Amanesoma Mak Aa Chwera Tɔn 10 - mzwDBL

Baa ne haah dɔŋa vɛɛh wa

¹ Asɛ Yeesu le bela dɛ la Juda harɛ ta, dɛ ka le Jɔɔdan Moo la baŋ. Nɛndamanta wur dɛ ba tɔ o nɛɛ ja, asɛ o baɡ ba waa ɡɛ o yon dɛɛ ɛ la.

² Farisii tena bane ba bela dɛ baa haɡro bela dɛ fe ɛɛ nyin dɛ́ lawɔ. Ba bɔɔro ŋɔ, “Mmara dɛ tɛ ŋwɛnɛ kɛŋɔ baa vɛh o haah naa?”

³ Anee o ɡe berɛ bɔɔ ba ŋɔ, “Ɛrɛɛ Mosis Mmara baɡle heyaa laɔ?”

⁴ Asɛ ba ŋɔ, “Mosis tɛ ŋwɛnɛ kɛŋɔ baa chwerɛ tɔn dɛ́ baɡle kɛŋɔ o vɛh o haah, dɛ́ vɛoh.”

⁵ Anee Yeesu ŋɔ ba be ŋɔ, “He bambikpeɡ waa Mosis chwerɛ a ɡɛ Mmara nɔ tɛ heyaa la.

⁶ Gɛ laa a fa do wubwa. Korowii aa ta kwaa bwa mumpar la, ‘Baa ne haahnee o ta.

⁷ A waa baa ɛɛ ba o nya ne o mɛɛ jwɛɛh lee, dɛ́ kpɔ o te ka pɛl o haah,

⁸ ásɛ ba nɛra banɛ la pɛ ɛ nɛmbeŋkpoŋ la. Anomanta, baa nɛra banɛ ɛɛ ba kpa, ba pɛo ɛ beŋkpoŋ.’

⁹ Dɛ Korowii lawɛ nɛra banɛ pɛ aa, ŋwɛnɛ toole kɛŋɔ nɛn berɛ pere ba baah kpa.”

¹⁰ Baa la dem la, o habɔteŋra la berɔ bɔɔro a ɡɛ waa nɔ ja.

¹¹ Asɛ o ŋɔ ba be ŋɔ, “Nomɛlbwa waa vɛh o haah dɛ ka mo onfale la, dɛ o ɛ o haah la wechɔɡa dɛ bɔ jwamane.

¹² Dɛ haah ɡe vɛh o jaa dɛ ka yalɛ banfale aa, dɛ o ɡe ɛ o jaa la wechɔɡa dɛ bɔ jwamane.”

Yeesu swee bechale bane andɛɛɡa

¹³ Dɛ nɛra bane kpɔ ba bii dɛɛ ba Yeesu be ŋɔ ó kpɔ o nɔn dawɛ ba nɛ. Asɛ o habɔteŋra la kɔɡre nɛra la ŋɔ bá kpɔ ba bii la le le!

¹⁴ Yeesu aa na ɡɛ baa dɛ ɛ la, o baah di ba nɛ, o ŋɔ ba be ŋɔ, “He bɛ bii la ŋwɛnɛ tɔ. Hé ɡel ba ba n be, dɛkalkɛŋɔ banɔ dɔŋa nɔɔ Korowii koobii la.

¹⁵ Kasinteŋ, n dɛ ŋɔ he be, naate waa wola o te kpɔe tɛ Korowii dɛ yaradao ɡɛ bechala aa dɛ ɛ la, waa bɔree dɔ dɛ ba ja o Kora la ta.”

¹⁶ Asɛ o kpɔ bii la, dɛ kpɔ o nɔɔra dawɛ ba nɛɛ dɛ swee ba andɛɛɡa.

Baa bɛl waa ɛ dɔɔh wa

¹⁷ Yeesu aa bera dɛɛ ba ŋwɛnɛ ta lee dɛ kaa la, baa bɛl chwao dɛ ba ɡuŋi o sie dɛ ŋɔ, “Nomondɛɛɡe, ɛrɛɛ chɛ kɛŋɔ ń ɛ dɛ́ dɔ Korowii mkpa aa wola jaɡa dɔe bwa nɔ?”

¹⁸ Anee Yeesu bɔɔro ŋɔ, “Ɛrɛɛ he yer mɛ nɛndɛɛɡe nɔɔ? Nomɛlbwa toole dɛ ɛ nɛndɛɛɡe. Korowii ɡbosoo ɛ nɛndɛɛɡe.

¹⁹ Kɛ he jemɛ Korowii Mmarare laɔ? Anee, ‘Bɛ nɛn kpo, bɛ jwamane bɔ, bɛ ŋwɛ, bɛ nyosone teŋe dawɛ he dɔŋ nɛ, bɛ he dɔŋ faah, dɛɛ duu he nya ne he mɛɛ.’ ”

²⁰ Anee o ŋɔ Yeesu be ŋɔ, “Nomoa, n bechale saŋ bwaa n le dɛ teŋɛ anɔ bwa ta.”

