Mmarare 26 - mzwDBL

Koo Kondikonloɡla Koma

¹ Mosis berɔ ŋɔ, “Dɛ he kaa jo harɛ Korowii haa dɛ tomɔ nɔ aa kpɔa dɛɛ tɛ heyaa kɛŋɔ kapɛrɛ kon la ta naa,

² hé bini bɛlbwa do kwaa waa para harɛ la ta konloɡla wɛɡrɛ del, dɛ́ kpɔ la bela Korowii haa dɛ tomɔ nɔ aa le tɛ heyaa ŋɔ hɛɛ tomɔ la.

³ Hé kpɔ ka tɛ sɔfo waa so bela ɡɛ saŋ la dɛ́ ŋɔ, ‘Fini n cheɡɛ bonɔ dɛ bol dɛɛ baɡle Korowii haa dɛ tomɔ nɔ be kɛŋɔ, n tel harɛ waa ŋwɛɛ o waa ŋɔ wɛɛ kpɔɔ tɛ ya naawa la ta.’

⁴ Sɔfo la ɛɛ lɛ wɛɡrɛ la ne kwaa laanee, dɛ́ kpɔ cheɡ Korowii haa dɛ tomɔ nɔ saraha kon la sie.

⁵ Ásɛ name he che bela dɛ́ bol Korowii haa dɛ tomɔ nɔ sie ŋɔ, ‘N nabaa fa ɛ Aram te dɛɛ ɡaaɡe, nɛra tamaa kenii o kpɔ dɛ ka so Ijipt harɛ ta, kɛ ba baa warɛ kohona, dɛ ɛ harɛbir nɛra dɛ dɔ kpeɡri ɡe ja.

⁶ Ijipt tena la fiiɡi yaa dɛ ɡel ya ɛ tomkpeɡa dɛ na wahala.

⁷ Anee ya wi no Korowii ya naawa aa dɛ tomɔ la, asɛ o no ya be. O na ɡɛ baa dɛ do yaa tomkpeɡa ta ne wahala yaa lɔ a ta.

⁸ Asɛ Korowii che o kpeɡri ne o bokpeɡa kohona waa dɔa la ta dɛ lɛ yaa le Ijipt harɛ ta. O ɛ nyokpowe-ɛɛla ne waa aa do ɔma kohona ɡe bela.

⁹ O kpɔ yaa ba harɛpare ondɛɛɡe nɔ ta dɛ ba kpɔ tɛ yaa.

¹⁰ Anomanta, n kpɔ harɛ Korowii aa tɛ mɛ koo konloɡla ba.’ Ásɛ dɛ kpɔ wɛɡrɛ la ne kwaa la cheɡ Korowii haa dɛ tomɔ nɔ sie dɛ́ ɡuŋi o sie.

¹¹ Ásɛ he ne Lewi dea tena ne hɔɔhra baa lɔ he baah la sie lɛ kondɛɛɡa Korowii haa dɛ tomɔ nɔ aa kpɔa tɛ he ne he dem tena la wa.

¹² Bene atoro bɛlbwa he bɔne he koo kwaa bini bɔre fi, ásɛ dɛ kpɔ bɔrbeŋkpoŋ tɛ Lewi dea tena ne hɔɔhra ne bilalbii dɛ luhaahna baa soɡe he baah la, ásɛ ba bwa dɔ di dɛ vaɡre. He ɛ ɡɛ tonaa,

¹³ he ŋɔ Korowii haa dɛ tomɔ be ŋɔ, ‘Komɛlbwa aa chɛ kɛ ń bɔne a bini bɔre fi la, n kpɔ a bini bɔrbeŋkpoŋ tɛ Lewi dea tena ne hɔɔhra ne bilalbii ne luhaahna ɡɛ haa do mɛ la, bɛlbwa ta n be kae. N ta he Mmara kone, n ta a waa soɛh.

¹⁴ Gɛ saŋ maa lɔ lwe ta dɛɛ wi la n ta bɔrbeŋkpoŋ kpɔe, ɡɛɛ maa wola ane kpɔe dɛ kah doŋa. N ta ane bɛlbwa ɡe kpɔe ɛ wobɛlbwa tɛ lala. N no Korowii maa dɛ tomɔ nɔ wa.

¹⁵ N Naa Korowii, che he sobɔr waa lɔ nyundua ba sie ne harɛ, dɛ́ swee andɛɛɡa tɛ he nɛra Israel tena, harɛ haa tɛ yaa ɡɛ haa ŋwɛɛ ntam, dɛ baɡɛ ya naawa nyoa harɛpare ondɛɛɡe nɔ.’ ”

Korowii Mmarare ta teŋa

¹⁶ Mosis ŋɔ Israel tena la be ŋɔ, “Fini tɔpere nɔ, Korowii haa dɛ tomɔ nɔ dɛ do heyaa ŋɔ hé teŋɛ o Mmarare bwa ta. He teŋɛ a ta kɛrɛdɛ he bambile bwa ne he hweera bwa ne.

¹⁷ Fini he bolɔ ŋɔ, Korowiirii hɛɛ ba toma dɛ́ɛ valɛ o ŋwɛnɛre ta, dɛ́ɛ teŋɛ o Mmarare ne waa waa do heyaa a ta dɛ́ɛ duuru.

¹⁸ Fini Korowii sɛoh kɛŋɔ o ɡbaɡba nɛraa heya he waa ɛɛ su o siwi, ɡɛ waa baɡɛ heyaa nyoa wubwa la, dɛ ŋɔ hé teŋɛ o waa waa do heyaa a ta,

¹⁹ dɛ berɛ ŋɔ wɛɛ ɡɔɔ heyaa dɛ́ ɡel he sɔn le ɡwaa harɛre nɛra waa ta ba bwa. Dɛ berɛ ŋɔ wɛɛ ɡeloo he do ɡoroŋ tɛo, ɡɛ waa baɡɛ heyaa nyoa la.”