Mmarare 31 - mzwDBL

Josua baa chiɡ Mosis naa ta

¹ Mosis teŋɔ dɛ bol waa baɡle Israel tena ja.

² O ŋɔ, “Taraken n di bene lafa fifraanɛ, maa won tɔ he sie kpa. Anɔ bwa habɔɔ la, Korowii ŋɔ n be ŋɔ, maa Jɔɔdan Moo baŋee le.

³ Korowii haa dɛ tomɔ nɔ ɡbabir ɛɛ tɔ siee, dɛ́ ka chɔɡ harɛre aa lɔ bela la nɛra, ásɛ mɔɔ he won dɔ bɔr dɛ́ ka so ba buɡ ta. Korowii ŋɔ Josua ɡe tɔ he sie.

⁴ Gɛ Korowii aa chɔɡ Sihon ne Ɔɡ baa ɛ Amɔre koranar ne ba harɛ la, ɡɛ tentenee wɛɛ ba ɡɛ nɛra la ɡe ɛɛ.

⁵ Wɛɛ ɡeloo he pɔ ba nɛ, ásɛ dɛ ɛɛ ba ɡɛ n fa aa ŋɔ he be la.

⁶ Hé che kiŋkiŋ, he bɛ ɔmɛ. Korowii haa dɛ tomɔ nɔ ɡbaɡba ɛɛ che he mun taa. Waa he jwɛɛh le, waa heyaa ta.”

⁷ Ate, Mosis yerɛ Josua dɛ bol o be Israel tena la bwa siwi ta ŋɔ, “Che kiŋkiŋ, bɛ ɔmɛ, dɛkalkɛŋɔ henee dɛɛ ba nɛra nɔ sie tɔe, dɛ́ kpɔ ba ka so harɛ Korowii aa kpɔa baɡɛ ba naawa nyoa la ta.

⁸ Korowii ɛɛ tɔ he siee dɛ́ ja he nɛ, anomanta, bɛ ɡel he bwara hwah, bɛ ɔmɛ.”

Korowii Mmara la kura

⁹ Ate, Mosis chwerɛ Korowii Mmara la dɛ kpɔ do Lewi dea tena baa ɛ sɔfore la ne Israel nomonome la nɔn ta. Sɔfore laanee dɛɛ nyiŋi Korowii Ne Nɛwɛnyina Fɔo Daka o ne Israel tena fɔo baa fɔwa ba chwerɛ dɛ kpɔ do o bini la ta.

¹⁰ Mosis do ba ŋɔ, “Bene anuanɛ bɛlbwa ɡɛ he yon kpɔ nɛra baa di kema dɛɛ kɛ ba la, dɛ a telo hɛɛ ba he tɔpejen haa dɛ yerɔ Kukure Tɔpejen la dii yaa, hé kuro a le baŋ kohona a ɡɛ tɔpere la ta,

¹¹ ɡɛ saŋ Israel tena nɔ bwa aa ba cheme bela Korowii aa lea tɛɛ ba ŋɔ baa tomɔ la.

¹² Gel harɛ la ta baala, ne haahna, ne bechale dɛ hɔɔhra baa lɔ he bwɛɛre la ta bwa cheme dɛ́ no, dɛ́ hweli Korowii duura, dɛɛ teŋɛ o webaɡla ta kɛrɛdɛ.

¹³ A ɡɛ ŋwɛnɛ nɔ taa he naanar baa wola Korowii haa dɛ tomɔ nɔ waa noɛ bwa la che dɛ́ no. Ásɛ dɛ jemɛ waa la ta teŋa harɛ baa dɛ ba Jɔɔdan Moo ɡala dɛ́ ka so o ta la ta.”

Korowii bol Israel tena deŋnekpeɡ wa

¹⁴ Ate, Korowii ŋɔ Mosis be ŋɔ, “Tɔpere waa kaa he sewɛ la aa kanɛ kpa, anomanta, yerɛ Josua ba n Dea Cheremibɔr nɔ bini, ásɛ n kpɔ n waa bwa do o nɔn ta.” Anee Mosis ne Josua la Korowii Dea Cheremibɔr bela.

¹⁵ Asɛ Korowii che bam waa do jaŋne kaa nyundua bini, dɛ ba ba be dɛ ba che doonyoa bela.

¹⁶ Asɛ dɛ ŋɔ Mosis be ŋɔ, “Aa biɡri bɛlbwa ásɛ he chɔ he banɔn ta. A ba ɡɛ naa, nɛra haa tɔ ba sie nɔ ɛɛ chɔɡ fɔo n ne baa fɔwa laanee. Baa le n habɔɔ, dɛ́ ka tomɛ harɛ baa dɛ ba o ta joe nɔ voɡaa.

