Mmarare 7 - mzwDBL

Korowii nɛra

¹ Mosis berɔ ŋɔ Israel tena la be ŋɔ, “Korowii haa dɛ tomɔ dɛ la he ne harɛ haa dɛ la ka so o ta ó ɛ he kon la ta naa, wɛɛ doŋi wobobele anuanɛ bwa nɛra baa kana dɛ do kpeɡri ɡwaa heyaa le ba harɛre ta tɛ heya. Banee Hiti ne Girɡasi ne Amɔre tena, ne Keenan ne Pɛrɛs ne Hivi dɛ Jebus tena.

² Dɛ Korowii laa nɔn kpɔ ba nɛɛ dɛ ɡel he pɔ ba nɛ aa, a chɛ kɛŋɔ hé kpoo ba kwaraa. Hé ne ba bɛ fɔo fɔwɛ, he bɛ ba sum ɡe na.

³ He bɛ ɡel he bihaahna yalɛ ba bibaala, dɛ bɛ ɡel he bibaala ɡe mo ba bihaahna.

⁴ Gɛ laa aa, baa berɛ he bii liiree baa wola Korowii nɛɛ teŋɛ, dɛ́ kaa tomɛ voɡa, ásɛ o baah di he nɛɛ dɛ́ den kpoo heyaa warane.

⁵ Waa aa chɛ kɛŋɔ hé ɛɛ ba laanee kɛŋɔ, hé paɡre bela baa kpoo kwaa dɛ fuah dɛɛ tɛ ba voɡare, dɛ́ kuuɡi bwea baa paaɡa dɛɛ duura la, dɛ́ teŋni voɡhaah Asera dajaŋa la ta, dɛ́ fuh ba voɡare.

⁶ Dɛkalkɛŋɔ he do ɡoroŋ dɛ tɛ Korowii haa dɛ tomɔ. Onee le heyaa cheɡ tɛ o te le harɛre nɛra bwa bini, dɛ kpɔ heyaa ɛ o nɛra he waa ɛɛ su o siwi.

⁷ Wara laa he warɛ Korowii koh a waa nyin heyaa dɛ le heyaa kɛ o nɛra, heyaa fe wola kanɛ kwaraa.

⁸ Nyina waa dɛ nyin heyaa la, ne o baɡa waa baɡɛ he naawa nyoa la waa o che o kpeɡri ta lɛ heyaa le Ijipt kooro nɔn ta ne somanjiri dii waa dɛ do heyaa a ta la ta.

⁹ Anomanta, hé jemɛ kɛŋɔ Korowii haa dɛ tomɔ nɔ, Dɔɔ bɛlbwa toole o habɔɔ. O waa dɔ kasinteŋ dɛɛ teŋɛ o fɔo waa fɔwa, dɛ kpɔ o nyina aa wola jaɡa dɔe baɡle banɔ la baa dɛ nyin o wa, dɛɛ teŋɛ o Mmarare ta la naanar bele kaɡboŋ baa ba lol ba la.

¹⁰ Kɛ banɔ la baa haoh la te, wɛ́ɛ tɛr ba deŋnee waa wola kpɔ hɛlɛ kwaraa.

¹¹ Anomanta, hé nyiŋi kɛrɛdɛ dɛ́ɛ teŋɛ Mmarare waa baɡle heyaa dɛ kpɔ tɛ heyaa fini nɔ ta.

¹² Dɛ he no ɡɛ waa nɔ dɛ teŋɛ a ta kasinteŋ ne naa, Korowii haa dɛ tomɔ ɛɛ teŋɔɔ dɛ́ kpoŋe o fɔo la bini, dɛ́ɛ nyin he waa ɡɛ waa ŋwɛɛra baɡle he naawa la.

¹³ Wɛɛ nyin heyaa dɛ́ swee heyaa andɛɛɡa, dɛ́ ɡel he mun ya kohona. Wɛɛ ɡeloo he loɡle, he kooni kwaa kɛŋɔ mea ne ɡrepore ne ɔlevere bwa do wer, ásɛ he kondɛɛra ɡe ya. A ɡɛ hɛɛra nɔ bwaa wɛɛ ba kpɔe tɛ heyaa harɛ la waa ŋwɛɛra baɡle he naawa ŋɔ wɛɛ kpɔɔ tɛ heyaa la ta.

