Mmarare 19 - mzwDBL

Bwɛjena nɛra aa ka so a ta dɛ́ dɔ ba nyu

¹ Mosis berɔ ŋɔ, “Dɛ Korowii haa dɛ tomɔ nɔ chɔɡ nɛra haa dɛ la ka kpɔ ba harɛre so a ta nɔ, asɛ he ka kpɔ ba bwɛɛre ne deremi so naa,

² hé le bwɛjena atoro cheɡ harɛ la baah ta Korowii haa dɛ tomɔ la aa kpɔa dɛɛ tɛ heyaa la ta.

³ Hé peɡri ŋwɛnɛre ta a ta, ásɛ dɛ peɡri harɛ la Korowii haa dɛ tomɔ nɔ aa kpɔa dɛɛ ba heyaa tɛɛ kɛ kapɛrɛ la bini bɔre atoro, ásɛ dɛ nomɛl kpo o dɔŋ aa, o won chwa kaa bɛl ta.

⁴ Dɛ nomɛl dɔm laa o dɔŋ asɛ o koni kpoo ɡe aa, ó chwa kaa bwɛjen la bɛlbwa ta, ásɛ dɛ dɔ o nyu.

⁵ A kaa ba kɛŋɔ, dɛ nomɛl ne o dɔŋ la kɔr bini dɛ ka teŋe da, asɛ kpanfɛbii la fome le o daa ta dɛ ka ŋwɛnɛ o dɔŋ la o sewɛ aa, onɔ la chwa kaa ɡɛ bwɛjen la bɛl ta, dɛ́ dɔ o nyu.

⁶ Dɛ he le bwɛjen beŋkpoŋ ɡbo aa, a baah la ɛɛ do jaŋnee, ásɛ nɛn waa sewa la nɛra won ti naate waa wola saahnɛ kpo o dɔŋ la, dɛ́ kpɔ bandia ka kpoo, kɛ dɛ o ta chɛ kɛ bá kpoo.

⁷ A ɡɛ waa nɔ waa n doe ŋɔ he le bwɛjena atoro cheɡ la.

⁸ Dɛ Korowii haa dɛ tomɔ nɔ baa ɡel he harɛ la do kan ɡɛ waa ŋwɛɛra baɡle he naawa, asɛ dɛ kpɔ harɛ la bwa tɛ heya aa,

⁹ haa dɛ teŋɛ mmarare nɔ bwa maa do heyaa fini nɔ ta kɛrɛdɛ dɛɛ nyin Korowii haa dɛ tomɔ dɛɛ valɛ o ŋwɛnɛre ta la nomanta, hé le bwɛjena atoro cheɡ ja.

¹⁰ He ɛ ɡɛ, ásɛ dɛ bɛ nɛra baa wola wechɔɡa bɛlbwa ɛɛ chale ba fuɡe ta harɛ Korowii haa dɛ tomɔ la aa kpɔa dɛɛ ba heyaa tɛɛ kɛŋɔ kapɛrɛ kon la ta, ásɛ dɛ bɛ nɛŋkpoa bolchɔɡe ba di.

¹¹ Kɛ dɛ nomɛl hah o dɔŋ, dɛ bɛɛlo dɛ ka lɔɔro kpo, dɛ chwa kaa bwɛjen la bɛl ta naa,

¹² bwɛɛ la naate aa le o ta la nomonome tomɛ toroma bá la ka kpɔɔ ba, ásɛ ba kpɔɔ do nɛn waa sewa la lolanar nɔn ta bá kpoo bɔ kem.

¹³ He bɛ o sum na, ásɛ a chiɡ heyaa kɛrɛdɛ. Gɛɛ dɛ le nɛn waa wola wechɔɡa ɛɛ ba kpoo la bolchɔɡe dii le Israel harɛ ta.

¹⁴ Harɛ Korowii haa dɛ tomɔ aa kpɔa dɛɛ ba heyaa tɛɛ ŋɔ he ka so o ta la, saŋ la tena kpɔ bwea pa ba jwɛhre ta. He kon haa dɔ la, he bɛ bwea aa pa he ne he dɔŋ jwɛh ta la huɡri ta.”

Danseɛ dii

¹⁵ Anee Mosis berɛ ŋɔ, “Nɛmbeŋkpoŋ aa won di danseɛ nomɛl wedoŋa kɛɛ wechɔɡa waa ɛa ta, ásɛ ba pao bolchɔɡe a maɡre. A chɛ kɛŋɔ nɛra banɛ kɛɛ batoro di danseɛ mɔɔ.

¹⁶ Dɛ nomɛl di dansewea dɛɛ dawɛ nomɛl nɛ aa,

¹⁷ ate hé kpɔ nɛra banɛ waa la aa lɔ ba baah ta la la Korowii sie, sɔfore ne nɛra baa bol waa dɛɛ pa bole dɛ do le ɡɛ saŋ la be,

¹⁸ ásɛ nɛra baa bol waa dɛɛ pa bole la nyiŋi a bini kɛrɛdɛ. Dɛ danseɛ te la ɛ nyosonteŋni dɛ di dansewea dɛɛ dawɛ o dɔŋ nɛ aa,

¹⁹ ate hé ɛ dansewea te la ɡɛ o fe aa dɛ nyin kɛ ba ɛ o dɔŋ la, ásɛ dɛ laa wechɔɡa la kpɔ le he bini.

²⁰ Banɔ la baa kaa la ɛɛ noo, dɛ́ ɔmɛ dɛ bɛ wechɔɡa aa do ɡɛ la ba ɛ he baah kpa.

²¹ He bɛ nomɛlbwa sum dɛɛ na, dɛ he kpo nɛn aa, a nyoa hɛɛ ba kae. He fome he dɔŋ siwi aa, bá fome he ɡe kon, he ku he dɔŋ nyen aa, bá ku he ɡe kon, he teŋe he dɔŋ nɔn aa, bá teŋe he ɡe kon, he teŋe he dɔŋ nakpala aa, bá teŋe he ɡe kon.”