Mmarare 33 - mzwDBL

Mosis swee andɛɛɡa tɛ Israel deene

¹ Gɛ Mosis waa ɛ Korowii nɛn aa swee andɛɛɡa tɛ Israel tena mɔɔ dɛ sewɛ laanee nɔ.

² O ŋɔ, “Korowii le Sinai Bwejen ta ba ya be, o ɛɡɔ le Edom kɛŋɔ wee ken, dɛ́ chaah o nɛra nɛɛ Paran bwe ta. Nyundua toroma kaɡboŋa fi ja o nɛ, ninlao do o diɡ bɔr.

³ Kpelaa, Korowii dɛ nyin o nɛra, dɛ kpɔ nɔn dɛɛ tɔ banɔ la baa lɔ o be pera nɛ. Ba bwa ɛɛ ɡuŋi he siee dɛɛ no he wa.

⁴ Ya dɛ teŋɛ Mmara Mosis aa kpɔa tɛ yaa la ta, o ɛ ya harɛ nɔ kpaŋjoɡo yaa dɔa.

⁵ Korowii ɛ Israel tena Kooro ɡɛ saŋ Israel deene ne ba nomonome fa aa chema la.

⁶ Mosis bol Rubin dea tena waa ŋɔ, ‘Korowii ɡel Rubin dea tena bɛ he, a lole kɛŋɔ baa kanɛ te.’

⁷ O bol Juda dea tena ɡe waa ŋɔ, ‘N Naa Korowii, no ba wii baa wia dɛɛ nyin chae. Gel ba ne deene aa kaa la dɔ nyopɛo. Yo tɛɛ ba, ásɛ ba le ba dɔma nɔn ta.’

⁸ O bol Lewi dea tena ɡe waa ŋɔ, ‘N Naa Korowii, he cheɡɛ he nɛndɛɛɡa Lewi dea tena nɛ Urim ne Tumim ta, dɛ pili ɡɛ haa dɛ nyin baɡ ba, dɛ daah ba na Maasa, asɛ dɛ baɡle kɛŋɔ ba ɛ kasinteŋ tena Mɛreba nee ta.

⁹ Banee lawɛ he waa bini kpoŋe ɡwaa ba nyare ne mɛɛnanar, ne ba dɔɔranar kɛɛ biirere. Ba teŋɛ he waa ta dɛɛ di kasinteŋ he fɔo he ne baa fɔwa la ta.

¹⁰ Báa dɛɛ baɡle he nɛra he Mmara ta teŋa taa, dɛ́ kpoo jam kwaa dɛɛ tɛɛ he saraha kon la ta.

¹¹ N Naa Korowii, ɡel ba dea tena do kpeɡri. Gel ba wobɛlbwa baa dɛ ɛ su he siwi. Chɔɡ ba dɔma dɛ bɛ ɡel ba ir kpa bwa.’

¹² Bɛnjamen dea tena ɡe, o bol ba waa ŋɔ, ‘Dea nɔ tenaa Korowii ɛɛ nyin, dɛ kpɔ nɔn dɛɛ tɔ ba nɛ. O dɛ nyiŋi ba nɛɛ tɔpere bɛlbwa, dɛɛ do ba baah ta.’

¹³ O bol Josef dea tena ɡe waa ŋɔ, ‘N Naa Korowii, ɡel bwaala nɛ ba harɛ ta o do wer. Ásɛ nee bule dɛɛ le harɛ bini ó do sɔne.

¹⁴ N Naa Korowii, ɡel wee lɔ ásɛ ba harɛ daa nɔna do wer. Saŋ bɛlbwa ɡel daa nɔndɛɛɡa do ba harɛ ta.

¹⁵ N Naa Korowii, ɡel ba dɔ kwaa baa di le bwea aa lole le saŋ la ba le fini la lɔɡre.

