Mmarare 17 - mzwDBL

¹ Mosis berɔ ŋɔ, “He bɛ nao kɛɛ pee waa di kirihiah kpɔ ka ɛ saraha tɛ Korowii haa dɛ tomɔ nɔ. O kii ɡɛ kwaa la.

² Dɛ a kaa ba kɛŋɔ he noɔ kɛŋɔ baa kɛɛ haah ɛ wechɔɡa, dɛ chɔɡ he ne Korowii haa dɛ tomɔ nɔ fɔo he bwɛɛre la bɛlbwa ta,

³ dɛ berɛ dɛɛ tomɛ voɡare ane, kɛɛ wee ne korobie dɛ weweela aa, amɔ o vɛh Korowii waa la ta teŋa.

⁴ Dɛ he baa no ɡɛ waa nɔ naa, hé nyiŋi a bini kɛrɛdɛ. Dɛ a ɛ kasinteŋ kɛŋɔ ɡɛ wechɔɡa la chiɡ Israel harɛ ta naa, ba kii.

⁵ Hé lawɛ ɡɛ nɛn la le bwɛɛ la dahara, dɛ́ ka foɡro bwea kpo.

⁶ A chɛ kɛŋɔ nɛra banɛ kɛɛ batoro di danseɛ mɔɔ bá kpo a ɡɛ nɛn la. Dɛ nɛn beŋkpoŋ ɡbo di danseɛ aa, he bɛ on kpo.

⁷ Dɛ a ba ɡɛ naa, danseɛ tena la tɔ sie kpɔ bwea foɡro mɔɔ nomɛlbwa teŋɛ. Gɛ ŋwɛnɛ nɔ taa hɛɛ ba wona laa ɡɛ wechɔɡa nɔ kpɔ he bini.

Waa bola kɔɔto

⁸ Dɛ waane bole pae baa do kpeɡri tɛ nɛra baa bol waa dɛɛ pa bole he bwɛɛre la ta, kɛŋɔ nomɛl aa saahna kpo o dɔŋ kɛɛ waa wola saahnɛ, kɛɛ laala ane wa aa lɔ bɛl ne o dɔŋ baah ta, kɛɛ nomɛl aa saahna do o dɔŋ bol kɛɛ waa wola saahnaa, hé kpɔ la bela Korowii haa dɛ tomɔ aa lea tɛ heyaa la,

⁹ dɛ́ kpɔ ka bil Lewi dea tena baa ɛ sɔfore la ne nɛn waa bol waa dɛɛ pa bole dɛ do bela ɡɛ saŋ la sie, ásɛ ba pa bole.

¹⁰ Bole baa pa bela la, dɛ anee.

¹¹ Hé no ɡɛ baa bola la. Hé den kpɔ a ta dɛ bɛ ane laa kpɔ, dɛ bɛ ane ɡe kpɔ ja.

¹² Dɛ nomɛl baah suu o ta waa nɛn waa dɛ pa bole kɛɛ sɔfo waa cheɡɛ Korowii haa dɛ tomɔ la naa ta waa ta teŋaa, kpoe chɛ kɛŋɔ bá kpoo. Gɛ ŋwɛnɛ nɔ taa hɛɛ ba cheɡa, dɛ́ le ɡɛ wechɔɡa la ne Israel harɛ ta.

¹³ Ásɛ nomɛlbwa no dɛ́ ɔmɛ dɛ bɛ bansua waa aa do ɡɛ la dɔŋa ba ɛ kpa.”

Kooro lee wa

¹⁴ Anee Mosis berɛ ŋɔ, “Dɛ he baa tel harɛ Korowii haa dɛ tomɔ nɔ aa kpɔa dɛɛ ba heyaa tɛɛ he dɔ dɛ so o ta dɛ lii kɛŋɔ, he chiɡ kooro wɛɛ nyiŋi he nɛɛ kɛŋɔ harɛre aa bar heyaa nɔ naa,

¹⁵ hé nyiŋi kɛrɛdɛ, dɛ́ na onɔ la Korowii aa leo. A chɛ kɛŋɔ ó ɛ he bini bɛl. He bɛ hɔɔh kpɔ, hé kpɔ Israel te.

¹⁶ Kooro la bɛ jaɡre kohona nyin, o bɛ ɡel nɛra la Ijipt harɛ ta dɛ́ ka yawɛ jaɡre, dɛkalkɛŋɔ Korowii haa dɛ tomɔ nɔ ŋɔ o nɛra bɛ berɛ la Ijipt harɛ ta kpa.

¹⁷ Kooro la bɛ haahna mo warɛ, a ba ɡɛ naa, waa sie Korowii waa taa do. O bɛ kondɔɔh kɛŋɔ suuɡapoŋa kɛɛ suuɡaswɛm kohona nyin.

¹⁸ Dɛ naate baa so kara ta naa, o nyiŋi Lewi dea tena baa ɛ sɔfore la be, dɛ́ lɛ Korowii tɔn la dɛ́ nyiŋi o ta dɛ́ chwerɛ bɛl.

¹⁹ Ásɛ dɛ bɛ ɡel wɛɛ paŋɔ, wɛɛ kuro saŋ te bɛlbwa o soɡa bini bwa. Gɛɛ dɛɛ ba ɡela ó jemɛ Korowii waa dɛ tomɔ la duura kɛrɛdɛ, dɛ́ɛ teŋɛ wobɛlbwa waa bola a do tɔn la bini.

²⁰ Gɛɛ dɛ́ ɡel ó jemɛ kɛŋɔ o ta o bala Israel tena ɡwaalɛ. O bɛ tɔn la waa la ane laa kpɔ, dɛ bɛ ane ɡe kpɔ ja, ásɛ a ɡel o ne o naanar di kora dɛɛ biɡri Israel harɛ ta.”