Amanesoma Mak Aa Chwera Tɔn 1 - mzwDBL

Jɔn waa dɛ sɔ nɛra Korowii nee wa

¹ N dɛ nyin n baɡle heyaa amanesoma aa le Korowii Bie Yeesu Kristo waa la ta. A mumparee nɔ.

² Korowii keame Aesaya chwerɛ ɡɛ Korowii aa bol nɛn waa dɛ ba Yeesu sie tɔe la waa o Tɔn bini ŋɔ, “Mɛɛ tomɛ n toromee ó tɔ he sie dɛ́ kwaa ŋwɛnɛ tɛɛ.”

³ Dɛ berɛ chwerɛ ŋɔ, “Nomɛl dɛ bol waa takpeɡ ne pua hɛŋle ɡbo harɛ ta, dɛ ŋɔ nɛ́ra ɡel ba we-ɛɛla toɡre, dɛ́ kpɔ ba te dɛɛ kpa ba Dɔɔ bala.”

⁴ Gɛɛ a do Jɔn ir dɛ ba pua hɛŋle ɡbo harɛ la ta, dɛ ba bol Korowii Waa dɛɛ baɡle nɛra, dɛɛ ŋɔ bá charɛ ba liire dɛ́ le ba wechɔɡa ta, ásɛ Korowii kpɔ ba wechɔɡa kɛ ba, ásɛ o ɡe sɔ ba Korowii ne.

⁵ Belaa nɛra baa le Juda harɛ, ne Jerusalam tena bwa le kaa Jɔn be ka no o waa la, dɛ bol ba wechɔɡa dɛɛ baɡlo, asɛ o sɔ ba Korowii nee Jɔɔdan Moo ta.

⁶ Jɔn nɔ yal waa tɔɔ la, nyoɡma pona nee ba sɔɔh, ol tɔn ɡee ɛ o kiriso. Dɛ tontombɛ ne toohnee ɛ o kondikwa.

⁷ O ŋɔ nɛra la be ŋɔ, “Nomɛl dɛ ba n habɔɔ dɛ́ ɡwaa mɛ. Maa o napaa tee kwaraa dɔ.

⁸ Maa sɔ heyaa Korowii nee la, nee ɡbaɡbaa n kpɔ sɔ heya. Kɛ o te ɛɛ kpɔ Korowii Domadɛɛɡe laanee sɔ heya.”

Jɔn sɔ Yeesu Korowii ne, asɛ Bɔnsam ɡe daahno na

⁹ Belaa Yeesu le Nasarɛt waa lɔ Galilia harɛ ta dɛ ba Jɔn be, asɛ o sɔɔ Korowii nee Jɔɔdan Moo ta.

¹⁰ Buɡ la ta, Yeesu aa le nee la ta la, o nao kɛŋɔ nyundua pilo, asɛ Korowii Domadɛɛɡe do kɛŋɔ borɔnoma ken dɛ ba so o nɛ.

¹¹ Asɛ o no taa bɛl le nyundua ŋɔ, “Henee n bie maa dɛ nyin he wa, he wa ɛɛ su n siwi.”

¹² Anee Korowii Doma la den ɡel o kaa pua hɛŋle ɡbo harɛ ta,

¹³ bela kpɔɡ bini olchɔɡa aa lole, asɛ o do bela tɔpera fifraanaarɛ. Dɛ Bɔnsam dɛ ba o be bela dɛ baa daahno dɛɛ na kɛŋɔ o fe charɛ nyoa. Dɛ nyundua toroma ɡe dɛ ba o be dɛ baa chao.

Gɛ Yeesu aa kpɔ o loɡla habɔteŋra

¹⁴ Belaa ba lawɛ Jɔn do dea. A habɔɔ la, Yeesu la Galilia harɛ dɛ ka bol Korowii Amanesoma baɡ ba.

¹⁵ O bolɔ ŋɔ, “Tɔpere la telo! Korowii Kora pu heyaa tonɛ! Hé charɛ he liire dɛ́ le he wechɔɡa ta, ásɛ dɛ yarada Amanesoma nɔ!”

¹⁶ Belaa Yeesu aa dɛ valɛ Galilia Moo la nyoa la, o na nɛra banɛ bane baa dɛ ɛ nee toma dɛɛ ta asau, Seemɔn ne o nime Andriu.

¹⁷ Anee Yeesu ŋɔ ba be ŋɔ, “Hé ɡel he pɛŋa la nyina dɛ́ ba teŋɛ n nɛ, ásɛ n baɡle heyaa ɡɛ baa nyin nɛra baa tɛ Korowii.”

¹⁸ Buɡ la ta la, ba ɡel ba asauri la dɛ teŋɛ o nɛ.

¹⁹ Baa le bela dɛ la sie tama ken la, o na baala banɛ bane, Sebedii bii Jems ne o nime Jɔn, baa lɔ ba ɡbera bini dɛɛ tɔɔɡe ba asauri.

²⁰ Belaa Yeesu yer ba, asɛ ba ɡel ba mɛɛ Sebedii ne paa tena baa kpɔ ba ja ba nɛɛ la ɡbera la bini dɛ ka teŋɛ o nɛ.

Baa bɛl kwaa aa dɛ ir o nɛɛ wa

²¹ Yeesu ne o habɔteŋra la Kapeeneɔm, asɛ Ona Tɔpere la, o la cheremi dea dɛ ka baɡle wa.