¹⁴ Korowii ɛɛ swee heyaa andɛɛɡaa ɡwaa harɛ nɔ ta nɛra, bɛlbwa toole dɛ́ ɡwaa heyaa kondɔɔh ta, he bini baala ne haahna bɛlbwa toole waa wola lolɛ, hale he kondɛɛra kwara.

¹⁵ Korowii ɛɛ kpɔ nɔnee tɔ he nɛɛ dɛ́ le weela bɛlbwa ta. Waa ɡel weechɔɡa haa naa Ijipt harɛ ta la ba he nɛ. Nɛra baa hah heyaa la nɛɛ wɛɛ ba kpɔe ta.

¹⁶ Harɛre nɛra Korowii haa dɛ tomɔ la aa kpɔa do he nɔn ta la, hé chɔɡ ba bwa. He bɛ ba sum na dɛ́ tomɛ ba voɡare ɡe, a do kɛŋɔ bela dɛ́ lawɛ heya.

¹⁷ He bɛ dɛɛ bol kɛŋɔ, ‘Nɛra nɔ sii ya nɛ, ɛrɛɛ yaa ba ɛɛ dɛ́ won doŋ ba ɔ?’

¹⁸ He bɛ ban ɔmɛ, hé lii ɡɛ Korowii haa dɛ tomɔ aa ɛ Ijipt kooro ne o harɛ nɛra bwa la.

¹⁹ Hé lii hɔhɔrɔwa ne nyokpowaa ne kpeɡri, ne bokpeɡa Korowii haa dɛ tomɔ nɔ aa kpɔa ɛ Ijipt tena dɛ lawɛ heyaa le la. Gɛ tentenee wɛɛ ba nɛra haa dɛ ɔm ba taraken nɔ ɛɛ.

²⁰ Korowii haa dɛ tomɔ nɔ ɛɛ ɡeloo jeŋibotoola jo ba bini, hale dɛ́ kpoo ba bini banɔ la baa kaa sɔh dɛɛ lii kɛŋɔ ba dɔ ba nyu la kwara.

²¹ Anomanta, he bɛ ban ɔmɛ. Korowii haa dɛ tomɔ nɔ lɔ he baah ta, o kan o waa do ɔma kohona.

²² Tama tamaa Korowii haa dɛ tomɔ nɔ ɛɛ ba ba doŋa ta, haa ba bwa kerabeŋkpoŋii kpoo. A ba ɡɛ naa, kpɔɡ bini olchɔɡa ɛɛ warɔɔ dɛɛ aah heya.

²³ Korowii haa dɛ tomɔ nɔ ɛɛ laa nɔnee kpɔ ba nɛɛ dɛ́ ɡel ba wili, ásɛ he kpoo ba bwa.

²⁴ Ba koranar ɡe la, wɛɛ kpɔ baa do he lɔɡa, ásɛ he kpoo ba le harɛ nɔ ta ba waa tonɛ. Nomɛlbwa aa won che he sie, hɛɛ chɔɡ ba bwaa.

²⁵ Hé fuh ba voɡare, he bɛ ɡel he pɛla lawɛ suuɡapoŋa ne suuɡaswɛm aa lɔ a ta la ásɛ dɛ ba kpɔa, dɛkalkɛŋɔ a do kɛŋɔ bela, dɛ́ won lawɛ heya. Korowii haa dɛ tomɔ nɔ kii.

²⁶ Hɛɛ berɛ ɡɛ voɡare la bɛlbwa ne he deremi bala, ɡɛ laa aa, he ne a bwa ɛɛ cheo tɛ kɛŋɔ Korowii chɔɡ heya. A ɛ kondoŋa he kia, dɛkalkɛŋɔ Korowii lea cheɡ kɛŋɔ wɛɛ chɔɡaa.”