Mmarare 16 - mzwDBL

Galekaa Tɔpejen dii

¹ Mosis berɔ ŋɔ, “Hɛ́ɛ di Galekaa Tɔpejen la Abib korobie la ta Korowii sɔn ta, dɛkalkɛŋɔ ɡɛ korobie la taa o lɛ heyaa le Ijipt harɛ jwaana bɛl.

² He bɛlbwa lawɛ o pee kɛɛ nao le o kondɛɛra bini, ásɛ dɛ kpɔ la bela Korowii aa lea tɛ heyaa ŋɔ hɛɛ tomɔ la, dɛ́ kpɔ ɛ Galekaa Tɔpejen saraha tɛ Korowii o sɔn ta.

³ He bɛ paanoo baa do iisi a ta la kpɔ ja Galekaa ol la ta dɛ́ di. Hé di paanoo baa wola iisi a ta doe la teŋɛ dɔŋa nɛɛ tɔpera anuanɛ, ɡɛ haa ɛa Ijipt harɛ a ba kɛ he le bela wɔrɔbe nɛɛ la. Hɛ́ɛ yerɔ wahala paanoo, ásɛ dɛ kpɔ dɛɛ lii he soɡa bini bwa tɔpere haa le Ijipt harɛ ta la.

⁴ Tɔpere la telaa, nomɛlbwa waa lɔ harɛ la ta bɛ ɡel paanoo iisi aa lɔ a ta do o dea tɔpera anuanɛ. Ásɛ ol haa kpoo tɔpere waa tɔ sie jɔmɔra la, hé di o bwa awola tenten.

⁵ He bɛ Galekaa kondɛɛre la kpo bwɛɛ bɛlbwa Korowii haa dɛ tomɔ aa kpɔa dɛɛ tɛ heyaa la ta.

⁶ Nemenɛ bwɛɛ waa lea tɛ heyaa ŋɔ hɛ́ɛ tomɔ o ta la ɡbo ta. Belaa chɛ kɛŋɔ hɛ́ɛ kpoa, jɔmɔra wee aa baa jo la, ɡɛ korobie la ne tɔpere haa kpɔa dɛ le Ijipt harɛ ta la.

⁷ Hé daa ol la, dɛ́ so bela haa dɛ tomɛ Korowii la dɛ́ chwe, ásɛ tɔɔ perɔ chɔa he kaa bela haa soɡa.

⁸ Tɔpera anumɛl aa tɔ sie la, he bɛ paanoo baa do iisi a ta di, ásɛ tɔpenuanɛ wee la he bɛ toma ɛ. Hé bwa cheme dɛ́ tomɛ Korowii haa dɛ tomɔ nɔ.”

Koo Kondikwaa Koma Tɔpejen dii

⁹ Mosis berɛ ŋɔ, “Hé kure yawanyoa anuanɛ le awola tɔpere haa pa mun komɛ mea la.

¹⁰ Ásɛ dɛ di Koo Kondikwaa Koma Tɔpejen Korowii haa dɛ tomɔ nɔ sɔn ta. Hé kpɔ kwaa he bambile aa lawa ba ɛ saraha tɛ Korowii. Andɛɛɡa waa ɡela he dɔ la taa chɛ kɛŋɔ hé nyiŋi dɛ́ ba kwaa la ne.

¹¹ Hé ne he bii, ne he bonɔɔna, ne toli ne Lewi dea tena, ne hɔɔhra ne bilalbii, dɛ luhaahna baa lɔ he bwɛɛre la ta bwa pɛ, dɛ́ lɛ sie bela Korowii aa lea tɛ heyaa ŋɔ hɛɛ tomɔ la.

¹² Hé lii kɛŋɔ he fa di somanjiri Ijipt harɛ ta ka, anomanta, hé nyiŋi kɛrɛdɛ dɛ́ɛ teŋɛ ɡɛ waa nɔ ta.

Kukure Tɔpejen dii

¹³ He baa komɛ mea dɛ lɔa tonɛ, dɛ chaa daa nɔna baa kpɔa dɛɛ ɛ sen la dɛ harama tonaa, hé kpɔ tɔpera anuanɛ di Kukure Tɔpejen la.

¹⁴ Hé ne he bii, ne he bonɔɔna ne toli, dɛ Lewi dea tena ne hɔɔhra, ne bilalbii, dɛ luhaahna baa lɔ he bwɛɛre la ta bwa pɛ, dɛ́ di lɛ he sie.

¹⁵ Hɛ́ɛ di tɔpejen nɔ tɔpera anuanɛ bela Korowii aa lea tɛ heyaa ŋɔ hé cheme dɛ́ɛ tomɔ la o sɔn ta. Hé ɡel he sie lɛ kɛŋɔ waa ɡela he kondikwaa ne he tomare do wer.

¹⁶ Benanyoa bɛlbwa, a chɛ kɛŋɔ baa bɛlbwa la bela Korowii aa lea tɛ heyaa ŋɔ hɛɛ tomɔ la, dɛ́ ka tomɔ kera atoro. Paanoo Iisi Aa Wola Toole a ta Tɔpejen la ne Koo Kondikwaa Koma Tɔpejen ne Kukure Tɔpejen la ta. Nomɛlbwa bɛ nɔŋɡbayeeɡa ne bela la,

¹⁷ nomɛlbwa nyiŋi ɡɛ Korowii aa swee andɛɛɡa tɛo o dɔ la ta dɛ́ tɛ.”

Sitɔɔla lee bá nyiŋi dɛɛ bol nɛra wa

¹⁸ Anee Mosis berɛ ŋɔ, “Bwɛɛ bɛlbwa Korowii aa ka kpɔ heyaa so o ta la, hé le nomonome ne nɛra báa nyiŋi he waa ta dɛ́ɛ bola kasinteŋ ne.

¹⁹ Hɛ́ɛ bol waa kasinteŋ dɛ bɛ a sie laa dɛɛ berɛ. He bɛ nɛra siebɔr dɛɛ nyiŋi, he bɛ ɡel baa yawɛ heyaa sen, dɛkalkɛŋɔ ɡɛ dɛ berɛ waa sie, dɛ berɛ ɡel nɛn waa jemɛ waa o waa dɔ kasinteŋ la ɛɛ teŋe nyosone.

²⁰ Hɛ́ɛ teŋɛ kasinteŋ waa ɡbo ta, ásɛ dɛ dɔ mkpa dɛ́ ka kpɔ harɛ la Korowii haa dɛ tomɔ aa kpɔa dɛɛ tɛ heyaa la.

Voɡare ane toma

²¹ He bɛ voɡhaah Asera dajaŋa paaɡe ja kon haa ɛo dɛɛ fuh saraha kwaa o ta dɛɛ tɛ Korowii haa dɛ tomɔ nɔ ta.

²² He bɛ bwe kpɔ pa dɛ́ɛ tomɔ. Korowii kii ɡɛ kwaa la.”