Mmarare 21 - mzwDBL

Nɛn waa kpo o dɔŋ baa wola on jemɛ

¹ Mosis berɔ ŋɔ, “A kaa ba kɛŋɔ dɛ nomɛl kpo nɛn o chɔ kpɔɡ bini, harɛ Korowii haa dɛ tomɔ nɔ aa kpɔa dɛɛ ba heyaa tɛɛ nɔ ta, dɛ háa naate waa kpoo jemaa,

² he nomonome ne nɛra baa bol he waa dɛɛ pa bole la, la dɛ́ ka maɡɛ le bela nɛn waa sewa la aa chɔa la ne bwɛɛre aa lɔ bela la baah ta.

³ Bwɛɛ waa bɛne bela waa chɔa la nomonome nyin nalor baa wola on kpɔe parɛ bwa la,

⁴ dɛ́ kpɔ ɡɛ nao la la nenabɔɔ waa wola hweeh nyoa, baa wola bela parɛ bwa la, dɛ́ ka laa nao la baŋa ku bela.

⁵ Lewi dea tena baa ɛ sɔfore la tɔ sie, dɛkalkɛŋɔ Korowii haa dɛ tomɔ nɔɔ lee ba ŋɔ baa ɛ o toma dɛ́ soŋe andɛɛɡa dɛɛ tɛ nɛra o sɔn ta. Ba nyoa wobol taa bá che dɛ́ bol wobɛlbwa aa lɔ nɛra baah ta, ne dɔŋa lɔɔra waa bɛlbwa ta.

⁶ Ásɛ bwɛɛ waa bɛne bela nɛn waa sewa la aa chɔa la, nomonome bwa sarame ba nɔɔra ta nao la nɛɛ nenabɔɔ la bini,

⁷ dɛ́ bwa ŋɔ, ‘Ya laa kpoo, ya ta o kpoe nae.

⁸ N Naa Korowii, lɛ nalor nɔ dɛ́ kpɔ ɡɛ nɛŋkpoa wechɔɡa nɔ kɛ Israel tena haa lɛ yaa la, dɛ bɛ ɡel nɛn yaa wola o waa jemɛ nɔ waa dawɛ ya nɛ.’

⁹ Gɛɛ hɛɛ ba he te laa dɛ́ kpɔ nɛŋkpoa haa wola a wobɛlbwa jemɛ bolchɔɡe dii ta, a ɡɛ ɛ waa aa wera Korowii be.”

Haahna baa laɡ ba laa ta moe wa

¹⁰ Anee Mosis berɛ ŋɔ, “Dɛ he ne he dɔma cheme laa ta, asɛ Korowii haa dɛ tomɔ nɔ kpɔ ba do he nɔn ta asɛ he laɡ ba yoma aa,

¹¹ he baa nyiŋi ba bini dɛ na bechatolo waa wera he pɛla dɔɔ waa, hɛɛ won kpɔɔ mo.

¹² Kpɔɔ kaa he dem dɛ́ ka ɡel o fonɛ o nyu, dɛ́ kuu o nonie ne nanie,

¹³ ásɛ dɛ ɡel o foo komɛlbwa aa lɔ o bwara ta wubwa mɔɔ he lawɔ yomhaah la bil, dɛ́ kpɔ anfala do. Gel ó wi o nya ne o mɛɛ korobie mɔɔ he la o be dɛ́ moo o ɛ he haah.

¹⁴ Dɛ a balɔ kɛŋɔ haa on nyin kpa aa, kpɔ o bwara kɛo. Bɛ on yoɡ lɛ suuɡa, bɛ on ɛ kɛ yom, dɛkalkɛŋɔ henee chemo.”

Bibanloɡla kapɛrɛ dii wa

¹⁵ Mosis berɔ ŋɔ, “Dɛ he mo haahna banɛ asɛ dɛɛ nyin bɛl, haa bɛl nyin, he ne ba bwa loɡle bibaala kɛ he chanche la bie laa nomoa,

¹⁶ asɛ a ba kɛŋɔ he bɔne he laala dɛɛ tɛ he bii la aa, bɛ he chanche bie la kpɔ ɛ nomoa onɔ la haa wola on nyin, o bie ɛ nomoa la nɛ.

¹⁷ A chɛ kɛŋɔ hé tɛ bie waa ɛ nomoa la bele anɛ, hale dɛ he chanche la bie laa kwaraa noo. A ɡɛ bie laanee o mɛɛ bonɔmbie, anomanta, biloɡle dibɔr chɛo.

Bibaa o deŋne aa kpeɡa wa

¹⁸ Dɛ nomɛlbwa bibaa deŋne kpeɡri wɛɛ lɛ ɡaeh waa o nya ne o mɛɛ deŋna waa no, hale ba tɛr o deŋne o ta do ɡɛ naa,

¹⁹ o nya ne o mɛɛ lawɔ la bwɛɛ la nomonome sie bwɛɛ la doonyoa baa soɡa dɛɛ bol waa la.

²⁰ Bá ŋɔ nomonome la be ŋɔ, ‘Ya bie nɔ deŋne kpeɡri, o dɛ lɛ ɡaeh, waa ya deŋne waa ɡe no. O ɛ sennyɔɔ dɛ ɛ nɛnsala.’

²¹ Ásɛ bwɛɛ la baala foɡro bwea kpo, dɛ́ le ɡɛ wechɔɡa la le he bini. Ásɛ Israel tena bwa no dɛ́ ɔmɛ.”

Mmarare ane ɡe wa

²² Anee Mosis berɛ ŋɔ, “Dɛ nomɛl ɛ wechɔɡa a chɛ kɛŋɔ bá kpoo, asɛ ba kpoo dɛ kpɔɔ ka saɡɛ daa ta naa,

²³ he bɛ ɡel o saɡɛ daa la ta tɔɔ per. Hé nyiŋi dɛ́ huɡo awola tenten, ásɛ dɛ bɛ doŋa ba kah harɛ Korowii haa dɛ tomɔ nɔ aa kpɔa dɛɛ ba heyaa tɛɛ he so o ta la. Dɛkalkɛŋɔ Korowii taah nomɛlbwa waa saɡɛ daa ta sewɛ.”