Mmarare 8 - mzwDBL

He bɛ Korowii waa soh

¹ Mosis berɔ ŋɔ, “Hé ɡel he sie chɔ harɛ hɛɛ teŋɛ Mmarare maa kpɔa tɛ heyaa fini nɔ ta kɛrɛdɛ. Ásɛ dɛ dɔ he nyu, hé mun ya dɛ́ won jo harɛ Korowii aa baɡɛ he naawa nyoa la ta dɛ́ kpɔ ɛ he kon.

² Hé lii ɡɛ Korowii haa dɛ tomɔ nɔ aa tɔ he sie ŋwɛnɛjaŋ pua hɛŋle ɡbo harɛ ta bene fifraanaarɛ bwa, dɛ daah heyaa na wekpeɡa ne, dɛ tɛr he deŋne he pwɛr he te la. Asɛ a che a ta o won jemɛ he bambili bini kɛ he dɛ teŋɛ o Mmarare waa do heya la ta, kɛɛ haa teŋɛ.

³ O ɡelɔ lɔr kpo heyaa he pwɛr he te, asɛ o tɛ heyaa kondikwaa ane baa dɛ yera maana la he di, kondikwaa he ne he naawa aa wola an jemɛ bwa. O ɛ ɡɛ dɛ ɡel he jemɛ kɛŋɔ kondikwaa ɡbo laa dɛɛ tɛ nɛn mkpa. Waa Korowii aa dɛ bol la bwa ɡe dɛ tɛ nɛn mkpa.

⁴ He vala bini bene fifraanaarɛ bwa ta la, he laala ta he bwara ta kɛɛrɛ á ba ɛ kɛŋɔ he nakpale ɛɛ darawoo.

⁵ Hé jemɛ kɛŋɔ, ɡɛ nɛwɛnyini aa dɛ tɛr o bie deŋne la, ɡɛɛ Korowii haa dɛ tomɔ ɡe ɛɛ ɛ heya.

⁶ Anomanta, hé teŋɛ waa la Korowii aa dɛ do heyaa la ta, dɛ́ kpɔ duure dɛɛ tɛo.

⁷ Korowii dɛ kaa he ne harɛpare ondɛɛɡe ta. Nenabɔɔne aa dɛ palɛ ɡboo o bwa. Neerare bulo dɛɛ le o ta, ɡɛɛ ane palɛ dɛɛ jo felembɔjena ta, ane ɡe palɛ dɛɛ kpɔ deŋɡarere dor.

⁸ Mea ne daa aa dɔ nɔna baa dɛ dia kɛŋɔ ɡrepore, ne fiɡ daa ne daa bɛl nɔna baa dɛ yera pɔmeɡranet ne ɔleve no, dɛ tohno ɡboo harɛ la bwa.

⁹ Kondikwaa ne komɛlbwa ɡe aa heyaa nya bela. Ba dɔ bune dɛɛ le bela bwea la ta, asɛ a deŋɡarere ɡe taa baa kwi suuɡa te bɛlbwa.

¹⁰ Dɛ he baa di kwaa dɛ vaɡre aa, hé kpɛɛ Korowii haa dɛ tomɔ nɔ, harɛpare ondɛɛɡe waa kpɔa tɛ heyaa la wa.

¹¹ Hé nyiŋi kɛrɛdɛ kɛŋɔ haa Korowii haa dɛ tomɔ la waa soh, dɛ́ ba vɛh o Mmarare maa kpɔa dɛɛ tɛ heyaa fini nɔ.

¹² He baa di kwaa dɛɛ vaɡre, dɛ do he dedɛɛɡa dɛ so a bini,

¹³ asɛ he nae ne peera ne suuɡapoŋa ne suuɡaswɛm dɛ komɛlbwa ya aa,

¹⁴ he bɛ he te maŋkura dɛ́ ba soh Korowii haa dɛ tomɔ o lawɛ heyaa le Ijipt harɛ ta somanjiri dii ta la wa.

¹⁵ Onee tɔ he sie dɛ kpɔ heyaa kpɔ pua hɛŋle ɡbo harɛ waa kana dɛ do ɔma, nyɔɡre ne hwel ne harɛkonchɔɡa, ne nɔrɔme aa lɔ o ta la. Onee ɡela nee le bwe ta dɛ tɛ heyaa he nyɔ la.

¹⁶ O tɛ heyaa maana he di pua hɛŋle ɡbo harɛ la ta, kondikwaa he naawa aa wola an jemɛ bwa. Nee ne kondikwaa nyae nɔɔ o kpɔ daah heyaa na, asɛ wobɛlbwa do wer tɛ heyaa he daahna dɛ na la habɔɔ.

¹⁷ Anomanta, he bɛ ba lii kɛŋɔ he ɡbaɡba kpeɡri ne he bokpeɡa taa a che he dɔ kwa.

¹⁸ Hé lii Korowii haa dɛ tomɔ la wa, dɛkalkɛŋɔ onee tɛ heyaa wejema he kondɔɔh dɔe ta. Anee ɡela o nyoa waa baɡɛ he naawa la chɔ le ba le fini la.

¹⁹ Hɛ́ɛ berɛ Korowii haa dɛ tomɔ la waa soeh, dɛ́ berɛ kaa tomɛ voɡare ane dɛɛ ɡuŋa. N dɛ ŋɔ he be fini kɛŋɔ, ate o fe ɛɛ kpoo heyaa,

²⁰ kɛŋɔ harɛre ane nɛra waa tɔ he sie dɛ kpoo ba la. Dɛ he ta o waa noɛ yaa, ɡɛɛ Korowii haa dɛ tomɔ nɔ ɛɛ ba heyaa ɛɛ.”