Mmarare 23 - mzwDBL

Nɛn doŋa dɛ le Korowii nɛra bini

¹ Mosis berɔ ŋɔ, “Nomɛlbwa baa fɔɡɛ o lure kɛɛ baa teŋe o pen ta, ta chɛ kɛŋɔ ó ja Korowii nɛra bini.

² Sɛmbie ta chɛ kɛŋɔ ó ja Korowii nɛra bini, hale o naanar baa teŋa bele fi ta chɛ kɛŋɔ bá ja Korowii nɛra bini.

³ Amɔn tena kɛɛ Moab tena, hale ba naanar baa teŋa bele fi aa won ja Korowii nɛra bini.

⁴ Dɛkalkɛŋɔ ɡɛ saŋ haa le Ijipt harɛ ta dɛɛ ba la, ba vɔmɛ heyaa nee ne kondikwa. Beɔ bibaa Balam, waa le Pɛtɔ dɛ do Mɛsopoteemea harɛ ta la, ba kaa bɔɔ paa ŋɔ ó ba taah heya.

⁵ Korowii haa dɛ tomɔ nɔ aa dɛ nyin heyaa nomanta, o ta sie doe Balam wesoŋa la ta dɛ berɛ ɡel taahna la berɛ andɛɛɡa tɛ heya.

⁶ He ne ba bɛ chamene di saŋ bɛlbwa bwa.

⁷ He bɛ nɛra baa dɛ yer ba Edom tena hah, he lolanaree dɔŋa. Gɛɛ Ijipt tena ɡe, he bɛ ba ɡe hah, he fa soɡe ba harɛ ta kɛ hɔɔhra ka.

⁸ Le ba naanar baa teŋa bele batoro ta, dɛɛ kaa la ken ɛɛ ba ja Korowii nɛra nɛɛ.”

Bela nɛra aa soɡa wedoŋa we-ɛɛla

⁹ Anee Mosis berɛ ŋɔ, “Dɛ he kaa baŋre he tɛnte deene bobɛl dɛ́ ka yo he dɔma aa, hé laa he te kpɔ waa aa ɡel hé kah doŋa ta.

¹⁰ Dɛ he bini bɛl chɔɔ dɛ dee o bwara ba naa, a ɛ doŋa wa. Ó le he bini dɛ́ ka so he habɔɔ.

¹¹ Ásɛ aa dɛɛ ɛ jɔmɔra la ó sɔ ne, ásɛ wee joɔ waa, ó ba jo he bini.

¹² Hé kwaa bɔr bela haa baŋre he tɛnte deene dɛ so la habɔɔ, ásɛ dɛɛ bɛɡɛ dahara bela.

¹³ Hé nyin kon haa kpɔ dɛɛ forɛ bɔɔ do he be, ásɛ dɛ dahara dɛ le heya aa, hé kpɔ forɛ bɔɔ dɛ́ la do dɛ tɔ a ta.

¹⁴ A munii kɛŋɔ Korowii haa dɛ tomɔ nɔ lɔ he baah ta dɛɛ nyiŋi he nɛ, dɛ́ ɡel he pɔ he dɔma nɛ. Anomanta, hé ɡel bela haa cheme la do ɡoroŋ, ásɛ Korowii bɛ doŋa bɛlbwa he nɛɛ na, dɛ ba berɛ habɔɔ kpo heya.”

Mmarare ane ɡe wa

¹⁵ Mosis berɔ ŋɔ, “Dɛ nomɛl yom chwao dɛ ba marɛ naa, bɛ on lawɛ ka tɛ o dɔɔ kpa.

¹⁶ O dɔ ŋwɛnɛ kɛŋɔ ó so he bwɛɛre la bɛlbwa waa dɛ nyin ta. Kɛ bɛ on fiiɡi.

¹⁷ Israel baa kɛɛ haah bɛlbwa bɛ ɡel voɡ kpɔɔ ó do o toma ta dɛɛ bɔ jwamane.

¹⁸ Bɛ jwamansuuɡa ne Korowii Dea ba dɛ́ ba bɔ nyobaɡa bɛlbwa. Dɛkalkɛŋɔ Korowii haa dɛ tomɔ nɔ kii.

¹⁹ Dɛ he tɛ he dɔŋ Israel te suuɡa kɛɛ kondikwaa o kemaa, hale komɛlbwa a fe aa chɛ a nee lɛɛ la, bɛ lɛ.

²⁰ He dɔ ŋwɛnɛ kɛ he lɛ hɔɔh te kon haa kpɔa kemɔ la ne. Kɛ he dɔŋ Israel tee yaa, ŋwɛnɛ toole kɛ he lɛ, ásɛ Korowii haa dɛ tomɔ nɔ sweere andɛɛɡa komɛlbwa haa ɛ harɛ haa dɛ la ka so o ta la ta.

²¹ Dɛ he baɡɛ Korowii haa dɛ tomɔ nɔ nyoa aa, chuɡra warane ásɛ a bɛ wechɔɡa ba berɛ tɛɛ. A ɛ wobɛlbwa Korowii haa dɛ tomɔ nɔ ɛɛ lɛo le he be.

²² Dɛ he ta nyoa baɡaa, a ta wechɔɡa ɛɛ.

²³ Anɔ la aa le he nyoa la, nyiŋi kɛrɛdɛ dɛ́ ɛa, dɛkalkɛŋɔ henee ta tea dɛ baɡɛ Korowii haa dɛ tomɔ nɔ nyoa.

²⁴ Dɛ he jo he dɔŋ bɛl daa koo ta naa, di daa la nɔna bɛlbwa ɡɛ haa dɛ nyin, kɛ bɛ ane kpɔ do he pur bini.

²⁵ Gɛ tentenee dɛ he tel he dɔŋ mea koo ta naa, kpɔ nɔn kuuɡi ane, bɛ kere kpɔ jo a ta.”