²¹ Yeesu nyiŋu, o sie lɛ o nɛ, dɛ ŋɔ o be ŋɔ, “A ka he webeŋkpoŋ. La ka yoɡ kwaa haa dɔa bwa, ásɛ dɛ kpɔ a suuɡa kɛ nyaara. He ɛ ɡɛ naa, hɛɛ dɔ kondɔɔh cheɡ Korowii doa. Ka ɛ ɡɛ ásɛ dɛ ba teŋɛ n nɛ.”

²² Yeesu aa ŋɔ ɡɛ la, ate dɛ o tea bini chɔɡɔ, asɛ o berɛ ɡure nyu su, dɛkalkɛŋɔ dɛ o dɔ kwaa kɛrɛdɛ.

²³ Asɛ Yeesu ke nyiŋi o habɔteŋra la dɛ ŋɔ, “Aa do kpeɡrii tɛ dɔɔhna kɛŋɔ bá dɔ bɔr ja Korowii Kora la ta.”

²⁴ A ɡɛ waa la Yeesu aa bola la ɡelɔ o habɔteŋra la bwara yɔr. O ŋɔ ba be ŋɔ, “Biiwa, a kpeɡri kɛŋɔ nɛn dɔ bɔr ja Korowii Kora la ta.

²⁵ Aa do pwɛree tɛ nyoɡma kɛŋɔ ó won jo tɔɔɡe bɔɔ ta, ɡwaa kɛŋɔ dɔɔh naa wona ja Korowii Kora la ta.”

²⁶ Yeesu aa bol ɡɛ la, dɛ o habɔteŋra la bwa bwara yɔrɔ, asɛ baa bɔɔ dɔŋa ŋɔ, “Amɔ te, umee dɛɛ ba o nyu dɔe yɔ?”

²⁷ Belaa Yeesu pa sie nyiŋ ba dɛ ŋɔ, “Nɛwɛnyini bee a do kpeɡri, kɛ Korowii be te, wobɛlbwa aa kpeɡe. Wobɛlbwa pwɛre Korowii be.”

²⁸ Belaa Pita ŋɔ, “Nyiŋi na, ya te ɡel komɛlbwa yaa dɔa dɛ ba teŋɛ he nɛ.”

²⁹ Asɛ Yeesu ŋɔ, “Kasinteŋ, n dɛ ŋɔ he be, nomɛlbwa waa koh n ne Amanesoma nɔ waa dɛ ɡel o bwɛɛ tena ne o nimanar ne o dɔɔranar ne o nahaahnanar, ne o nya ne o mɛɛ, ne o bii dɛ o kooni la,

³⁰ wɛɛ dɔ a ɡɛ bwɛɛre ne nimanar ne dɔɔranar ne nyawa ne bii, dɛ kooni nɔ bɛlbwa kembɔree kera lafa harɛ nɔ ta, dɛ́ ja hɔhɔrɔwa nɛra aa dɛ ba o haeh dɛ́ ɛo la ta. A bwa habɔɔ la, wɛɛ dɔ Korowii mkpa aa wola jaɡa dɔe ɡee nyundua ja.

³¹ Nɛra baa tɔ sie ɡalɡa ɛɛ ba ka munii, ásɛ nɛra baa ka mun ɡe ɡalɡa ba tɔ sie.”

Yeesu berɔ bol o seo waa toorotena

³² Dɛ ba lɔ ŋwɛnɛ ta dɛɛ kaa Jerusalam, asɛ Yeesu tɔ ba sie. Dɛ o habɔteŋra la bwara yɔrɔ, asɛ nɛra baa teŋɛ o nɛɛ la bwa ɡee ɔmɛ. Asɛ Yeesu berɛ lawɛ o habɔteŋra fi dɛ banɛ la kaa bokɛre, dɛ ka taa waa aa dɛ ba o ɛɛ la bwa baɡ ba,

³³ dɛ ŋɔ, “Yaa dɛ kaa Jerusalam nɔ, baa ka le Men Nɛn Biee tɛ Sɔfonomonome ne Tɔnjerema la. Baa pa mɛ bolchɔɡee dɛ́ ŋɔ bá kpo mɛ, dɛ́ kpɔ mɛ do nɛra baa wola Juu tena ɛɛ la nɔn ta.

³⁴ Baa di n loroo, dɛ́ tata nentane ta n nɛ, dɛ chacha mɛ chweremi, dɛ́ kpaa mɛ pɛl daɡaɡre ta, dɛ́ kpo mɛ. Kɛ a tɔpetooro wee mɛɛ berɔɔ ir seo ta.”

