛɛ ba o ne ɛɛ yaa, hé ŋɔ he Dɔɔ dɛ nyinu dɛ́ ɛ waane, ásɛ dɛ berɛ kpɔ ba taraken.”

⁴ Asɛ ba la dɛ ka na keeɡo bie bɛl baa lawɔ vɔwɛ ŋwɛnɛ nyoa doonyoa bɛl jwɛh.

⁵ Baa dɛ puru la, nɛra baa cheɡɛ bela la bane bɔɔ ba ŋɔ, “Bɔkwaa he pur keeɡo bie la dɛ́ɛ ɛɔ?”

⁶ Asɛ ba bol ɡɛ Yeesu aa ŋɔa bá bol la, asɛ nɛra la tɛɛ ba ŋwɛnɛ.

⁷ Ba kpɔ keeɡo bie la ba tɛ Yeesu dɛ pa ba yale darawe o habɔɔ, asɛ Yeesu so o ta.

⁸ Nɛndamanta tɛo jirima dɛ pa ba yale pa ŋwɛnɛ ta, asɛ bane ɡe kɛ papooni bela kooni la ta, dɛ pa ŋwɛnɛ la bwa ta.

⁹ Dɛ nɛra baa tɔ Yeesu sie ne banɔ la baa ka mun la bwa dɛ si, “Woowo! Korowii swee naate waa valɛ o sɔn ta dɛɛ ba nɔ andɛɛɡa!

¹⁰ Korowii swee ya Naa Devid kora nɔ waa dɛ ba ira ja nɔ andɛɛɡa! Korowii jam!”

¹¹ Yeesu la Jerusalam dɛ ka jo Korowii Dea bini dɛ nyinyiŋi waa aa dɛ ɛ bela la bwa. Bɔr aa dɛ jo la nomanta, o ne o habɔteŋra fi dɛ banɛ la kaa Bɛtani.

Yeesu taah fiɡ daa bɛl

¹² Tɔɔ aa pera, ba le Bɛtani dɛɛ ba la, dɛ lɔr lawɛ Yeesu.

¹³ O na fiɡ bɛl bojaŋ dɛ o moɡɛ papooni sukuu ken, dɛ fe la o mun ŋɔ o ken fe ɛɛ dɔ o nɔna anee di kɛɛ? Waa tel bela la dɛ papooni ɡboo tɔ daa la bwa, dɛkalkɛŋɔ dɛ pure nɔna ta tele mɔɔ.

¹⁴ Belaa Yeesu taah fiɡ daa la ŋɔ, “Nomɛlbwa aa he nɔna dii ba kpa bwa.” Waa ŋɔ ɡɛ la, o habɔteŋra la noɔ.

¹⁵ Baa tel Jerusalam la, Yeesu jo Korowii Dea bobɛl dɛɛ doŋi kon-yoɡra ne kon-yarawa baa lɔ bela la. O berɛ nɛra baa lɔ bela dɛɛ peɡri suuɡa la teeburre bwa piiɡi, dɛ taɡɛ banɔ la baa dɛ yoɡ borɔnomare la bwa kane ta.

¹⁶ O ta sɛɛh nomɛlbwa kpɔ bone bɛlbwa kpɔ Korowii Dea dembaahna la bini.

¹⁷ Asɛ o bol waa dɛɛ baɡ ba ŋɔ, “Ba ta chwerɛ ŋɔ, ‘Baa yerɛ n Dea harɛre nɛra bwa Korowii soŋebɔr’ yaa? Gɛɛ he te berɛ kpɔɔ berɛ ŋwɛɛra sɔɔhbɔr aa?”

¹⁸ Sɔfonomonome ne Tɔnjerema la aa no a ɡɛ waa nɔ la, belaa ba pa mun dɛɛ nyin ŋwɛnɛ dɛ́ kpo Yeesu. Dɛ ba dɛ ɔmɔ, dɛkalkɛŋɔ dɛ o webaɡla dɛ kpo nɛra bwa nyoa.

¹⁹ Bɔr aa ba dɛ jo la, Yeesu ne o habɔteŋra la le bwɛjen la ta.

