Mmarare 4 - mzwDBL

Mosis ŋɔ Israel tena pwɛr ba te teŋɛ Korowii waa ta

¹ Ate, Mosis ŋɔ Israel tena la be ŋɔ, “Hé no Mmarare bwa maa dɛ ba heyaa baɡla nɔ. Hé teŋɛ a ta dɛ́ dɔ he nyu ásɛ dɛ ka kpɔ harɛ Korowii he naawa aa tomɔ aa kpɔa dɛɛ tɛ heyaa la.

² He bɛ wobɛlbwa kpɔ ja waa maa do heyaa a ta la ta, he bɛ ane ɡe laa kpɔ. Hé lawɛ Korowii haa dɛ tomɔ waa maa kpɔa dɛɛ tɛ heyaa nɔ bini.

³ Hé ɡbabir na ɡɛ Korowii aa ɛa Peɔ Bwejen ta siwi ne. O kpoo he bini banɔ la baa dɛ tomɛ voɡ Baal la.

⁴ Kɛ he banɔ la haa kpɔ he te pɛl Korowii haa dɛ tomɔ la te ta lole fini.

⁵ Hé na, n baɡle heyaa Mmarare bwa ɡɛ Korowii maa dɛ tomɔ aa ŋɔ n be la, ásɛ he ɡe kaa teŋɛ a ta harɛ haa dɛ la ka kpɔ ó ɛ he kon la ta.

⁶ Hé noa kɛrɛdɛ dɛɛ teŋɛ a ta. Anee dɛɛ ba ɡela harɛre nɛra no he waa kɛŋɔ he ɛ wejerema. Dɛ ba no Mmarare nɔ naa, ba ŋɔ ɡɛ nɛra baa dɔ sɔn kohona nɔ ɛ wejerema dɛɛ no waa mun.

⁷ Harɛ besoo nɛraa lole dɛ dɔ sɔn kohona, dɛ dɔ voɡ o bɛn ba dɛɛ no ba be ɡɛ Korowii yaa dɛ tomɔ aa bɛne yaa dɛɛ no ya wesoŋa nɔɔ?

⁸ Harɛ bɛlbwa ɡe toole, hale o ne o sɔn dɔe bwa, dɛ dɔ mmarare aa toɡra kɛŋɔ anɔ nɔ maa dɛ dalwe a ta nɔ bwa.

⁹ A bwaa kɛŋɔ hé nyiŋi kɛrɛdɛ dɛ́ ɡel he sie chɔ harɛ, hɛɛ berɛ waa haa naa la soeh. Hé bola baɡle he bii ne he naanar.

¹⁰ Gɛ saŋ haa cheɡɛ Korowii haa dɛ tomɔ sie Sinai Bwejen ta asɛ o ŋɔ n be ŋɔ, ‘Yerɛ nɛra la bwa ba cheme n sie bá ba no n waa dɛ́ jemɛ ɡɛ baa duu mɛ. Gel ba ka so harɛ la ta bwa dɛ́ bol baɡle ba bii ne ba naanar ba ɡe ɛɛ teŋɛ a ta.’

¹¹ Hé bol ba be ɡɛ chuu kohona ne baama aa bira kpirkpir ane aa tɔa, ninlao ɛɛ hɔ a bini dɛɛ kaa nyundua, ɡɛ saŋ he fa aa cheɡɛ bwejen la lɔɡa la wa,

¹² ne ɡɛ haa no Korowii taa nii la ta wɛɛ bol waa he be, kɛ dɛ haa on na la wa.

¹³ O bol he be he ne o fɔo la ta teŋa wa. Mmarare fi waa chwera dawɛ bwepɛle anɛ ta dɛ ŋɔ hɛ́ɛ teŋɛ a ta la.

¹⁴ Korowii ŋɔ n be ɡɛ saŋ ŋɔ ń baɡle heyaa Mmarare aa chɛ kɛŋɔ hé teŋɛ a ta harɛ haa dɛ la ka le Jɔɔdan Moo la dɛ́ ka lɛ so o ta la wa.”