¹⁶ Tɛɛ ba harɛ kondɛɛɡa aa lɔ o ta. N Naa Korowii, he fa bol waa le dawii aa dɛ lawɛ nii Sinai Bwejen ta, asɛ wedɛɛɡa su he bwa. Gel Josef dea tena na som, dɛkalkɛŋɔ onee dɔɔranar la bwa sitɔɔ.

¹⁷ O kpeɡri kɛŋɔ nabal ken, o nyeɡlare do kɛŋɔ kpɔɡ bini nao. O nyeɡlare laanee Manasɛ dea nɛra kaɡboŋ bokpeɡa, Efrem dea nɛra ɡe kaɡboŋa fi bokpeɡa. A nee wɛɛ chuɡe harɛre nɛra, dɛ taɡ ba kaa tel harɛ jaɡa.’

¹⁸ Dɛ berɛ ŋɔ, ‘N Naa Korowii, ɡel Sebulon dea tena do wer bona baa ɡaaɡa dɛɛ di ta, ásɛ Isaaka dea tena ɡe kondɔɔh do kan bela baa soɡa.

¹⁹ Baa yerɛ hɔɔhraa dɛɛ ba bwejen baa ɛ saraha aa wera dɛɛ tɛɛ la ta. Baa dɔ kondɔɔh le mpo ne o nyoa hɛŋle taa.’

²⁰ Dɛ ŋɔ Gad dea tena be ŋɔ, ‘Korowii ɡel he dɔ harɛ kohona. Anomanta, hé kpɛɛro. He dea nɔ do kɛŋɔ nyujente waa dɛ toɡri ola nɔɔra ne nyuune.

²¹ Ba kpɔ harɛ la bodɛɛɡe, nomombɔree ba kpɔ. Ba teŋɛ Korowii waa ne o Mmarare ta, ɡɛ saŋ Israel nomonome fa aa chema la.’

²² Dan dea ɡe la, o ŋɔ, ‘Dan dea tena do kɛŋɔ nyujente bie. O jaoh le Basan harɛ.’

²³ Naftale dea ɡe, o ŋɔ, ‘Korowii ɡelɔ he na som taeh. He kpɔ harɛ waa chɔa le Galilia Moo weekaŋle harɛbɔr.’

²⁴ O ŋɔ Aasa dea tena ɡe be ŋɔ, ‘Korowii ɡel he waa su siwi he bala bwa bini, Korowii ɡel he harɛ do wer tɛ ɔleve daa.

²⁵ Gel ba kpɔ bune kaɡre ba bwɛɛre doonyoo a do kpeɡri. Bɛ ɡel wechɔɡa bɛlbwa ba ba nɛ.’

²⁶ O ŋɔ Israel tena be ŋɔ, ‘Nomɛlbwa toole dɛ do kɛŋɔ Korowii haa dɛ tomɔ nɔ. O lɔ nyundua kohona dɛ che o kpeɡri ta bol dɛɛ tɛ heya. O cheɡɛ baama ta dɛ baa cha heya.

²⁷ Korowii waa lole saŋ bɛlbwa dɛ lɛ heya, o nɔn waa do kpeɡri laanee o kpɔ dɛɛ cha heya. Wɛɛ doŋi he dɔmaa le he sie dɛɛ ŋɔ, “Hé chɔɡ ba!”

²⁸ Anomanta, Jekɔb naanar, bosɔɔhna taa hɛɛ ba soɡa. Harɛ mea ne sen aa lɔ o ta asɛ mɛn ɛɛ ta dɛɛ pwe harɛ la.

²⁹ Israel tena, he na som to. Nomɛlbwa ta heyaa tele, he ɛ nɛra Korowii aa lɛ heya. O ɡbaɡbaa he ɡbemɡbe ne he tokobi. Onee dɛ́ lɛ heya dɛ́ ɡel he yo le. He dɔma ɛɛ ba ɡuŋi he siee, dɛɛ soŋe ŋɔ he sune ba nɛ, ásɛ he tiɡri ba nɛ.’ ”