Mmarare 24 - mzwDBL

Baa haah vɛɛh dɛ berɛ ka mo onfale

¹ Mosis ŋɔ, “Dɛ baa bɛlbwa mo haah asɛ dɛ berɛ ba na sihihwaane o nɛ, o pɛla le o nɛɛ wɛɛ nyin dɛ́ vɛoh waa, ó chwerɛ tɔn tɛo dɛ́ le o ne o dem.

² Dɛ haah la berɔ ka yalɛ banfale,

³ asɛ a ka ba kɛŋɔ baa la ɡe aa on nyin dɛ chwerɛ tɔn tɛ haah la dɛ vɛoh dɛ le o ne o dem, kɛɛ sewaa o janɛɛte la sewaa,

⁴ o jaloɡle la aa won moo, doŋa waa kpɔa dawɛ haah la nɛɛ la wa, dɛkalkɛŋɔ Korowii kii ɡɛ. He bɛ wechɔɡa kpɔ la harɛ Korowii haa dɛ tomɔ nɔ aa kpɔa dɛɛ ba heyaa tɛɛ kɛ he kon la ta.

⁵ Dɛ baa bɛlbwa mo haah dɛ a ta benanyoa dɔe yaa, he bɛ o ne laa la, he bɛ wobɛlbwa kpɔ do o nɔn ta. Hé ɡel o so dem o ne o haah lɛ ba sie.

⁶ Aŋwɛnɛ ta laa kɛŋɔ dɛ he dɔŋ kemɛ he komɛl aa, he lɛ o nam kɛɛ nambwe cheɡ awɔba, o nyoa kondikwaa he lɛ la.

⁷ Nomɛlbwa waa lawɛ o dɔŋ bokpeɡa ne, dɛ ɛo o yom kɛɛ dɛ yoɡu he na la, o chɛ kɛŋɔ hé kpoo, ásɛ ɡɛ wechɔɡa la le Israel harɛ ta.

⁸ Dɛ bwadabii weechɔɡa ane le he nɛ aa, do sie dɛ́ pɛɛ a waa Lewi dea sɔfore la be. N bol ba be, anomanta, ɡɛ baa ŋɔ he be la, hé nyiŋi kɛrɛdɛ dɛ́ teŋɛ a ta.

⁹ Hé lii ɡɛ Korowii haa dɛ tomɔ nɔ aa ɛa tɛ Miriam ŋwɛnɛ baah ta, ɡɛ saŋ haa le Ijipt harɛ ta dɛɛ ba la.

¹⁰ Dɛ he dɔŋ kemɛ komɛl dɛ lɛ yal cheɡ awɔba aa, bɛ o dea jo dɛ́ ka kpɔ yal la.

¹¹ Che buse ásɛ o ɡbaɡba kpɔ le ba tɛɛ.

¹² Dɛ naate ɛ nyaaraa, bɛ ɡel bɔr chaah yal la ta.

¹³ Bɔr dɛ jo aa, berɛ kpɔ o yal ka tɛo ásɛ o kpɔ tɔ chɔ. Wɛɛ jaamee á baɡle kɛŋɔ he ɛ wedɛɛɡa Korowii haa dɛ tomɔ nɔ be.

¹⁴ He bɛ nyaa kɛɛ nomɛl aa hiaoh o ɛ he toma tɛɛ la faah, hale dɛ he bini Israel tee yoo dɛ hɔɔhre o so he bwɛɛ yoo.

¹⁵ Tɔpebir toma waa ɛ tɛɛ la, bɔɔ kem dɛ bɛ ɡel wee jo a ta, dɛkalkɛŋɔ a hiaoh, a taa o sie dawɛ. Dɛ he ta on tɛɛ yaa, wɛɛ wiu no Korowii ta he nɛ, ásɛ a ɛ wechɔɡa tɛɛ.

¹⁶ He bɛ nomɛlbwa ba kpo o bie wechɔɡa waa ɛa wa. Gɛɛ he bɛ bie ɡe ba kpo o mɛɛ wechɔɡa wa. Bɛlbwa chɛ kɛŋɔ ó sewɛ o wechɔɡa waa ɛa wa.

¹⁷ Hé bol waa kasinteŋ dɛɛ tɛ nɛŋhɔɔhra ne bilalbii. He bɛ luhaahna yale lɛ dɛ́ɛ cheɡ awɔba.

¹⁸ Hé lii kɛŋɔ he fa di somanjiri Ijipt harɛ ta, asɛ Korowii haa dɛ tomɔ nɔ lɛ heyaa le bela. A waa ɡela mɛɛ do heyaa ŋɔ hé ɛ ɡɛ la.

¹⁹ Dɛ he komɛ koo kondikwa dɛ soh ane waa bela aa, he bɛ ka kpɔ kpa. Hé ɡela tɛ nɛŋhɔɔhra ne bilalbii ne luhaahna, ásɛ Korowii haa dɛ tomɔ nɔ swee heyaa andɛɛɡa wobɛlbwa haa dɛ ɛ ta.

²⁰ Dɛ he chaa ɔleve aa, he bɛ beŋkpoŋa aa kaa saɡre la kuuh, hé ɡela tɛ nɛŋhɔɔhra ne bilalbii ne luhaahna.

²¹ Dɛ he la he daa kooni ta dɛ ka chaa a nɔna aa, he bɛ la ka kuuh kpa. Hé ɡela tɛ nɛŋhɔɔhra ne bilalbii ne luhaahna.

²² Hé lii kɛŋɔ he fa di somanjiri Ijipt harɛ ta ka, a waa n do heyaa ŋɔ hɛ́ɛ ɛ ɡɛ waa nɔ la.”