Voɡa toma jae wa

¹⁵ Anee Mosis berɛ ŋɔ, “A ɡɛ saŋ haa no Korowii taa nii la ta Sinai Bwejen ta la, he ta komɛlbwa nae, anomanta, he nyiŋi kɛrɛdɛ,

¹⁶ ásɛ he pɛla bɛ wechɔɡa ba lawɛ dɛ́ sɛh komɛl o le nɛn kɛɛ haah,

¹⁷ kɛɛ ol waa lɔ harɛ nɔ ta, kɛɛ jumbii aa dɛ ɡah,

¹⁸ ne kwaa aa dɛ tuuɡi tea ta ne anɔ la aa dɛ huuh kɛɛ pɛŋe te bɛlbwa soo siwi dɛɛ tomɔ.

¹⁹ He bɛ ɡel he pɛla ba lawɛ kwaa aa lɔ nyundua kɛŋɔ wee ne korobie ne weweela, ásɛ he ba duura dɛ́ toma. Harɛre ane nɛraa Korowii ŋɔ baa toma, he te laa.

²⁰ He te la, Korowiirii kpɔ heyaa le Ijipt harɛ bela waa do wɔrɔbe he nɛɛ kɛŋɔ bela loɡre aa dɛ do buni wɛɛ be la, dɛ ŋɔ hé ba ɛ o ɡbaɡba nɛra ba le fini la.

²¹ He waa ɡela Korowii baah di n nɛɛ o ŋwɛɛ ŋɔ, maa Jɔɔdan Moo la baŋ waa wera o kpɔ dɛɛ tɛ heyaa la taa la la.

²² Mɛɛ sewɛ harɛ nɔ taa, maa Jɔɔdan Moo baŋee le. Heyaa dɛɛ ba he le dɛ́ ka so bela harɛdɛɛɡe ompare la ta ó ɛ he kon.

²³ Hé nyiŋi kɛrɛdɛ dɛ bɛ fɔo he ne Korowii aa fɔwa la waa soh. He bɛ komɛlbwa kwaa dɛ tomɔ ɡɛ Korowii aa do heyaa la.

²⁴ Korowii do kɛŋɔ ninlao ken dɛɛ chɔɡ kwa, o dɛ mee. Anomanta, he Israel tena ne waa won pɛ dɛ he ɡelo dɛ kaa tomɛ voɡaa.

²⁵ Dɛ he kaa so harɛ la ta biɡri dɛ loɡle bii ne naanar aa, he bɛ ɡel he pɛla ba dɔ voɡa toma he ɛ wechɔɡa. A ɛ wechɔɡa Korowii be, dɛ ɡel o baah ɛɛ di.

²⁶ Harɛ ne nyundua ɛ n danseɛ fini, dɛ he kaa ɛ deŋnekpeɡ n waa nɔ ta harɛ haa dɛ ba Jɔɔdan Moo lee dɛ́ ka so o ta la ta naa, hee hɛɛ ba hee le harɛ la ta. Haa belaa so biɡri, he bwa ɛɛ heo kwaraa.

²⁷ Korowii dɛ́ ba heyaa lɔe peɡre ja harɛre ta, he bini tama banee dɛ́ ba ka.

²⁸ Bela haa ka so la te, hɛɛ tomɛ voɡa nɛwɛnyini aa ɛa, daa ne bwea aa wola na, aa waa no, aa kwaa di aa wola sɔɔh ɡe no.

²⁹ A tel belaa, hɛɛ dɛɛ ɡaaɡe Korowii bɔree dɛ́ nao, dɛ he dɛ nyin o bɔr he bambile bwa ne he hweera bwa ne naa, hɛɛ nao.

³⁰ Dɛ ɡɛ wahala nɔ bwa ba he nɛ aa, he siwi ɛɛ beɡroo ásɛ he ba Korowii be dɛ́ baa duuru.

³¹ O dɛ na nɛn sum, waa nɔnee laa kpɔ he nɛɛ bwa á ba ɛ kɛŋɔ wɛɛ chɔɡ heyaa. Waa fɔo o ne he naawa aa fɔwa o ŋwɛɛ o waa laanee soh bwa.

³² Hé ta sie nyiŋi waa aa bala mɔɔ ba lolɛ heyaa la. Dɛ́ berɛ le ɡɛ saŋ Korowii aa ta nɛn ba harɛ nɔ ta la na. Hé ta sie nyiŋi harɛ nɔ bwa ta, waane aa do kan ɡwaa anɔ dɔŋ chiɡo kɛɛ he no a dɔŋa kaa?

³³ Nɛra bane ɡe no Korowii taa nii ta ɡɛ haa noa nɔ dɛ ta so le naa?

