Mmarare 27 - mzwDBL

Korowii Mmarare baa chwera dawɛ bwepɛle ta

¹ Mosis ne Israel nomonome do Israel tena ŋɔ, “Hé teŋɛ ɡɛ Mmarare nɔ bwa maa kpɔa dɛɛ tɛ heyaa fini nɔ ta.

² Dɛ he le Jɔɔdan Moo la baŋ harɛ Korowii aa kpɔa dɛɛ ba heya tɛɛ la ta naa, hé paaɡe bwea dɛ maala,

³ ásɛ dɛ chwerɛ Mmarare la dawɛ a ta. Gɛ saŋ haa jo harɛ Korowii haa dɛ tomɔ nɔ aa kpɔa dɛɛ tɛ heyaa la ta la. O ɛ harɛpare ondɛɛɡe, ɡɛ Korowii he naawa aa tomɔ aa baɡɛ heyaa nyoa la.

⁴ Dɛ he ɛɡɛ Jɔɔdan Moo la le aa, hé kpɔ bwea la ka paaɡe Ebal Bwejen ta ásɛ dɛ maala, ɡɛ maa do heyaa ŋɔ hé ɛ fini la.

⁵ Ásɛ he ɛ kon baa dɛ ɛ saraha o ta tɛ Korowii haa dɛ tomɔ nɔ bela. He bɛ buni kpɔ ɛ o toma.

⁶ Bwea baa wola an sɛɛh nee chɛ kɛŋɔ hé kpɔ ɛ kon baa dɛ ɛ saraha o ta dɛɛ tɛ Korowii haa dɛ tomɔ la. O taa chɛ kɛŋɔ hé fuh kwaa baa kpɔa dɛɛ ɛ saraha dɛɛ tɛ Korowii haa dɛ tomɔ nɔ.

⁷ Hé ɛ deŋnesɔɔhna saraha bela, dɛ́ di dɛ́ lɛ sie Korowii haa dɛ tomɔ nɔ sie.

⁸ Hé chwerɛ Mmara la bini waa bwa dawɛ bwea la haa kpɔ paaɡe la ta á chɔ kɛrɛdɛ.”

Taahna aa lɔ deŋnekpeɡ waa ɛɛ ta

⁹ Mosis ne Lewi dea sɔfore la ŋɔ Israel tena la be ŋɔ, “Israel tena, hé hel dɛ́ no! Hé lii kɛŋɔ he ɛ Korowii haa dɛ tomɔ nɔ nɛra.

¹⁰ Anomanta, hé do sie o be dɛ́ teŋɛ o Mmarare ne waa waa do heyaa mɛɛ do heyaa a ta fini nɔ ta.”

¹¹ Mosis do Israel tena la awola tenten ja ŋɔ,

¹² “Dɛ he baa ɛɡɛ Jɔɔdan Moo la le tonaa, Simeon ne Lewi ne Juda, ne Isaaka ne Josef dɛ Bɛnjamen deene tena che Geresim Bwejen ta, dɛ́ soŋe andɛɛɡa tɛ nɛra la bwa.

¹³ Ásɛ nyotaahna waa ɡe, Rubin ne Gad ne Aasa, ne Sebulon ne Dan dɛ Naftale deene tena bwa bola Ebal Bwejen la ta.

¹⁴ Ásɛ name Lewi dea tena kpɔ takpeɡ ŋɔ Israel tena la bwa be ŋɔ,

¹⁵ ‘Nomɛlbwa waa sɛh komɛl chaa kɛɛ dɛ sɔh cheɡ voɡ dɛɛ tomɔ la, Kórowii taahno, dɛkalkɛŋɔ o kii.’ Ásɛ Israel tena la ɡe chaŋe ŋɔ, ‘Aamen!’

¹⁶ Ásɛ ba berɛ ŋɔ, ‘Nomɛlbwa waa wola o nya ne o mɛɛ duu la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

¹⁷ Bá berɛ teŋɛ dɛ́ ŋɔ, ‘Nomɛlbwa waa laa o ne o dɔŋ jwɛh bwe kpɔ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

¹⁸ Ásɛ ba berɛ ŋɔ, ‘Nomɛlbwa waa tɔ nyoŋe sie dɛ ɡel o nyoɡre ŋwɛnɛ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

¹⁹ Bá berɛ ŋɔ, ‘Nomɛlbwa waa wola hɔɔhra kɛɛ bilalbii kɛɛ luhaahna waa bolɛ tɛɛ ba aŋwɛnɛ ta la, Kórowii taahno.’ Israel tena la bwa chaŋe ŋɔ, ‘Aamen!’

²⁰ Bá berɛ ŋɔ, ‘Nomɛlbwa waa lawɛ o mɛɛ haah chɔ la, Kórowii taahno, dɛkalkɛŋɔ a do kɛŋɔ waa wur o mɛɛ ken.’ Ásɛ Israel tena la bwa chaŋe ŋɔ, ‘Aamen!’

²¹ Bá berɛ teŋɛ ŋɔ, ‘Nomɛlbwa waa lawɛ ol te bɛlbwa chɔ kɛŋɔ haah ne baa la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

²² Bá berɛ ŋɔ, ‘Nomɛlbwa waa lawɛ o nimambie pɔrɔdɔ kɛɛ o mɛɛ bie kɛɛ o nya bie chɔ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

²³ Bá berɛ ŋɔ, ‘Nomɛlbwa waa lawɛ o helahaah chɔ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

²⁴ Bá berɛ ŋɔ, ‘Nomɛlbwa waa sɔh dɛ́ kpo o dɔŋ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

²⁵ Bá berɛ ŋɔ, ‘Nomɛlbwa waa daŋre suuɡa ne dɛ́ kpo nɛn waa wola wechɔɡa ɛɛ la, Kórowii taahno.’ Ásɛ Israel tena la bwa chaŋe ŋɔ, ‘Aamen!’

²⁶ Ásɛ ba berɛ ŋɔ, ‘Nomɛlbwa waa wola Korowii Mmarare ne o webaɡla ta teŋɛ la, Kórowii taahno.’ Israel tena la bwa chaŋe ŋɔ, ‘Aamen!’ ”