Mmarare 18 - mzwDBL

Saraha kwaa baa kpɔ tɛ Lewi dea tena ne sɔfore

¹ Mosis berɔ ŋɔ, “Lewi dea tena baa ɛ sɔfore la aa Israel harɛ la peraa dɔ, kɛ baa di koŋkɛɛla ne kwaa haa kpɔ ba ɛ saraha dɛ fuah dɛɛ tɛ Korowii laanee.

² Baa harɛɛ dɔ ɡɛ deene aa kaa la aa dɔa la, kon baa dɔ laanee Korowii sɔfore dii, ɡɛ waa baɡ ba nyoa la.

³ Dɛ he kpɔ nao kɛɛ pee ɛ saraha aa, sɔfore la di bɔree o vam ne o kaŋe dɛ o tea bini kwa.

⁴ Banee bera chɛ kɛŋɔ hé kpɔ he mea aa tɔ sie ne he senfala, ne ɔleve noo dɛ peera pona he yon tɔ sie fona bena bɛlbwa la tɛ,

⁵ dɛkalkɛŋɔ ba ne ba naanaree Korowii haa dɛ tomɔ le he deene la bwa bini ŋɔ bá che o sɔn ta, dɛ́ɛ ɛ o toma saŋ bɛlbwa.

⁶ Lewi dea te bɛlbwa waa so Israel harɛ bwɛɛ bɛlbwa ta dɛ nyin aa, wɛɛ won ba bela Korowii aa lea cheɡ ŋɔ hɛɛ tomɔ bela la,

⁷ ásɛ dɛ ɛ sɔfo dɛɛ ɛ Korowii toma kɛŋɔ ɡɛ ba bala Lewi dea tena la aa dɛ ɛ bela la.

⁸ Gɛ del ba bala la aa dɛ dɔ la, ɡɛ tentenee chɛ kɛŋɔ ó ɡe dɔ, hale dɛ suuɡaa o dɔ le o mɛɛ kɛɛ o nya kwaa waa yoɡa ta noo.”

We-ɛɛla ane aa ɛ kii wa

⁹ Mosis berɔ ŋɔ, “Dɛ he tel harɛ Korowii haa dɛ tomɔ aa kpɔa dɛɛ tɛ heyaa la ta naa, he bɛ nɛra baa lɔ bela la ba chaa, dɛ́ hweli ba wedoŋa ŋwɛnɛre la. Korowii kia taeh.

¹⁰ He bɛ he bibaala kɛɛ bihaahna kpoo, dɛ́ fuuh ba tɛ voɡa. He bɛ ajɔ kɛɛ sɔm ne voɡra ne bebee wa,

¹¹ ne kabere dɛ lala yera we-ɛɛla ta jo.

¹² Korowii kii nɛn waa dɛ ɛ ɡɛ wedoŋa nɔ, a ɡɛ kii we-ɛɛla nɔ waa Korowii haa dɛ tomɔ nɔ tɔ he sie, dɛ doŋi ɡɛ harɛre nɛra baa dɛ ɛa dɛ do he sie la.

¹³ A chɛ kɛŋɔ hé waa do kaih Korowii haa dɛ tomɔ nɔ be.”

Korowii tomɛ o keame bɛl

¹⁴ Anee Mosis berɛ ŋɔ, “Harɛre nɛra haa doŋ ba la dɛ no nɛra baa dɛ voɡɛ dɛɛ ɛ sɔm we-ɛɛla la wa. Kɛ he te, Korowii haa dɛ tomɔ nɔ ta heyaa ŋwɛnɛ tɛɛ kɛ he ɛ ɡɛ.

¹⁵ Korowii haa dɛ tomɔ nɔ ɛɛ tomɛ o keamee ó ba bol o waa dɛɛ tɛ heya ɡɛ waa tom mɛ nɔ. He ɡbaɡba dwee binii wɛɛ ba o lee. A chɛ kɛŋɔ hé cheɡ deŋne dɛ́ no o wobol.

¹⁶ Gɛ awola haa cheme Sinai Bwejen la lɔɡa dɛ soŋe Korowii haa dɛ tomɔ dɛ ŋɔ, ‘Bɛ ɡel yá no Korowii taa kɛɛ dɛ́ na nijena nɔ dɔŋa kpa, ɡɛ laa aa, yaa serewoo.’

¹⁷ Asɛ Korowii ŋɔ n be ŋɔ, ‘Gɛ baa bola nɔ wer.

¹⁸ Mɛɛ tomɛ n keamee ó ba bol n waa dɛɛ tɛɛ ba ɡɛ maa tomɛ nɔ. Ba ɡbaɡba dwee binii wɛɛ ba lee. Mɛɛ kpɔ n waa tɛo, ásɛ o bol anɔ la bwa maa doo bwa baɡ ba.

¹⁹ Dɛ a balɔ kɛŋɔ nomɛl ta n waa waa cheɡɛ n sɔn ta dɛ bol ta teŋaa, naate deŋnee mɛɛ ba tɛra.

²⁰ Dɛ keame bɛl ɡe baah suu ŋɔ wɛɛ che n sɔn taa dɛ́ bol waa maa wola on a ta doe, kɛɛ keame waa che voɡ bɛlbwa sɔn ta, dɛ́ bol waane la chɛ kɛŋɔ bá kpoo.’

²¹ Hɛɛ dɛɛ pɛɛro ŋɔ, ‘Ɛrɛɛ yaa ba ɛɛ dɛ́ jemɛ kɛŋɔ Korowii nyoa wobol laa ɔ?’

²² Dɛ keame cheɡɛ Korowii sɔn ta dɛ bol waa asɛ a ta ɡɛ ɛɛ yaa, amɔ te dɛ Korowii nyoa wobol laa. O ɡbaɡba kpeɡri taa o che dɛ bol. He bɛ ɡɛ nɛn la ɔmɛ.”