Jems ne Jɔn Yeesu soŋa

³⁵ Asɛ Sebedii bii Jems ne Jɔn ba o be dɛ ba ŋɔ, “Nomoa, ya dɛ nyin he ɛ waane tɛ yaa.”

³⁶ Asɛ Yeesu ŋɔ, “Bɔkwaa yɔ?”

³⁷ Belaa ba chaŋe ŋɔ, “He baa di he kora waa dɔ jirima dɛ so he kookara ta naa, ya dɛ nyin kɛ he ɡel ya so pɛle, bɛl so he diɡ ta, bɛl ɡe so he ɡal ta.”

³⁸ Asɛ Yeesu ŋɔ ba be ŋɔ, “Haa waa haa dɛ bol nɔ mun jemɛ. Hɛɛ wonoo nyɔ n tɛɡkpela maa dɛ ba nyɔe nɔ ane aa? Hɛɛ wonoo na hɔhɔrɔwa maa dɛ ba nae nɔ dɔŋa aa?”

³⁹ Anee ba sɛh ŋɔ, “Yaa wonoo.” Belaa Yeesu ŋɔ, “Kpelaa! Hɛɛ nyɔ n tɛɡkpela nɔ anee dɛ́ na n hɔhɔrɔwa nɔ dɔŋa.

⁴⁰ Kɛ n ta kpeɡri dɔe dɛ́ kpɔ nɛn so n diɡ ne n ɡal ta. Korowii ɡboo jemɛ nɛra waa kwaa a ɡɛ bɔra la cheɡ dɛ́ kpɔ ba ka so bela.”

⁴¹ Yeesu habɔteŋra kabora la aa baa no a ɡɛ waa nɔ la, ba baah di Jems ne Jɔn nɛ.

⁴² Anomanta, Yeesu yerɛ ba bwa ba o be dɛ ŋɔ, “He jemɔ kɛŋɔ nɛra baa wola Juu tena ɛɛ la te, ba nomonome dɛ di kpeɡri ba nɛ, dɛ yon ɡel baa tom ba.

⁴³ Kɛ ɡɛ laa chɛ kɛŋɔ á do he te be. Dɛ he bini bɛl dɛ nyin ó ɛ he bwa nomoa aa, a chɛ kɛŋɔ ó kpɔ o te ɛ bechala dɛɛ tomɛ heya.

⁴⁴ Dɛ he bini bɛl dɛ nyin ó ɛ o te sitɔɔ raa, a chɛ kɛŋɔ ó sɛh dɛ́ berɛ o te kɛ he bwa bonɔɔ,

⁴⁵ dɛkalkɛŋɔ Men Nɛn Bie kwaraa ta balɛ kɛ nɛ́ra baa tom mɛ. N te balɔ dɛ́ ba tomɛ nɛwɛnyini, dɛ́ kpɔ n nyu charɛ nɛndamanta mkpa.”

Yeesu chah Baatemeos o won dɛɛ na

⁴⁶ Ba ba bwɛjen Jeriko, asɛ Yeesu ne o habɔteŋra la ne nɛnlaa bane aa le bela dɛɛ kaa la, dɛ Temeos binyoŋe Baatemeos o yon dɛɛ soŋe kwaa saŋ bɛlbwa la soɡe ŋwɛnɛ la keŋkeŋ.

⁴⁷ Waa noa kɛŋɔ Yeesu waa le Nasarɛt laanee la, dɛ o dɛ yerɛ Yeesu takpeɡ ne dɛɛ ŋɔ, “Devid Naa Yeesu, na n sum!”

⁴⁸ Asɛ nɛra kɛrɛdɛ kaoh ŋɔ ó tɔ nyoa. Kɛ o ta ban chaŋɛ. Namee o ta do lɔŋɔ kohona dɛɛ yerɛ, “Devid Naa Yeesu, na n sum!”

⁴⁹ Anee Yeesu jaɡɛ che, dɛ ŋɔ, “Hé yerɔ.” Asɛ ba yerɛ nyoŋe la dɛ ŋɔ, “Sɔɔh bwara dɛ ir! O dɛ yerɛ.”

⁵⁰ Asɛ o wur o yal viɡri, dɛ jah ir che dɛ ba Yeesu be.

⁵¹ Belaa Yeesu bɔɔro ŋɔ, “Bɔkwaa he ŋɔ ń ɛ tɛɛ nɔ?” Asɛ nyoŋe la ŋɔ, “Nomoa, n dɛ nyin ń won dɛɛ na.”

⁵² Asɛ Yeesu ŋɔ o be ŋɔ, “Kaa. He yarada haa yarada mɛ la ɡelɔ he dɔ bokpeɡa.” Buɡ la ta, dɛ o wono dɛɛ na, dɛ teŋɛ Yeesu nɛɛ ŋwɛnɛ la ta.