Mmarare 34 - mzwDBL

Mosis seo wa

¹ Mosis berɔ le Moab deŋɡarere dor harɛ waa chɔa kaa la ta, dɛ ka teeh Nɛbo Bwejen dɛ kaa Pesɡa Bwejen doa. Jeriko lɔ Jɔɔdan Moo la baŋ wee cholibɔr. Asɛ Korowii baɡlo harɛ waa kpɔ Israel tena dɛɛ ba o ta la bwa. O nao le Gelead dɛ kpoŋe ka le weekaŋle nyunduabɔr harɛ waa kpɔa tɛ Dan dea tena la,

² ne Naftale ne Efrem ne Manasɛ dɛ Juda deene harɛ, dɛ kpoŋe kaa Mɛdetereenea Mpo la ta wee cholibɔr.

³ Korowii berɔ baɡlo harɛ la tenten waa chɔa kaa Nɛɡɛv weekaŋle harɛbɔr Jeriko Fɛlembɔjen, dɛ ka le bwɛɛ Soar harɛ ta.

⁴ Dɛ ŋɔ Mosis be ŋɔ, “Harɛ nɔɔ n kpɔ baɡɛ Abraham ne Aesek dɛ Jekɔb nyoa, ŋɔ mɛɛ kpɔɔ tɛɛ ba naanar la. N ɡelɔ hɛɛ nao te, kɛ maa ɡel he tel o ta.”

⁵ Anomanta, Korowii bonɔɔ Mosis sewɛ Moab harɛ ta bela ɡɛ Korowii aa ŋɔa waa ɡel o la harɛ la ta la.

⁶ Korowii huɡo fɛlembɔjen bɛl waa lɔ Moab harɛ ta, bwɛɛ Bɛt Peɔ sideŋ. Kɛ le ɡɛ saŋ dɛ ba le fini nomɛlbwa aa bela yiso o ŋwam aa chɔa jemɛ.

⁷ Dɛ Mosis dɔ bene lafa fifraanɛ mɔɔ dɛ sewɛ, kɛ dɛ o bwara ta kpeɡri ɡɛ o fa aa doa, asɛ dɛɛ na ɡe kɛrɛdɛ.

⁸ Israel tena la ɛ o lwe tɔpera fifraatoro Moab harɛ waa chɔa kaa la ta.

⁹ Nun bibaa Josua ɡe dɔ wejema kɛrɛdɛ, dɛkalkɛŋɔ dɛ Mosis leo ŋɔ ó chiɡ o naa ta. Dɛ Israel tena la dɛ teŋɛ waa Korowii aa cheɡɛ Mosis nɛɛ dɛ kpɔ tɛ Josua la ta dɛɛ no o be.

¹⁰ Mosis habɔɔ la, Korowii keame bɛlbwa ta berɛ le Israel kɛŋɔ on kpa, dɛkalkɛŋɔ dɛ o ne Korowii dɛ bol wa.

¹¹ Korowii ta o keame bɛlbwa ɡe nɛɛ cheɡɛ dɛ ɛ nyokpowaa kɛŋɔ anɔ la waa ɡela Mosis ɛa Ijipt kooro ne o nɛra baa chɔ o harɛ nyoa, ne Ijipt harɛ la bwa ta la.

¹² Gɛɛ Korowii keame bɛlbwa aa wola wone ɛ wejena ne waa aa do ɔma kɛŋɔ Mosis aa ɛa Israel tena la siwi ta la.