²² O webaɡla la ɛɛ ba nyokpoa, dɛkalkɛŋɔ a ta do kɛ ɡɛ Tɔnjerema la yon dɛɛ baɡle la. O te dɛ bol waa kɛ nɛn waa dɔ waa bwa kpeɡri ken.

²³ Belaa baa bɛl kwaa aa dɛ ir o nɛɛ ba cheremi dea bela dɛ ba nyɛɡ ŋɔ,

²⁴ “Yeesu Nasarɛt te, bɔkwaa hɛɛ nyin ya be nɔ? Ya chɔɡaa he ba kɛɛ? N jemɛ he nɛnsoo. Henee Korowii Biɡoroŋ la waa ŋɔa ŋɔ o dɛ ba bala la.”

²⁵ Anee Yeesu kɔr kwaa la aa lɔ baa la nɛɛ la ŋɔ, “Hé tɔ nyoa dɛ́ le o nɛ.”

²⁶ Asɛ a ir o nɛɛ dɛ ɡel o beŋri, a dooɡe lɔŋɔre mɔɔ dɛ le o nɛ.

²⁷ Gɛ waa nɔ ɛ nɛra la bwa nyokpoa, asɛ ba bol dɔŋa be ŋɔ, “Bɔkwa waa nɔɔ? A ɡe ɛ webaɡlefala kɛɛ? He ta nae kɛŋɔ o dɔ kpeɡri dɛ bol waa kwaa aa dɛ ir nɛra nɛɛ be a no dɛɛ kaa la aa?”

²⁸ Buɡ la ta, Yeesu waa perɛ Galilia harɛ bobɛlbwa.

Gɛ Yeesu aa chah nɛndamanta bane

²⁹ Baa le cheremi dea bela la, ba ne Jems ne Jɔn pa sie kaa Seemɔn ne Andriu dem.

³⁰ Dɛ Seemɔn helahaah bwara wɔrɔbɔ o chɔ kalaŋ ta. Yeesu aa bala la, ba bol haah la waa baɡlo.

³¹ Asɛ o la o be dɛ ka lawɔ ir. Belaa a le o nɛ o bwara sɔɔhno, asɛ o ir dɛ daa kwaa tɛɛ ba.

³² Wee aa joa la, ba kpɔ weela tena ne nɛra kwaa aa dɛ ir ba nɛɛ bwa ba Yeesu be.

³³ Asɛ bwɛɛ la tena la bwa ba che dem la doonyoa.

³⁴ O chah nɛndamanta weela bwa soo siwi aa lɔ ba nɛ, dɛ doŋi kwaa ɡe le nɛndamanta nɛ. O ta kwaa la ŋwɛnɛ tɛɛ a won bol wa, dɛkalkɛŋɔ a jemɛ o nɛnsoo.

Yeesu Korowii waa bola Galilia harɛ ta

³⁵ Tɔ aa pera chɔmbibi la, Yeesu iro le dem bela dɛ kaa bela aa hela, dɛ ka soŋe Korowii.

³⁶ Belaa Seemɔn ne o bala la ir dɛ kaa ɡaaɡe o bɔr.

³⁷ Baa nao la, ba ŋɔ o be ŋɔ, “Nɛra bwa dɛ nyin he bɔr.”

³⁸ Anee Yeesu ŋɔ ba be ŋɔ, “Hé ɡel ya kaa bwɛɛre aa bɛne bonɔ nɔ ta ásɛ n ka bol waa a ɡe ta, dɛkalkɛ a waa n koh ba.”

³⁹ Anomanta, o valɛ Galilia harɛ bwa dɛɛ bol waa ba cheremi deene bini dɛɛ doŋi kwaa aa dɛ ir nɛra nɛ.

Yeesu chah baa bɛl weechɔɡa aa ɛ o bwara

⁴⁰ Asɛ baa bɛl weechɔɡa aa ɛ o bwara ba Yeesu be, dɛ ba ɡuŋi harɛ dɛ soŋo ŋɔ, “Hɛɛ sɛoh waa, hɛɛ wonoo ɡel n bwara kwaa.”

⁴¹ O waa do Yeesu sum, o tɛr o nɔn leɡo dɛ ŋɔ, “N sɛoh. N ɡelɔ he bwara kwaa.”

⁴² Buɡ la ta la, weela la den le o nɛ, asɛ o bwara kwaa.

⁴³ Anee Yeesu kaoh ŋɔ,

⁴⁴ “Bɛ nomɛlbwa be ŋɔ. Pa sie kaa Sɔfo be dɛ́ kpɔ he te ka baɡlo ó pɛne, asɛ hé kpɔ kwaa ka tɛo ó kpo, ɡɛ Mosis aa baɡla la, á baɡle kɛ he weela la toole he nɛɛ kpa.” Waa kaoh tonɛ la, o ɡelɔ o le kaa.

⁴⁵ Baa la aa lea la, o kpɔ waa la perɛ bobɛlbwa. A ɡelɔ Yeesu ta wone valɛ kɛrɛdɛ ɡɛ waa dɛ nyin kpa. Anomanta, bwɛɛ bɛlbwa waa la o ta la, ɡɛɛ o ka so bwɛɛ la dahara, asɛ nɛra le bobɛlbwa dɛ ba o be.