Mmarare 3 - mzwDBL

Basan Kooro Ɔɡ yoi dɛ́ pɔ o nɛ

¹ Mosis berɔ ŋɔ, “Ate, ya laa berɛ, dɛ kpɔ sie pa Basan harɛ dɛɛ kaa, belaa Basan Kooro Ɔɡ kpɔ o laa tena bwa dɛ ba yo yaa. Dɛ ya dɛ tel Edrei.

² Asɛ Korowii ŋɔ n be ŋɔ, ‘Dɛɛ berɛ o ɔma, n kpɔ o ne o nɛra ne harɛ la bwa do he nɔn ta. Ɛo ɡɛ haa ɛ Amɔre Kooro Sihon o fa aa dɛ di kora Hɛsbɔn la.’

³ Gɛɛ Korowii kpɔ Kooro Ɔɡ ne o nɛra do ya nɔn ta. Asɛ ya kpoo ba bwa nɛmbeŋkpoŋ ɡba ta kae.

⁴ A ɡɛ saŋ la ya lɛ o bwɛjena bwa. Dɛ a lɔ bwɛjena fifraanumɛl, bɛlbwa toole yaa wola ba be lɛɛ, Aaɡob harɛ Kooro Ɔɡ aa dɛ di kora o ta Basan harɛ bwa.

⁵ Ba ma danjwɛkpeɡa a kaa nyundua bar bwɛjena la bwa, dɛ kpɔ bune dɛɛ kaɡre a doonyoone. Dɛ bwɛjeɡre baa wola danjwɛɛ mae bara ɡe warɛ bela.

⁶ Ya chɔɡ a ɡɛ bwɛɛre la bwa, dɛ kpoo baala ne haahna dɛ bechale bwa kwaraa, ɡɛ yaa ɛ Hɛsbɔn Kooro Sihon harɛ ta la.

⁷ Kɛ kondɛɛra ne laala aa ka bwɛɛre la ta la te, ya kpɔa kɛ laa ta kwaa kaa a ne a ɛ ya kwa.

⁸ Gɛɛ a do ya lɛ Jɔɔdan baŋ wee leebɔr harɛ la le Amɔre tena koranar banɛ, Sihon ne Ɔɡ nɔn ta. Harɛ la chɔɔ le Aanɔn Fɛlembɔjen ta dɛ ka tel Hɛmɔn Bwejen ta.

⁹ Hɛmɔn Bwejen nɔ, Sidon tena dɛ yerɔ Sereɔn, Amɔre tena ɡee yerɔ Senir.

¹⁰ Ya lɛ bwɛɛre aa lɔ harɛ aa chɔa kaa la bwa, ne Gelead ne Basan harɛ dɛ ka tel wee leebɔr bwɛɛre ane baa dɛ yera Saleka ne Edrei, Basan Kooro Ɔɡ faa di kora a ta bwa.

¹¹ Dɛ Kooro Ɔɡ ɡboo fa baa ka Refa tena baa kpeɡa la bini. Bunii ba kpɔ ɛ o mpa, dɛ o jaŋne ɛ naɡale fi dɛ atoro ne tama, o paɡri ɡe ɛ naɡale anumɛl. Mpa la ta lɔ Amɔn tena bwɛɛ Raba la ta, dɛ ba le fini.”

Israel harɛ la bɔna

¹² Mosis berɔ ŋɔ, “Harɛ a ɡɛ saŋ yaa yoa lɛ la, n kpɔ anɔ la aa lɔ Arowa ne Aanɔn Moo weekaŋle nyunduabɔr, ne Gelead deŋɡarere harɛ pera ne a bwɛɛre tɛ Rubin ne Gad deene tena.

¹³ Gelead harɛ kar waa kaa la, ne Basan harɛ bela Kooro Ɔɡ fa aa dɛ di kora la bwa, n kpɔɔ tɛ Manasɛ dea tena bane kapa. Dɛ Aaɡob harɛ waa ɛ Basan harɛ pera bwaa ba fa ɛɛ yerɛ Refa tena baa kpeɡa la harɛ.

¹⁴ Manasɛ dea bie bɛl baa dɛ yerɔ Jɛɛ kpɔ Aaɡob waa ɛ Basan harɛ la bwa, dɛ kpoŋe ka le Gesur ne Maaka tena jwɛh ta. O kpɔ o sɔn pa bela, asɛ baa yerɛ bela Havɔt Jɛɛ dɛ ba le fini.

