Mmarare 15 - mzwDBL

Bena baa kpɔ kema dɛɛ kɛ

¹ Mosis berɔ ŋɔ, “Bene anuanɛ bɛlbwa chemaa, nomɛlbwa waa di he kem la, ɡel kɛo.

² Kenii chɛ kɛŋɔ he ɛ. Nomɛlbwa o dɔŋ Israel te aa kemɛ suuɡa o be la, a chɛ kɛŋɔ ó ɡel á ta. O bɛ suuɡa la lɛ kpa bwa. Korowii ɡbabirii tɛ ɡɛ ŋwɛnɛ la.

³ Dɛ hɔɔh te di he kem aa lɛ, kɛ he bini bɛl te di o dɔŋ kem aa, wɛɛ berɛ lɛɛ.

⁴ Korowii haa dɛ tomɔ nɔ ɛɛ swee heyaa andɛɛɡa kohonaa, he bini bɛlbwa aa wola nya bwa, harɛ waa kpɔa dɛɛ tɛ heyaa la ta.

⁵ Dɛ hɛɛ no Korowii deŋna waa kɛrɛdɛ dɛ́ teŋɛ ɡɛ waa nɔ maa kpɔa dɛɛ tɛ heyaa fini nɔ ta tenaa.

⁶ Korowii haa dɛ tomɔ nɔ ɛɛ swee heyaa andɛɛɡaa, ɡɛ waa baɡɛ heyaa nyoa la. Harɛre nɛra ɛɛ baa kemɛ suuɡa he bee, kɛ he te aa ba bee la ka kemɛ bwa. Gɛ ɡee hɛɛ ba kpeɡri dii harɛre ɡalɡa nɛra nɛ, harɛ bɛlbwa nɛra te aa won di kpeɡri he nɛɛ bwa.

⁷ Dɛ a hiah he bini bɛl bwɛɛ bɛlbwa waa lɔ harɛ Korowii haa dɛ tomɔ nɔ aa kpɔa dɛɛ ba heyaa tɛɛ la ta naa, he bɛ nyubinikpeɡ ɛ dɛ́ vɛh o chae.

⁸ Hé ta tea, dɛ́ kemɔ anɔ la aa telu.

⁹ Dɛ benanyoa nɛn aa di he kem he ɡel a ta la dɛ tel, asɛ nomɛl ba dɛ ba kemɛ suuɡa he be naa, bɛ koh kɛŋɔ ɡɛ tɔpere la dɛ tel dɛ́ vɔmɔ. Bɛ ɡel ɡɛ liichɔɡa nɔ ba he nyu bini, ásɛ o bɛ ba wi no Korowii ta he nɛ, á ba ɛ wechɔɡa tɛɛ.

¹⁰ Bɛ on nyubinikpeɡ ɛ, ta tea dɛ́ kpɔ tɛo pɛɛpɛɛ, ásɛ Korowii ɡel he dɔ andɛɛɡa wobɛlbwa haa dɛ ɛ ta.

¹¹ Nyaara aa he binii paŋɛ harɛ la ta saŋ bɛlbwa. Anomanta, n dɛ do heyaa ŋɔ hé ta tea dɛ́ɛ cha a ɡɛ nɛra la.”

Yoma ɡela ba di ba nyuune

¹² Mosis berɔ ŋɔ, “Dɛ he dɔŋ Israel te, haah kɛɛ baa kpɔ o te tɛɛ suuɡa waa dɛ tomɛ kɛŋɔ yom bene anumɛl aa, bennuanɛ te la, tao ŋwɛnɛ dɛ́ ɡel o dɔ o te.

¹³ Dɛ he tɛo ŋwɛnɛ aa, bɛ ɡel o kaa pɛɛpɛɛ.

¹⁴ Tɛo he peera ne boohna ne mea dɛ sen haa dɔa la ane. Tɛo ɡɛ Korowii haa dɛ tomɔ nɔ aa ɡela he dɔ andɛɛɡa la.

¹⁵ Hé lii kɛŋɔ he fa di somanjiri Ijipt harɛ ta, asɛ Korowii lɛ heyaa le a ta. A waa mɛɛ do heyaa waa nɔ ta fini la.

¹⁶ Dɛ a ɛo kɛŋɔ he yom la ŋɔ waa he bee le, kɛ o dɛ nyin he ne he bii wa, he dɛ ɛo kɛrɛdɛ naa,

¹⁷ lawɛ o deŋne marɛ he dea ɡbera dɛ́ forɔ, ó ɛ he nɛndɔɔle saŋ bɛlbwa hale o serewe bena. Dɛ haahnee yaa, ɛ o ɡe ɡɛ.

¹⁸ Bɛ ɡel á do kpeɡri tɛ heyaa kɛ haa dɛ ta he yoma ŋwɛnɛ ba kpɔ ba te kaa. Dɛkalkɛŋɔ ba toma baa ɛa tɛ heyaa bene anumɛl la do kɛŋɔ paa tena banɛ toma. Korowii haa dɛ tomɔ nɔ ɛɛ swee andɛɛɡaa tɛ heyaa he wobɛlbwa haa dɛ ɛ la ta.”

Kondɛɛra biloɡla ambala wa

¹⁹ Anee Mosis berɛ ŋɔ, “Hé le he nae ne peera biloɡla aa ɛ ambala la cheɡ, a ɛ Korowii kwa. He bɛ he nae biloɡla kpɔ parɛ, he bɛ peera biloɡla ɡe pona fonɛ.

²⁰ Bela Korowii aa lea tɛ heyaa ŋɔ hɛɛ tomɔ la, belaa chɛ kɛŋɔ hé ne he haahna ne bii la ane bena bɛlbwa, dɛ́ ka kpoora dɛ́ dia Korowii sie.

²¹ Dɛ kondɛɛre la bɛlbwa di kirihiah o nakpala kɛɛ o sibie kɛɛ o bobɛl aa, he bɛ on kpɔ ka ɛ saraha tɛ Korowii.

²² Hé kpoo he dem, dɛ́ diu kɛŋɔ ɡɛ he yon la kpaah bɔr, dɛ́ ka kpo kweɡla kɛɛ ah dɛɛ dia la. Hale banɔ la baa kah doŋa, ne banɔ la baa wola doŋa kaeh Korowii be pera la bwa ɛɛ wonoo di.

²³ He bɛ a chale la te daa dɛɛ di, hé fuɡa ta kɛŋɔ nee ken.”