Mmarare 13 - mzwDBL

Voɡare ane toma wa

¹ Mosis berɔ ŋɔ, “Dɛ keame nyosonteŋni bɛl kɛɛ nɛn waa won deera mun baɡla ba he be dɛ ba bol nyokpowaa bɛlbwa he be,

² asɛ waa waa bola la ɛ kpela, asɛ o ŋɔ he be ŋɔ, ‘Hé ɡel ya tomɛ voɡfala’ aa,

³ he bɛ a ɡɛ nɛn la be no. Korowii haa dɛ tomɔ nɔ dɛ daah heyaa, dɛ́ na kɛŋɔ he dɛ nyinu he bambile bwa ne he hweera bwa ne kɛɛ.

⁴ Korowii haa dɛ tomɔ nɔ nɛɛ chɛ kɛŋɔ hé teŋɛ, onee chɛ kɛ hé ɔmɛ. Hé teŋɛ o waa ta dɛɛ duuru, hé tomɔ dɛ́ kpɔ he te pɛlo.

⁵ Keame nyosonteŋni kɛɛ nɛn waa won deera mun baɡla la chɛ kpoe, o baɡle heyaa waa a ɡel he ɛ deŋnekpeɡ dɛ le Korowii haa dɛ tomɔ o le he ne somanjiri dii ta Ijipt harɛ ta la habɔɔ, dɛɛ nyin kɛŋɔ he laa he te kpɔ waa haa dɛ teŋɛ a ta la aa, hé kpoo dɛ́ le ɡɛ liichɔɡa la ne he bini.

⁶ He bini bɛlbwa dɔɔ kɛɛ o nime pɔrɔdɔ, kɛɛ o bibaa kɛɛ bihaah, hale o haah kwara kɛɛ o dansom lɔɡɔ ŋɔ, ó berɛ ka tomɛ voɡa he ne he naawa aa wola an tomɛ bwa,

⁷ nɛra baa bar heyaa nɔ voɡa oo, hale banɔ nɔ baa bɛne heyaa kɛɛ bojaŋa tena voɡa oo,

⁸ he bɛ sɛh, he bɛ on sie tɛ, he bɛ o sum ɡe na.

⁹ A chɛ kɛ hé kpoo! Tɔ sie ta bwe forɔ mɔɔ nomɛlbwa ɡe forɔ.

¹⁰ Hé foɡro bwea kpo, dɛkalkɛŋɔ o fe tɛɡre heyaa dɛɛ le Korowii haa dɛ tomɔ o le he ne Ijipt harɛ ta he fa aa di somanjiri bela la nɔn ta.

¹¹ Ásɛ Israel tena bwa no dɛ́ ɔmɛ, ásɛ bɛlbwa bɛ a ɡɛ wechɔɡa ŋwɛnɛ nɔ ta ba kpɔ kpa.

¹² Dɛ he baa no bwɛɛre Korowii haa dɛ tomɔ nɔ aa tɛ heyaa ŋɔ he so a ta la bɛl,

¹³ ɡɛ hiribi nɛra nɔ iro dɛɛ neɡre nɛra ŋɔ baa tomɛ voɡfala aa,

¹⁴ hé bɔɔ dɛ́ nyiŋi a bini kɛrɛdɛ. Dɛ ɡɛɛ kpela kɛŋɔ wedoŋa aa do ken chiɡ he bini naa,

¹⁵ hé kpoo ɡɛ bwɛɛ la tena bwa, dɛ́ chɔɡ bwɛɛ la bwa kwara, hale kondɛɛra aa lɔ bela bwa.

¹⁶ Hé pa kwaa aa lɔ bwɛɛ la ta bil bwɛɛ la baah ta bela baa dɛ cheme, ásɛ dɛ kpaa nii do bwɛɛ la ne kwaa la bwa ta tɛ Korowii kɛŋɔ saraha kwaa ken. Gɛ bwɛɛ la te, ó chɔ dimɡbia, ba bɛ on vɔrɔwe kpa.

¹⁷ He bɛ ɡɛ kwaa la bɛlbwa ba kpɔ, ásɛ a ba ɛ musu tɛ heya, ásɛ Korowii baah bɛ hé nɛɛ ba di. Ó na he sum, dɛ́ dɔ tedoma tɛ heya, dɛ́ ɡel he ya kohona ɡɛ waa baɡɛ he naawa nyoa la,

¹⁸ dɛkalkɛŋɔ he dɛ no Korowii haa dɛ tomɔ nɔ deŋna waa, dɛɛ teŋɛ o waa bwa maa kpɔa dɛɛ tɛ heyaa fini nɔ ta, dɛɛ ɛ anɔ la aa toɡra o be.”