Mmarare 6 - mzwDBL

Korowii Mmarare la bini onjen

¹ Mosis berɔ ŋɔ, “Mmarare Korowii aa do mɛ ŋɔ ń baɡle heyaa laanee mɛɛ ba heyaa baɡla nɔ. Hé kaa do sie a ta, harɛ haa dɛ ba o ta kaala ka so la ta.

² Hé ne he bii ne naanar bwa ɔmɛ Korowii haa dɛ tomɔ nɔ, dɛ́ teŋɛ o Mmarare bwa maa kpɔa dɛɛ tɛ heyaa nɔ ta, ásɛ he won so biɡri.

³ Israel tena, hé noa dɛ́ kaa teŋɛ a ta, ásɛ a do wer kɛrɛdɛ dɛ́ tɛ heya. Anee dɛ́ ɡel hé ya kohona harɛpare ondɛɛɡe ta, ɡɛ Korowii he naawa aa tomɔ aa baɡɛ heyaa nyoa la.

⁴ Israel tena, hé no. Korowii yaa dɛ tomɔ habɔɔ, Dɔɔ bɛlbwa toole kpa.

⁵ Hé nyin Korowii he bambile bwa, he hweera ne he bokpeɡa bwa ne.

⁶ Mmarare nɔ maa kpɔa dɛɛ tɛ heyaa fini nɔ chɛ kɛŋɔ á do he bambili bini hɛ́ɛ teŋɛ a ta dɛ bɛ soh.

⁷ Hé kpɔa baɡle he bii. Hɛ́ɛ dalawe a ta, he dem soɡa bini ne ŋwɛnɛ bɛlbwa haa dɛ kaa, hale he chɔe ne he ira bini bwa.

⁸ Hé kpɔa ɛ kɛŋɔ nɔnloɡ do he nɔɔra, dɛ́ kpɔa vɔwɛ he tili ta ásɛ aa lii heya.

⁹ Hé chwera dawɛ he deene ɡbeni daa ne he deremi ɡbeni ta.”

Deŋnekpeɡ tena jae

¹⁰ Mosis berɔ ŋɔ, “Dɛ Korowii kpɔ heyaa ka tel harɛ waa baɡɛ he naawa, Abraham ne Aesek dɛ Jekɔb nyoa kɛ wɛɛ tɛ heyaa la ta, bwɛjena aa wera he laa vɔrɔwa,

¹¹ ne deene kondɛɛɡa aa sua he laa nyina do, ne buli haa wola an kwii, ne daa kooni ne ɔleve kooni he laa dua, asɛ he di kwaa dɛ vaɡɛ aa,

¹² hé nyiŋi kɛrɛdɛ dɛ bɛ Korowii waa soh. Onee le he ne Ijipt harɛ he fa aa di somanjiri o ta la.

¹³ Hɛ́ɛ duu Korowii dɛ́ɛ tomɛ o ɡbo, dɛɛ baɡɛ nyoa o sɔn ta.

¹⁴ He bɛ komɛlbwa nɛɛ teŋɛ dɛ tomɔ, he bɛ harɛre aa bar heyaa nɔ voɡare tomɛ.

¹⁵ Dɛkalkɛŋɔ Korowii haa dɛ tomɔ o do he baah ta nɔ dɛ mee. He ɛ ɡɛ naa, wɛɛ kpɔ o bandiaa ba chɔɡ heyaa kɛŋɔ nii ken le harɛ la ta.

¹⁶ He bɛ Korowii haa dɛ tomɔ daah na ɡɛ haa daahno na Maasa la.

¹⁷ Hé nyiŋi kɛrɛdɛ dɛ́ɛ teŋɛ mmarare waa kpɔa tɛ heyaa la bwa ta.

¹⁸ Hɛ́ɛ ɛ anɔ la Korowii aa ŋɔa a wer dɛɛ su o siwi, ásɛ a chiɡ heyaa kɛrɛdɛ he won lɛ harɛdɛɛɡe waa baɡɛ he naawa nyoa dɛ ŋwɛɛ o waa la wa,

¹⁹ dɛ́ doŋi he dɔma bwa he sie ɡɛ waa baɡɛ nyoa la.

²⁰ Kerekere dɛ he naanar bɔɔ heyaa ŋɔ, ‘Bɔkwa waa Korowii yaa dɛ tomɔ ŋɔ yaa teŋɛ Mmarare nɔ ta nɔɔ?’

²¹ He ŋɔ ba be ŋɔ, ‘Ya fa dɛ di somanjiri Ijipt kooro harɛ ta, asɛ Korowii che o kpeɡri ta dɛ le ya ne bela.

²² Ya siwi ta, Korowii ɡelɔ nyokpowaa ne wejena aa do ɔma kohona chole Ijipt harɛ ta, ne kooro ne o dem tena bwa nɛ.

²³ Kɛ ya te, o le ya ne bela dɛ ba tɛ yaa harɛ waa baɡɛ ya naawa nyoa ŋɔ wɛɛ kpɔɔ tɛ yaa la.

²⁴ Asɛ Korowii ŋɔ yáa teŋɛ Mmarare nɔ ta dɛ́ɛ duuru. Dɛ ya dɛ ɛ ɡɛ naa, aa chiɡ yaa kɛrɛdɛɛ ya dɔ mkpa ɡɛ yaa doa fini nɔ.

²⁵ Dɛ ya do sie Mmarare waa kpɔa tɛ yaa nɔ ta naa, anee dɛ́ ɡel o tea too ya nɛ.’ ”