¹⁷ A ba ɡɛ naa, n baah ɛɛ di ba nɛɛ, ásɛ n laa sie kpɔ ba nɛ ba chɔɡ. Wechɔɡa ne wahala ɛɛ ba ba nɛɛ taeh, ásɛ ba sɛh ŋɔ, ‘Waa nɔ aa pu yaa nɔ, Korowii ya fa aa dɛ tomɔ la laa nɔn kpɔ ya nɛ.’

¹⁸ Awola tɔpere la, mɛɛ laa sie kpɔ ba nɛ, waa baa ɛa a ɛ wechɔɡa kɛŋɔ baa bera kaa tomɛ voɡa la wa.”

¹⁹ Korowii ŋɔ Mosis ne Josua be ŋɔ, “N dɛ ba heyaa yel baɡla, he chwerɛ bil, dɛ́ kpɔ baɡle Israel tena, ásɛ a ɛ waa dɛ́ chɔ tɛɛ ba.

²⁰ Dɛ ŋɔ, Mɛɛ kpɔ baa kaa harɛpare ondɛɛɡe maa baɡɛ ba naawa o waa la ta. Baa dɔ kondikwaa bɛlbwa baa dɛ nyinii dɛ́ di ba bwara sɔɔh ba. Kɛ ane a bwa, baa ka le n habɔɔ, dɛ́ ka tomɛ voɡa. Baa vɛɛh mɛɛ dɛ́ chɔɡ fɔo n ne baa fɔwa la.

²¹ Ásɛ wekpeɡa ba ba nɛɛ taeh, kɛ ba taa teŋɔɔ dɛ́ ɡo yel la, ásɛ a ɛ waa dɛ́ chɔ tɛɛ ba. Taraken kwara, n jemɛ liire baa dɛ lii mɔɔ mɛɛ ba ba ne harɛ maa baɡ ba nyoa la ta kaala.”

²² Awola tɔpere la, Mosis chwerɛ yel la dɛ baɡle Israel tena la.

²³ Josua mɛɛ sɔne Nun. Korowii ŋɔ, “Josua, che kiŋkiŋ, bɛ ɔmɛ. Mɛɛ ja he nɛɛ dɛ́ ɡel he tɔ Israel tena sie, dɛ́ kpɔ ba kaa harɛ maa baɡ ba nyoa la ta.”

²⁴ Mosis chwerɛ Korowii Mmarare la do tɔn ta tonɛ, dɛ nyiŋi kɛrɛdɛ kɛŋɔ o ta wobɛlbwa ɡelɛ.

²⁵ Waa tona la, o ŋɔ Lewi dea tena baa ɛ sɔfore dɛɛ nyiŋi Korowii Ne Nɛwɛnyina Fɔo Daka la ta be ŋɔ,

²⁶ “Hé lɛ tɔn nɔ, Korowii Mmarare lɔ o ta. Hé kpɔ bil O Ne Nɛwɛnyina Fɔo Daka nɔ jwɛh, ásɛ o do bela dɛɛ lii ba ɡɛ baa so kɛrɛdɛ.”

²⁷ Mosis ŋɔ sɔfore la be ŋɔ, “N jemɛ he lwɛmkpeɡ ne he habɔɔ bera dɛ́ kpo Korowii wa. Hale n ne haa lole n ta sewɛ mɔɔ nɔ, he fa berɛ habɔɔ kpo Korowii. Hɛ́ɛ ɛo ɡwaa ɡɛ n seo habɔɔ.

²⁸ Anomanta, he yerɛ he deene la nomonome, ne banɔ la baa chɔ he nyoa ba cheme n sie, ásɛ n bol waa nɔ bwa tɛɛ ba, dɛ́ yerɛ nyundua ne harɛ a chɔ dɛ́ ɛ danseɛ.

²⁹ Dɛ ŋɔ, n jemɔ kɛŋɔ n seo habɔɔ la, baa ɛ nɛnchɔɡaa dɛ́ vɛh waa maa bola baɡ ba bwa dɛ chwerɛ bil la. Aa ba la sie la, baa na wekpeɡaa, dɛkalkɛŋɔ baa ɛ waa Korowii aa kia, ásɛ o baah di.”

Mosis yel la

³⁰ Ate, Mosis baɡle yel la bini waa tɛ Israel tena bwa baa chema la ba no.