Mmarare 22 - mzwDBL

¹ Mosis berɔ ŋɔ, “Dɛ he na he dɔŋ nao kɛɛ pee o nyoɡre dɛɛ kaa laa, bɛ sie laa kpɔ, lawɔ ka tɛo.

² Dɛ he ne kon te la jaŋne kɛɛ dɛ haa kon te jemaa, lawɔ kaa he dem. Ásɛ dɛ kon te ba dɛ bɔɔ o wa aa, hé kpɔ tɛo.

³ Gɛɛ chɛ kɛŋɔ he ɛ he dɔŋ keeɡo kɛɛ o yal kɛɛ komɛlbwa waa ɛ he dɔŋ kon dɛ nyoɡre, bɛ sie laa kpɔ.

⁴ Dɛ he dɔŋ keeɡo kɛɛ nao cholo chɔ ŋwɛnɛ baah ta naa, bɛ sie laa kpɔ o nɛɛ dɛ ɡarɔ ta kaa, chao dɛ́ horo che chiŋ.

⁵ Haah ta chɛ kɛŋɔ ó do baa laala, ɡɛɛ baa ɡe aa wola chɛ kɛŋɔ ó do haah kwa. Korowii haa dɛ tomɔ nɔ kii ɡɛ.

⁶ Dɛ he na jumbie ŋwɛnɛ nyoa daa doa, kɛɛ ŋwɛnɛ nyoa harɛ o pi o bii nɛɛ kɛɛ o hala ta naa, bɛ on lawɛ dɛ́ ɡel o bii la kɛɛ o hala la.

⁷ Pa o bii la dɛ́ ɡel o nya la te o kaa, ásɛ a chiɡ heyaa kɛrɛdɛ hé dɔ mkpajaŋ.

⁸ Dɛ he do dea aa, ɛ kon bar sal la nyoa, ásɛ a bɛ ba kɛŋɔ nomɛl teeh sal la, dɛ́ le nyundua bela dɛ́ ba le harɛ sewɛ, dɛ́ kpɔ waa do he nyoa.

⁹ Bɛ komɛlbwa du ja daa haa kpɔ a nɔna dɛɛ ɛ sen la ta koo beŋkpoŋ ta. He ɛ ɡɛ naa, haa won di kwaa la bɛlbwa.

¹⁰ Bɛ daa vɔwɛ dɛɛ pɛl nao ne keeɡo á parɛ.

¹¹ Bɛ yal baa kpɔ pee pona ne yabi pɛ sɔh la tɔ.

¹² Nyarɛ jɔɔra do he yal haa dɛ tɔ la nyoo anaarɛ la bwa ta.”

Baa ne haah yal chɔɡa wa

¹³ Anee Mosis berɛ ŋɔ, “Dɛ he mo haah, asɛ a habɔɔ he ŋɔ haa on nyin,

¹⁴ dɛ kpɔ sɔnchɔɡe dawɛ o nɛɛ ŋɔ, he ta haah la pue, o jemɛ baala aa,

¹⁵ haah la nya ne o mɛɛ kpɔ kon baa chɔ o ta o ɛ chal la la bwɛɛ la nomonome baa soɡe bwɛɛ la doonyoa dɛɛ bol waa la sie.

¹⁶ Ásɛ haah la mɛɛ ŋɔ nomonome la be ŋɔ, ‘N kpɔ n bihaah nɔ tɛ baa ŋɔ o mo kɛ waa on nyin kpa.

¹⁷ O kpɔ sɔnchɔɡe dɛɛ dawɔ ŋɔ, tolo waa wola baa jemɛ laa. Kon waa lawɔ hanfale ba chɔ o ta laanee la.’ Ásɛ dɛ paɡri baɡle nomonome la.

¹⁸ Ásɛ bwɛɛ la nomonome la tɛr baa la deŋne,

¹⁹ dɛ́ yoɡu lɛ suuɡapoŋa lafa tɛ haah la mɛɛ, sɔnchɔɡe waa kpɔa dawɛ Israel tolo waa wola baa jemɛ bwa la wa. Ó ta moo dɛ bɛ on vɛh, nemenɛ seo.

²⁰ Dɛ ɡɛ waa la ɛ kpela, ba ta komɛlbwa dɔe dɛ kpɔ di danseɛ kɛŋɔ haah la aa baa jemɛ bwa naa,

²¹ ate bá lawɛ haah la ka so o mɛɛ dem doonyoa, ásɛ o bwɛɛ baala foɡro bwea kpo, dɛ́ le ɡɛ wechɔɡa la ne Israel harɛ ta. O ɛ sihihwa kɛŋɔ waa soɡe o mɛɛ dem dɛ bɔ jwamane la.

²² Dɛ he na baa dɛ o lawɛ o dɔŋ haah chɔ aa, hé kpo baa la ne haah la bwa, dɛ́ le ɡɛ wechɔɡa la ne Israel harɛ ta.

²³ Dɛ he berɔ too na baa bwɛɛ bini o lawɛ tolo baa lawɔ tɛ yal chɔ aa,

²⁴ hé kpɔ ba nɛra banɛ la bwa kaa bwɛɛ la doonyoa dɛ́ ka foɡ ba bwea kpo. Haah la kpoe munii kɛŋɔ, o ta lɔŋɔre doe soŋe lɛɛ, bwɛɛ bini ɡee. Baa la kwaa munii kɛŋɔ, o chɔɡ o dɔŋ haah. Gɛɛ dɛ́ le ɡɛ wechɔɡa la ne Israel harɛ ta.

²⁵ Dɛ baa bɛlbwa ɡuɡri tolo baa kpɔɔ tɛ yal kpɔɡ bini dɛ chɔ o ne naa, amɔ te hé kpo baa la ɡbo.

²⁶ Hɛ́ɛ berɛ haah la te wobɛlbwa ɛɛ, dɛkalkɛŋɔ o ta wobɛlbwa aa chɛ seo ɛɛ. A do kɛŋɔ nomɛl aa cheɡɛ o dɔŋ nɛɛ dɛ kpoo ken.

²⁷ Kpɔɡ binii baa la ɡuɡru, asɛ tolo la dooɡe lɔŋɔre nyin lɛɛ o ta nɛn dɔe ó ba lɛo.

²⁸ Dɛ he na baa o ɡuɡri tolo waa wola baa jemɛ, asɛ ba ta on kpɔe tɛ yal o ne o chɔ aa,

²⁹ ɡɛ baa la chɛ kɛŋɔ ó bɔ suuɡapoŋa fifraanue dɛ tɛ haah la mɛɛ á ɛ haah la nyin suuɡa ásɛ dɛ moo, dɛkalkɛŋɔ onee cheme haah la. Ó ɛ o haah ka tel o serewe bena.

³⁰ Nomɛlbwa bɛ o mɛɛ haah ba mo dɛ́ kpɔ sihiih kpo o mɛɛ.”