Mmarare 5 - mzwDBL

Korowii Mmarare fi

¹ Mosis cheme Israel tena bwa dɛ ŋɔ ba be ŋɔ, “Hé no waa maa dɛ ba bola fini nɔ kɛrɛdɛ dɛɛ teŋɛ a ta. A ɛ Korowii Mmarare waa kpɔa tɛ heya.

² Sinai Bwejen taa Korowii yaa dɛ tomɔ ne ya fɔwɛ fɔo.

³ O ne ya naawa ɡbo laa fɔwɛ ɡɛ fɔo nɔ. O ne banɔ la baa lole ɡɛ saŋ dɛ́ kpoŋe ba le ya banɔ la yaa lole fini nɔ bwa nɛ.

⁴ Sinai Bwejen la doaa Korowii che nii ta bol waa he be he siwi ta.

⁵ Dɛ n cheɡɛ he ne Korowii baah ta ɡɛ saŋ dɛ baɡle heyaa o waa bini he ɔmɛ nii la. He ta bwe la teehnɛ. O bolɔ ŋɔ,

⁶ ‘Menee Korowii haa dɛ tom mɛ, n le he ne Ijipt harɛ ta somanjiri dii ta la.

⁷ He bɛ voɡ bɛlbwa tomɛ ka ja n nɛ.

⁸ He bɛ komɛlbwa waa lɔ nyundua kɛɛ harɛ ta, hale nee bini bɛlbwa chaa ɛ.

⁹ He bɛ an dɛɛ ɡuŋi a ba ɛ kɛŋɔ hɛɛ tomaa. Dɛkalkɛŋɔ menee Korowii haa dɛ tom mɛ la, n dɛ mee. N dɛ tɛr banɔ la baa hah mɛ deŋne. Hale dɛ́ kpoŋe ka tel ba naanar bele batoro kɛɛ banaarɛ baa ka ba la nɛ,

¹⁰ dɛɛ nyin banɔ la baa nyin mɛ dɛɛ teŋɛ men Mmarare ta la wa. Hale dɛ́ kpoŋe ka tel ba naanar bele kaɡboŋ nɛ.

¹¹ He bɛ men Korowii haa dɛ tom mɛ nɔ dɛɛ ŋwɛɛ wesale bɛlbwa ta. Mɛɛ tɛr naate waa dɛ ŋwɛɛ mɛ ɡɛ la deŋnee.

¹² Hé di Ona Tɔpere la, dɛ́ ɛo tɔpedɛɛɡe ó do ɡoroŋ, ɡɛ men Korowii haa dɛ tom mɛ nɔ aa do heyaa wubwa la.

¹³ Tɔpera anumɛlee he dɔ kɛŋɔ hé ɛ he toma bɛlbwa,

¹⁴ kɛ tɔpenuanɛte la ɛ Ona Tɔpere tɛ men Korowii haa dɛ tom mɛ. O telaa, he bɛ toma bɛlbwa ɛ o ta. He ne he bibaala ne bihaahna kɛɛ bonɔɔna, kɛɛ toli bɛlbwa bɛ toma ɛ. Hale he nae ne keeɡore, ne kondɛɛre te bɛlbwa, dɛ hɔɔhra kwaraa baa lɔ he deremi bɛ toma ɛ. Gɛ aa ɛ bonɔɔ kɛɛ tolo waa lɔ he sie la ɡe won dɔ bɔr onɛ ɡɛ haa dɛ onɛ la.

¹⁵ Hé ta sie dɛ́ na ɡɛ saŋ haa lɔ somanjiri dii ta Ijipt harɛ la, men Korowii haa dɛ tom mɛ nɔ cheɡɛ n kpeɡri ne n bokpeɡa ta dɛ lɛ heyaa le bela. A waa ɡela mɛɛ do heyaa ŋɔ hé di Ona Tɔpere la la.