³⁴ Voɡ bɛl wono che nyokpowe-ɛɛla ta dɛ lawɛ o nɛra le nɛra bane harɛ ta, ɡɛ Korowii aa ɛa tɛ heyaa ɡɛ saŋ haa lɔ Ijipt harɛ ta la kaa? O cheɡɛ o kpeɡri waa kana kohona la ne hɔhɔrɔwa ne laa ne nyokpowe-ɛɛla dɛ waa aa do ɔma ta, dɛ lawɛ heyaa le.

³⁵ Korowii cheɡɛ anɔ ta dɛɛ baɡle heya ásɛ he jemɛ kɛŋɔ nomɛlbwa toole dɛ do kɛ on.

³⁶ O ɡelɔ he no o taa dɛ le nyundua, dɛ chaɡle heyaa anɔ la aa chɛ kɛŋɔ hé ɛ. Dɛ ɡel he na o nii waa dɛ lawɛ kohona harɛ nɔ ta, asɛ dɛ ɡel he no o taa le nii la ta.

³⁷ Nyina waa dɛ nyin he naawa nomanta, o le heyaa tɛ o te dɛ che o kpeɡri kohona waa dɔa ta dɛ ɡbaɡba ja he nɛɛ dɛ le he ne Ijipt harɛ ta.

³⁸ O doŋi nɛra le ba harɛre ta, banɔ la baa kana dɛ do kpeɡri ɡwaa heya, dɛ kpɔ tɛ heyaa kɛŋɔ kapɛrɛ kwa, ɡɛ aa doa fini nɔ.

³⁹ Anomanta, hɛ́ɛ lii dɛ bɛ soh kɛŋɔ Korowii dɛ di kora nyundua ne harɛ ta bwa, komɛlbwa toole dɛ ka ja Korowii nɛ.

⁴⁰ Hɛ́ɛ teŋɛ o Mmarare bwa maa dɛ bol he be fini nɔ ta, ásɛ a do wer tɛ he ne he bii ne naanar baa ka ba, ásɛ he won so harɛ waa kpɔa dɛɛ ba heyaa tɛɛ la ta saŋ bɛlbwa.”

Bwɛjena nɛra aa ka so a ta dɛ́ dɔ ba nyuune

⁴¹ Ate, Mosis laa bwɛjena atoro ane le cheɡ a do Jɔɔdan Moo la baŋ wee leebɔr,

⁴² ásɛ dɛ nomɛl baa koni kpo nɛn dɛ o dɔm laa wubwa naa, ó chwa kaa bɛl ta ka so dɛ́ dɔ o nyu.

⁴³ A ɡɛ bwɛjena laanee, Bɛsa waa lɔ pua hɛŋle ɡbo harɛ waa chɔa kaa la ta dɛ le Rubin dea harɛ ta, ne Ramɔt waa lɔ Gelead harɛ ta dɛ le Gad dea harɛ ta, dɛ Golan o ɡe aa lɔ Basan harɛ ta dɛ le Manasɛ dea tena harɛ ta.

Korowii Mmarare waa kpɔa tɛ Israel tena

⁴⁴ Mosis kpɔ Korowii Mmarare ne o webaɡla bil Israel tena la sie.

⁴⁵ Anee ɛ webaɡla ne Mmarare Korowii aa kpɔa tɛɛ ba a ɡɛ saŋ baa le Ijipt harɛ ta ba habɔɔ,

⁴⁶ dɛ ba lɔ Fɛlembɔjen bɛl waa chɔ Jɔɔdan Moo wee leebɔr dɛ bɛne Bɛt Peɔ. Amɔre Kooro Sihon fa aa di kora Hɛsbɔn asɛ Mosis ne Israel tena le Ijipt harɛ ta ba yoo dɛ pɔ o nɛɛ la harɛ.

⁴⁷ O ne Basan Kooro Ɔɡ ba bwa aa ɛ Amɔre tena koranar dɛ do Jɔɔdan Moo la wee leebɔr la harɛree ba lɛ.

⁴⁸ Harɛ la chɔɔ le Aanɔn Fɛlembɔjen la doa bwɛɛ Arowa ta dɛ ka le Sereɔn Bwejen baa bera dɛɛ yerɔ Hɛmɔn la ta,

⁴⁹ ne harɛ waa chɔ Jɔɔdan Moo baŋ wee leebɔr bwa ka tel weekaŋle harɛbɔr Yar Mpo ta dɛ kaa Pesɡa Bwejen la lɔɡa.