Mmarare 20 - mzwDBL

Laa yoi wa

¹ Mosis berɔ ŋɔ, “Dɛ he kaa cheme he dɔma laa ta, asɛ dɛ na kɛŋɔ dɔma la torɔɡore baa vɔwɛ jaɡre pɛla la warɔ ɡwaa heya aa, he bɛ ban ɔmɛ. Dɛkalkɛŋɔ Korowii haa dɛ tomɔ o le he ne Ijipt harɛ ta la ɛɛ che he mun taa.

² Dɛ he dɛ ba laa yoi yaa, sɔfo ba che he laa tena la sie, dɛ́ bol waa baɡ ba ŋɔ,

³ ‘Israel tena, fini he ne he dɔma dɛ ba yoi, anomanta, he bɛ ɡel he bwara yɔr, he bɛ ɡel he bwara ɛɛ sa, he bɛ ban ɔmɛ.

⁴ Dɛkalkɛŋɔ he ne Korowii haa dɛ tomɔ nɔɔ dɛɛ kaa dɛ́ ka yoo ba, hɛɛ yoo le.’

⁵ Ásɛ laa sitɔɔla la ŋɔ laa tena la be ŋɔ, ‘Dɛ bɛlbwa do demfale o ta on pile dɛ ka so o ta mɔɔ naa, ó berɛ kaa dem. Dɛ ɡɛ laa o kaa ka laa la ta naa, nɛnfalee dɛ́ pili dea la, dɛ́ so o ta.

⁶ Dɛ he bini bɛl ɡe du daa baa kpɔ a nɔna dɛɛ ɛ sen waa wola an chaarɛ bwa naa, o ɡe berɛ kaa dem. Dɛ ɡɛ laa o ka laa la ta naa, nomɛlee dɛ́ chaara dɛ́ nyɔ a sen.

⁷ Gɛɛ dɛ nomɛl ɡe nyin haah dɛ haah la ta o dea balɛ mɔɔ naa, o kaa dem dɛ́ ka mo o haah la. Gɛ laa dɛ o ka laa la ta naa, nomɛl ɛɛ kpɔ haah laanee mo.’

⁸ Sitɔɔla la teŋɛ dɛ bol ja ŋɔ, ‘Hé bini bɛlbwa o bwara aa yɔra wɛɛ ɔmɛ la, kaa dem dɛ bɛ ba kpɔ maah o bala.’

⁹ Nomonome la bol waa tonaa, bá le laa sitɔɔla bá chɔ ba nyoa.

¹⁰ Dɛ he dɛ ba bwɛjen bɛl yoi yaa, hé tɔ sie bol bansɔɔh wobol tɛ nɛra baa lɔ o ta.

¹¹ Dɛ ba sɛoh dɛ ya ba bwɛɛ ɡbeni tɛ heyaa, ate dɛ ba berɛ he yoma dɛ́ ɛ toma dɛɛ tɛ heya.

¹² Dɛ ba ta sɛɛh dɛ ŋɔ baa yoo waa, hé kpɔ he te dɛ́ chɔ bar bwɛɛ la cheme,

¹³ ásɛ dɛ Korowii háa dɛ tomɔ nɔ kpɔ bwɛɛ la do he nɔn ta naa, hé kpoo bwɛɛ la baala bwa.

¹⁴ Kɛ haahna ne bechale ne kondɛɛra ne komɛlbwa aa lɔ bwɛɛ la ta la, hé kpɔa kɛŋɔ laa ta kwa. Korowii haa dɛ tomɔ laanee laa lɛ he dɔma be tɛ heyaa la.

¹⁵ Gɛɛ chɛ kɛŋɔ hé ɛ bwɛjena aa lɔ bojaŋ aa wola harɛ haa dɛ ba o ta soɡa bɛne la ta.

¹⁶ Harɛ Korowii haa dɛ tomɔ nɔ aa kpɔa dɛɛ ba heyaa tɛɛ hé so o ta la te, he bɛ hweera kon te bɛlbwa ɡel a bwɛɛre ta.

¹⁷ Hé kpoo a bwa, Hiti ne Amɔre ne Keenan tena, ne Pɛrɛs ne Hivi dɛ Jebus tena. Hé ɛ ɡɛ Korowii haa dɛ tomɔ nɔ aa do heyaa la.

¹⁸ Gɛ laa aa, baa baɡle heyaa waa baa ɛa dɛɛ tomɛ ba voɡare Korowii haa dɛ tomɔ nɔ aa kia la ta teŋaa, ásɛ he ɛ wechɔɡa dɛ́ jo o nɛ.

¹⁹ Dɛ he kaa pu bwɛɛ bɛl dɛɛ ba o bara cheme dɛ́ yoo ba biɡri aa, he bɛ bela daa teŋni ta. Dɛkalkɛŋɔ hɛɛ di a nɔnaa, daa la ta he dɔma ɛɛ.

²⁰ Daa baa wola a nɔna di kɛɛ aa wola tɔnɔ dɔe la te, hɛɛ won teŋna, dɛ́ pa darawe dɔŋa nɛɛ bar bwɛɛ la, dɛ́ yoo ba ka tel kɛŋɔ haa pɔ ba nɛ.”