¹⁶ Hé duu he nyare ne he mɛɛnanar, ɡɛ men Korowii haa dɛ tom mɛ la aa do heyaa la. Anee dɛɛ ba ɡela he dɔ mkpajaŋ, wobɛlbwa do wer tɛ heya harɛ maa kpɔa dɛɛ tɛ heyaa la ta.

¹⁷ He bɛ nɛn kpo.

¹⁸ He bɛ jwamane dɛɛ bɔ.

¹⁹ He bɛ dɛɛ ŋwɛ.

²⁰ He bɛ dansewea dɛɛ di.

²¹ He bɛ ɡel he dɔŋa haahna pɛla dɔ heya. He bɛ ɡel he sie beɡre he dɔŋa deremi, ba harɛre ne ba bonɔɔna kɛɛ toli, ba nae ne keeɡore, dɛ komɛlbwa aa ɛ ba kwa.’

²² A ɡɛ waa nɔɔ Korowii che nii ta dɛ bol takpeɡ ne baama aa bira kpirkpir bini bwe la ta he bwa be la, o ta wobɛlbwa kpɔe ja a ta ɡɛ saŋ. Dɛ chwera bwepɛle anɛ ta dɛ kpɔ tɛ mɛ.

²³ Haa no taa la le bwejen la bɔr bela nii la aa dɛ hɔ biro la ta la, he dea nomonnyuune dɛ nomonome baa jaa bwa ba n be,

²⁴ dɛ ba ŋɔ, ‘Korowii ɡelɔ ya na o jirima ne ɡɛ waa do kan, ya no o taa nii la ta. Fini ya nao kɛŋɔ Korowii bol waa nɛn be naa, naate ta won o nyu dɔe dɛ́ ta so le.

²⁵ Aah bɔkwaa ɡela ya berɛ jo seo ta jaɔ? Dɛ ya berɔ ba no Korowii taa ja aa, nidamanta aa do ɔma la dɛ ba yaa fuih ya serewe.

²⁶ Nɛwɛnyini besoo no Korowii waa lole saŋ bɛlbwa wobol le nii ta kɛ yan, dɛ ta dɔ o nyu dɛ so le nɔ?

²⁷ Hen Mosis, la dɛ́ ka no waa bwa Korowii yaa dɛ tomɔ aa dɛ ba bola, dɛ́ ba ŋɔ ya be. Yaa noo dɛɛ teŋɛ a ta.’

²⁸ Korowii no ɡɛ haa bola la dɛ ŋɔ, ‘N no ɡɛ nɛra la aa bol he be la, anɔ la bwa baa bola la wer.

²⁹ Dɛ ba pɛla fe ɛɛ lawɔɔ saŋ bɛlbwa dɛɛ duu mɛ, dɛɛ teŋɛ n waa bwa ta naa, ba ne ba naanar wobɛlbwa fe ɛɛ maɡroo tɛɛ ba.

³⁰ La ka ŋɔ ba be ŋɔ, bá berɛ ka jo ba tɛnte deene bini.

³¹ Ásɛ a ka n ne hen Mosis ɡbo bonɔ, ásɛ n bol men Mmarare ne waa maa dɛ ba ban doe a ta bwa la he be, ka bol baɡ ba ásɛ ba kaa ɛa harɛ maa kpɔa tɛɛ ba ŋɔ bá ka so o ta la ta.’ ”

³² Asɛ Mosis ŋɔ ba be ŋɔ, “Hé nyiŋi kɛrɛdɛ dɛɛ ɛ waa Korowii yaa dɛ tomɔ aa dɛ bol he be nɔ. He bɛ sie laa kpɔ a ta.

³³ Waa Korowii aa do heyaa a ta la taa chɛ kɛŋɔ hé do sie, ásɛ dɛ dɔ he nyu á chiɡ heyaa kɛrɛdɛ, dɛ́ dɔ mkpajaŋ harɛ haa dɛ la ka so o ta la.”