Mmarare 29 - mzwDBL

Korowii ne Israel tena fɔo fɔwa Moab harɛ ta

¹ Waa aa lɔ fɔo Korowii aa do Mosis ŋɔ o ne Israel tena fɔwɛ Moab harɛ ta, dɛ kpɔ ja Sinai Bwejen kon la ta laanee teŋa nɔ.

² Mosis yerɛ Israel tena la bwa dɛ ŋɔ ba be ŋɔ, “Hé na waa Korowii aa kpɔa ɛ Ijipt kooro ne o nomonome, ne nɛra baa lɔ Ijipt harɛ ta la bwa.

³ He na wekpeɡa ne waa aa chiɡa ne nyokpowaa Korowii aa ɛa kohona.

⁴ Kɛ kpoŋe ba le fini Korowii saa he liire, dɛ tɛ heyaa sibie aa wola kasinteŋ laanee na, ne deŋna aa wola kasinteŋ laanee no.

⁵ Korowii tɔ he sie bene fifraanaarɛ pua hɛŋle ɡbo harɛ la ta he laala haa doa ta kɛɛrɛ, ɡɛɛ he naŋɡaware ɡe aa wola chɔɡɛ.

⁶ He ta kondikwaa kɛɛ sen bɛlbwa dɔe nyɔ. O ɛ ɡɛ ásɛ he jemɛ kɛŋɔ onee Korowii haa dɛ tomɛ la.

⁷ Haa ba bonɔ la, Hɛsbɔn Kooro Sihon ne Basan Kooro Ɔɡ baa yo yaa asɛ ya pɔ ba nɛ,

⁸ dɛ lɛ ba harɛre dɛ bɔne tɛ Rubin ne Gad deene tena, dɛ Manasɛ dea la pera nɛra.

⁹ Anomanta, hé do sie fɔo nɔ ta ásɛ wobɛlbwa haa ɛ la chiɡ heyaa kɛrɛdɛ.”

¹⁰ Mosis ŋɔ Israel tena la be ja ŋɔ, “Korowii siee he bwa che fini la, onee hɛɛ tomɛ. He nomonome, ne nɛra baa dɛ tɔ he sie, ne baala,

¹¹ ne haahna, ne bechale dɛ hɔɔhra he ne baa soɡa ba che daa ne nee dɛɛ tɛ heyaa bwa,

¹² kɛŋɔ he bwa ɛɛ sɛh fɔo he ne Korowii haa dɛ tomɔ nɔ aa fɔwa nɔ taa dɛ́ ɛ wobɛlbwa.

¹³ Ásɛ Korowii kpɔ heyaa kɛŋɔ o nɛra hɛɛ tomɔ ɡɛ waa baɡɛ he naawa Abraham ne Aesek dɛ Jekɔb nyoa la.

¹⁴ He nɛra haa cheɡɛ bonɔ ɡbo waa laa Korowii ne he fɔwɛ fɔo o ŋwɛɛ ntam la.

¹⁵ O ɛo, aa ba le chɔe tɛ ya ne ya naanar ne banɔ la ba taa dɛ́ ba ba lola bwa.

¹⁶ He fa na ɡɛ ya fa aa soɡe Ijipt harɛ ta ne ɡɛ yaa vala kpɔ harɛre ta dɛ ba tel bonɔ.

¹⁷ He na voɡa aa ɛ kii kwaa ba kpɔ daa ne bwea ne suuɡapoŋa dɛ suuɡaswɛm ɛa.

¹⁸ Hé nyiŋi kɛrɛdɛ kɛŋɔ he nɛra haa cheɡɛ bonɔ fini nɔ, baa kɛɛ haah kɛɛ lolanar, kɛɛ dea bɛl tena aa Korowii yaa dɛ tomɔ nɔ tomaa ɡel dɛ́ ka tomɛ harɛ bɛl voɡa. Ásɛ a ba ɛ kɛŋɔ daa lur aa pama le dɛ nɔnɛ nɔnchɔɡa dɛ he diu waa he sewɛ la.

¹⁹ Haa dɛ no ntam nɔ bini waa nɔ, nomɛlbwa bɛ o liire ba ɛ kɛŋɔ o na som dɛɛ ɛ deŋnekpeɡ, dɛ́ kpɔ o ɡbaɡba ŋwɛnɛ aa maɡre tɛo. Anee dɛ́ ɡel Israel tena bwa dɔ deŋnetɛra.

²⁰ Korowii aa kpɔ kɛ ɡɛ nɛn la. Anee dɛɛ ba ɡela o baah di naate nɛɛ kohona, ásɛ taahna waa bol a waa tɔn nɔ bini la bwa dawɛ he nɛɛ ka tel kɛŋɔ waa chɔɡo le harɛ nɔ ta kwara.

²¹ Korowii ɛɛ kpɔ nyotaahna waa aa lɔ tɔn nɔ bini nɔɔ dawɛ o nɛɛ he Israel deene bwa siwi ta, ɡɛ waa baɡle a waa Korowii Fɔo Tɔn la bini.

²² He bii ne he naanar baa ka ba ne hɔɔhra baa le bojaŋa ɛɛ na weela ne ɡɛ Korowii aa chɔɡ he harɛ nɔɔ.

²³ He harɛ ɛɛ chɔɡoo komɛlbwa aa wola won le o ta. Jebɔrɔwe ne yaree dɛɛ ba chura ta o ta. Haa won du komɛlbwa, kpɔɡa kwaraa aa won le o ta. Ásɛ he harɛ la do kɛŋɔ Sodom ne Gomoora ne Adma dɛ Seboiim, Korowii aa kpɔ bandia chɔɡa la.

²⁴ Ásɛ harɛ nɔ ta nɛra bwa ŋɔ, ‘Ɛrɛ waa Korowii baah di kohona o ɛ harɛ nɔ ken nɔɔ?’

²⁵ Waa la bwaa kɛŋɔ, ‘Korowii ba naawa aa dɛ tomɔ o le ba ne Ijipt harɛ ta ba la chɔɡ fɔo o ne baa fɔwa la.

²⁶ Ba kaa tomɛ voɡa baa wola an tomɛ bwa, voɡa Korowii aa kah ba ŋɔ ba bɛ an tomɛ la.

²⁷ Anee ɡela Korowii baah di kohona nɛra nɛ, asɛ dɛ kpɔ taahna waa baa chwera tɔn nɔ bini la ta ba nɛɛ la.

²⁸ Bandia kohona nee Korowii ir ba le ba harɛ ta, dɛ ba taɡ ba ta hɔɔhra harɛ ta, ba ta do bela ba le fini la.’

²⁹ Waane lole Korowii yaa dɛ tomɔ aa wola yaa baɡlɛ dɛ kpɔ sɔh yaa, kɛ o pili o Mmara waa bini ásɛ ya ne ya naanar baa ka ba la ɛɛ teŋɛ a ta saŋ bɛlbwa dɛɛ la.”