¹⁵ N kpɔ Gelead harɛ tɛ Makir waa ɛ Manasɛ bie la.

¹⁶ Rubin ne Gad deene tena ɡe la, le Gelead harɛ ta kaa Aanɔn Fɛlembɔjen taa n kpɔ tɛɛ ba. Aanɔn Fɛlembɔjen weekaŋle harɛbɔr baah taa ɛ ba jwɛh. Jabɔk Moo ɡe ɛ ba weekaŋle nyunduabɔr jwɛh tɛ ba ne Amɔn tena.

¹⁷ Le wee cholibɔr ɡe, ba bɔr kaa Jɔɔdan Moo ta, dɛ le Galilia Moo weekaŋle nyunduabɔr dɛ kpoŋe kaa Yar Mpo weekaŋle harɛbɔr, dɛ kpɔ ka jaɡɛ Pesɡa Bwejen wee leebɔr.

¹⁸ N ŋɔ ba be ɡɛ saŋ ŋɔ, ‘Korowii haa dɛ tomɔ laanee tɛ heyaa harɛ nɔ ŋɔ hé so o ta. Kɛ he laa tena la vɔwɛ ntoa dɛ́ le Jɔɔdan Moo baŋ, dɛ́ tɔ he bala Israel tena sie dɛ́ ka cha ba ba ɡe dɔ ba harɛ.

¹⁹ N jemɔ kɛŋɔ he dɔ kondɛɛra taeh, hé ɡel he haahna ne bii ne kondɛɛra la baŋ bonɔ bwɛɛre maa kpɔa tɛ heyaa nɔ ta.

²⁰ Hé cha he bala la ka tel kɛŋɔ Korowii aa tɛɛ ba bɔr bá so dɛ́ onɛ, ɡɛ waa tɛ heyaa nɔ, ba ɡe dɔ harɛ Korowii aa kpɔa tɛɛ ba o do Jɔɔdan Moo baŋ le. A habɔɔ la, bɛlbwa ɛɛ won kaa harɛ maa kpɔa tɛ heyaa la ta ja.’

²¹ A ɡɛ saŋ la, n ŋɔ Josua be ŋɔ, ‘He ɡbabir na waa Korowii haa dɛ tomɔ aa kpɔa ɛ ɡɛ koranar banɛ nɔ. Gɛɛ wɛɛ ba koranar haa dɛ ba ba harɛre lɛɛ la bwa ɡe ɛɛ.

²² He bɛ ban ɔmɛ, Korowii haa dɛ tomɔ nɔ ɡbaɡba ɛɛ yoo tɛ heya.’

²³ A ɡɛ saŋ la, n soŋe Korowii sibeɡra ne ŋɔ,

²⁴ ‘Nemenɛ Korowii, he pa mun dɛ kpɔ he kan ne he kpeɡri haa dɔa baɡle men maa ɛ he bonɔɔ. Komɛlbwa toole nyundua kɛɛ harɛ dɛ́ won ɛ wejena nɔ dɔŋa.

²⁵ N dɛ soŋe, le n ne Jɔɔdan Moo nɔ baŋ n ka na harɛdɛɛɡe la, ne deŋɡarere harɛ dɛ Lɛbanɔn harɛ la.’

²⁶ He nomanta, Korowii bandia ta lɔ n nɛ o ta n wesoŋa la noɛ, dɛ ŋɔ, ‘He fele! Dɛɛ berɛ ɡɛ waa nɔ n be bola kpa.

²⁷ Kɛ kaa ka teeh Pesɡa Bwejen kaa o nyundujaɡla dɛ́ nyiŋi bar. Nyiŋi harɛ la aa lɔ Jɔɔdan baŋ la kɛrɛdɛ, dɛkalkɛŋɔ nee la baŋ te, haa le.

²⁸ Kpɔ waa la do Josua nɔn ta dɛ́ doo ɡbemba ó dɔ bokpeɡa, dɛkalkɛ onee dɛ́ tɔ nɛra nɔ sie dɛ́ kpɔ ba le nee la baŋ, bá ka lɛ harɛ la haa dɛ ba o nae la dɛ́ so o ta.’

²⁹ Anomanta, ya soɡe fɛlembɔjen bɛl bini, asɛ ya sie dawɛ Bɛt Peɔ ta baŋ bɛl.”