Fiɡ dahole wehwela wa

²⁰ A tɔɔ aa pera chɔmbibi ne ba valɛ ŋwɛnɛ ta dɛɛ kaa la, ba kaa le fiɡ daa la ta, dɛ o sewɔ kwaraa le o nyundua ka le o lune bwa ta.

²¹ Belaa Pita lii ɡɛ aa ɛa mɔɔ daa la sewɛ la, dɛ ŋɔ Yeesu be ŋɔ, “Nomoa, na. Fiɡ daa la haa taahno la sewɔ!”

²² Asɛ Yeesu ŋɔ ba be ŋɔ, “Hé yarada Korowii.

²³ Kasinteŋ, nomɛlbwa waa won kpɔ yarada ŋɔ bwe nɔ be ŋɔ ó ir ka le mpo ta, waa wola tɔŋlɛ o bambile ta tamaa bɛlbwa, dɛ yarada kɛŋɔ Korowii ɛɛ wonoo ɛ ɡɛ la, aa ɛo tɛo kpela ɡe.

²⁴ Anomanta, kasinteŋ, dɛ he dɛ soŋe Korowii komɛl aa, hé yarada kɛŋɔ he dɔɔ dɔ kon la. Dɛ he wono yarada ɡɛ naa, komɛlbwa haa soŋe la, Korowii ɛɛ tɛ heyaa.

^25-26 Dɛ he iro che dɛɛ soŋe Korowii ɡe aa, wobɛlbwa he bala bane aa ɛ heyaa la, hé kpɔ kɛ ba ásɛ he Mɛɛ waa lɔ nyundua la ɡe kpɔ he wechɔɡa kɛ heya.”

Kpeɡri Yeesu aa dɔa dɛɛ ɛ wa wepɛɛre

²⁷ Asɛ Yeesu ne o habɔteŋra berɛ ba jo Jerusalam ja. Yeesu aa ba dɛ valɛ Korowii Dea la bini la, Sɔfonomonome ne Tɔnjerema ne bela nomonome la ba o be

²⁸ dɛ ba bɔɔro ŋɔ, “Umee tɛɛ ŋwɛnɛ ŋɔ hé ɛ ɡɛ waa nɔ haa dɛ ɛ nɔɔ? Umee tɛɛ kpeɡri kwaraa te nɔ?”

²⁹ Yeesu chaŋ ba ŋɔ, “Ń bɔɔ heyaa webeŋkpoŋ, dɛ he wono jemaa, mɛɛ baɡle heyaa naate waa tɛ mɛ kpeɡrii mɛɛ ɛ ɡɛ waa nɔ.

³⁰ Umee tɛ Jɔn kpeɡri wɛɛ sɔ nɛra Korowii nee laɔ? Korowiirii tɛo waa, kɛ nɛwɛnyinii tɛo wɔ? Hé baɡ mɛ naate.”

³¹ Ate, dɛ ba ɡboɡbo dɛ tɔŋle dɔŋa dɛɛ ŋɔ, “Aah ɛrɛɛ yaa ba ŋɔe yɔ? Dɛ ya ŋɔ Korowiirii tɛo waa, wɛɛ ŋɔɔ, ‘Aah ɛrɛɛ haa wola Jɔn yaradae yɔ?’

³² Kɛ dɛ ya ŋɔ nɛwɛnyinii tɛo ɡe aa, aa werii do.” Dɛ ba dɛ ɔmɛ ba ɡbaɡba nɛra la, dɛkalkɛŋɔ dɛ nomɛlbwa yaradao kɛŋɔ Korowii keamee Jɔn.

³³ Anomanta, ba waa baa bola laanee kɛŋɔ, “Yaa jemɛ.” Anee Yeesu ŋɔ ba be ŋɔ, “Gɛ haa wola jemɛ la, ɡɛɛ n ɡe aa wola heyaa naate waa tɛ mɛ kpeɡri mɛɛ ɛ a ɡɛ waa nɔ maa dɛ ɛ nɔɔ baɡle.”