Mmarare 25 - mzwDBL

¹ Mosis berɔ ŋɔ, “Dɛ waane chiɡ baala banɛ baah ta naa, hé kpɔ la kɔɔto ásɛ nɛn waa bol waa dɛɛ pa bole la ka pa onɔ la waa di boldɛɛɡe la bole, dɛ́ pa onɔ la ɡe bolchɔɡe.

² Dɛ bolchɔɡe te la chɛ lɔɔra aa, nomoa waa bol waa la ɡel ó chɔ harɛ, ásɛ ba lɔɔro chweema ne o siwi ta. O wechɔɡa waa ɛa la taa a chɛ kɛ bá nyiŋi dɛ́ lɔɔro.

³ Aa ɡwaala kwaraa la kera fifraanaarɛ, a bɛ ɡɛ ɡwaa ásɛ a ba ɛ kɛŋɔ o te ta nɛn ɛɛ.

⁴ He bɛ nabal waa dɛ ɛ toma he koo ta la nyoa vɔwɛ, dɛ́ ŋɔ o bɛ kwaa di.

⁵ Dɛ bɛl ne o nime kɛɛ dɔɔ soɡo, bɛl mo haah o ta bie dɔe dɛ sewɛ ɡel haah la aa, luhaah la bɛ nomɛl waa wola o jabene la nime kɛɛ dɔɔ ɛɛ yalɛ. O jabene la nime kɛɛ o dɔɔree chɛ kɛŋɔ ó mo haah la, dɛ́ lolɛ bie tɛ onɔ la waa sewa la.

⁶ Biloɡle haah la aa lolɔ la, hé kpɔ o jaa la aa sewa la sɔn pa bie la, ásɛ baa la sɔn bɛ Israel harɛ ta he.

⁷ Dɛ a balɔ kɛŋɔ jaa la aa sewa la nime kɛɛ o dɔɔ ŋɔ waa haah laanee mo aa, haah la kpɔ kaa bwɛɛ la doonyoa ka bil bwɛɛ la nomonome sie dɛ́ ŋɔ, ‘N jaa nime kɛɛ o dɔɔ ŋɔ waa men mo, ásɛ n jabene la sɔn ka Israel harɛ nɔ ta. Waa nyin kɛ o ɛɛ mɛ dɔɔ kɛɛ nime haah we-ɛɛla.’

⁸ Ásɛ nomonome la yerɛ baa la dɛ́ bol waa baɡlo. Dɛ o ta cheɡɔ ŋɔ, waa on nyin aa,

⁹ haah la laa ɡɛ baa la naŋɡawa beŋkpoŋ foo nomonome la sie ta bela, dɛ́ ta nentane ta o sie ta dɛ́ ŋɔ, ‘Anɔɔ ba kpɔ dɛɛ ɛ baa waa wola nyin kɛ o dɔɔ kɛɛ nime dɔ dwee.’

¹⁰ Ásɛ baa yerɛ baa la bii Israel harɛ ta ŋɔ, ‘Baa la ba fa aa laa o naŋɡawa beŋkpoŋ foo la bii.’

¹¹ Dɛ baala banɛ dɛ yo asɛ bɛl haah ba dɛ ba cha o jaa, dɛ lawɛ o jaa dɔŋ la lur aa,

¹² hé teŋe o nɔn la ta, dɛ bɛ o sum na.

¹³ He bɛ kon haa kpɔ maɡɛ kwaa tɔɡre bele anɛ nyin, ásɛ bɛl do kan ɡwaa bɛl.

¹⁴ Gɛɛ kon haa kpɔ maɡɛ kwaa dem ɡe, he bɛ ɡel bɛl do kan ɡwaa bɛl.

¹⁵ A chɛ kɛ hé di kasinteŋ kwaa maɡa ta, ásɛ Korowii haa dɛ tomɔ nɔ tɛ heyaa mkpajaŋ harɛ waa kpɔa dɛɛ tɛ heyaa la ta.

¹⁶ Korowii haa dɛ tomɔ nɔ kii nɛn waa wola kasinteŋ di dɛɛ faah nɛra.

¹⁷ Hé lii waa Amalɛk tena aa kpɔa ɛ heyaa ŋwɛnɛ ta ɡɛ saŋ haa le Ijipt harɛ ta dɛɛ ba la.

¹⁸ Gɛ baa wola Korowii ɔmɛ dɛ ba pu heyaa ŋwɛnɛ ta, dɛ he koɔh dɛ ɡwɛɡre, asɛ ba kpoo banɔ la baa ka mun ta la.

¹⁹ Dɛ Korowii baa kpɔ harɛ la tɛ heyaa dɛ kpɔ nɔn tɔ he nɛɛ he dɔma baa bar heyaa cheme nɔ be pera aa, hé nyiŋi kɛrɛdɛ dɛ́ kpoo Amalɛk tena la bwa, dɛ́ he ba ásɛ ba waa tonɛ. He bɛ ɡɛ waa nɔ soh!”