Mmarare 14 - mzwDBL

Kondikwa aa wera ne anɔ la aa wola were ne dii

¹ Mosis berɔ ŋɔ, “He ɛ Korowii haa dɛ tomɔ nɔ bii, anomanta, he bɛ nɛn waa sewa waa koh dɛɛ mɔne he bwara kɛɛ dɛɛ fonɛ he tili bɔra dɛɛ ta, ɡɛ nɛra baa wola Korowii tomɛ yon dɛɛ ɛ la.

² He ɛ Korowii nɛra dɛ do ɡoroŋ, onee le heyaa le harɛ nɔ nɛra bwa bini dɛ kpɔ heyaa ɛ o ɡbaɡba nɛra he wa ɛɛ su o siwi.

³ He bɛ komɛlbwa Korowii aa ŋɔa waa were ne dii la ba di.

⁴ Ola aa chɛ kɛŋɔ hé dia laanee nao ne pee dɛ booh,

⁵ ne ah ne welo, ne kweɡla.

⁶ Ol te bɛlbwa waa dɔ nafikoko a baah pere, asɛ o di kwaa dɛ́ berɛ won uɡa dɛ́ chwea la, anee chɛ kɛŋɔ hɛ́ɛ di.

⁷ Ola a nafikoko baah aa wola pere kɛɛ aa wola uɡe dɛɛ chwe la te, hɛ́ɛ berɛ a dii. Anomanta, hɛ́ɛ berɛ nyoɡma, ne chooma ne aah di. A lole kɛŋɔ a uɡo dɛɛ chwe te, kɛ a nafikoko baah ta pere, aa were ne dii.

⁸ Hɛ́ɛ berɛ parakoo ɡe dii, o nafikoko baah pero te kɛ waa kwaa di dɛ́ berɛ won uɡa dɛ́ chwe. Hɛ́ɛ berɛ a dii a ba ɛ kɛŋɔ hɛ́ɛ leɡe a lalaa.

⁹ Nee bini kwaa ɡe, anɔ la aa chɛ kɛŋɔ hé di laanee anɔ la aa dɔ pɛɡa ne kena,

¹⁰ kɛ a bini bɛlbwa waa wola kaaɡa ne pɛɡa dɔe la, aa were ne dii.

¹¹ Jumbii aa wera ne dii la, hé dia.

¹² Kɛ jumbii aa wola were ne dii laanee kee ne ɛɡre,

¹³ ne ɡbeelemɡbe dɛ kela,

¹⁴ ne ɡaahɡaah bwa soo siwi,

¹⁵ ne kɔlbiŋi ne koŋkolombie dɛ kɔle bwa soo siwi,

¹⁶ ne kwiu bwa soo siwi,

¹⁷ ne bɔmbɔm ne kɔkɔsaki dɛ ɡaahɡaah ane aa lɔ nee nyoa.

¹⁸ Dɛ nemorɛre bwa soo siwi dɛ jem.

¹⁹ Koŋɡaahla aa dɛ ɡah te bɛlbwa aa were, he bɛ an di.

²⁰ Kɛ koŋɡaahla aa wera ne dii la, hé dia.

²¹ He bɛ ol waa sewa ta baŋa la di. Hé kpɔ tɛ nɛra baa ɛ nɛŋhɔɔhra dɛ so he baah ta. Gɛ laa ɡe aa, hé yoɡ tɛ nɛn waa wola he nɛɛ jae. He ɛ Korowii nɛra dɛ do ɡoroŋ. He bɛ pebie kɛɛ bombie daa o nya elnee ne.”

Kwaa bini bɔna bɔre fi

²² Anee Mosis berɛ ŋɔ, “Bena bɛlbwa koo kwaa haa dɔ la, hé bɔne a bini bɔre fi dɛ laa bɔrbeŋkpoŋ kwaa cheɡ.

²³ Hé kpɔ he mea ne sen ne ɔleve noo haa bɔne a bini bɔre fi la bɔrbeŋkpoŋ, ne nao ne pee dɛ booh biloɡla kaa bela Korowii aa lea tɛ heyaa ŋɔ he tomɔ la, ásɛ dɛ ka dia o sie bela. Hɛ́ɛ ɛ ɡɛ dɛ́ che a ta dɛ́ɛ duu Korowii saŋ bɛlbwa.

²⁴ Dɛ bela ne he dem jaŋne kohona haa won che kwaa Korowii aa chae he dɔ la kaa bela aa,

²⁵ amɔ te yoɡa, dɛ́ kpɔ suuɡa la la bela Korowii haa dɛ tomɔ nɔ aa lea tɛ heya la.

²⁶ Dɛ́ kpɔ yawɛ komɛlbwa he pɛla aa lawa, nao kɛɛ pee kɛɛ sen, ásɛ he ne he dem tena bwa pɛ dia bela Korowii sie, dɛ́ kpɔ lɛ he sie.

²⁷ Hé bɛ Lewi dea tena baa lɔ hé baah ta baa wola harɛ dɔe dɛ́ parɛ la vɔmɛ.

²⁸ Bene atoro bɛlbwa ta la, he bɔne he koo kwaa bini bɔre fi, dɛ́ kpɔ bɔrbeŋkpoŋ cheɡ he bwɛɛre ta bela baa dɛ cheɡ kwa.

²⁹ Lewi dea tena la ta harɛ dɔe dɛ́ di o ta, anomanta, ɡɛ kondikwaa la ɛ ba ne hɔɔhra ne bilalbii ne luhaahna baa lɔ he baah ta la kwa. Anee ba ɡee ba dii dɛ vaɡɛ, ásɛ Korowii haa dɛ tomɔ nɔ swee heyaa andɛɛɡa he toma haa dɛ ɛa ta.”