Mmarare 12 - mzwDBL

Bobeŋkpoŋ baa dɛɛ tomɛ Korowii bela

¹ Mosis berɔ ŋɔ, “Dɛ hé baa tel harɛ Korowii he naawa aa tomɔ aa kpɔa tɛ heyaa ŋɔ hé so o ta la aa, Mmarare aa chɛ kɛŋɔ hé teŋɛ a ta laanee kɛŋɔ,

² hé ka chɔɡ nɛra haa dɛ la ka doŋ ba le harɛ la ta la voɡtubɔra aa lɔ bwejena ne deŋɡarere ne daa lɔɡre la bwa sekwara.

³ Hé kuuɡi bela baa kpoo kwaa dɛɛ tɛ ba voɡare, dɛ́ paɡre bwea baa paaɡa dɛɛ duura la. Dɛ́ berɛ fuh ba voɡhaah Asera dajaŋa, dɛ́ huɡri voɡa baa ɛa cheɡ dɛɛ toma la, dɛ́ chɔɡ a bwa le bela a waa bwa le kwara.

⁴ He bɛ Korowii haa dɛ tomɛ nɔ dɛɛ tomɛ ŋwɛnɛ baa kpɔ o ta dɛɛ tomɛ ba voɡa la.

⁵ Korowii haa dɛ tomɔ nɔɔ dɛɛ ba he deene la bwa baɡla harɛ la ta, bela waa dɛ nyin kɛŋɔ he bwa kaa cheme dɛɛ tomɔ.

⁶ Belaa chɛ kɛŋɔ hé kpɔ saraha kwaa haa fuh ne anɔ la haa kpoo tɛo, ne komɛlbwa haa dɔa bɔre fi bini bɔrbeŋkpoŋ ne he koŋkɛɛla ne deŋnesɔɔhna sarahare, ne he ɡbaɡba bambile bini kwa, ne he nae dɛ peera biloɡla dɛɛ la kaa tɛo.

⁷ Korowii sie belaa he ne he dem tena ɛɛ ba kwaa dii, dɛ́ɛ lɛ sie toma haa dɛ tomɔ nɔ wa.

⁸ Gɛ haa dɛ ɛ Korowii toma bonɔ fini nɔ, haa an ɛ bela ɡɛ haa dɛ nyin, ɡɛ nomɛlbwa aa dɛ lii kɛŋɔ a wer o be nɔ,

⁹ dɛkalkɛŋɔ he ta dɔe tel bela haa onɛ dɛ́ dɔ kapɛrɛ kwaa Korowii haa dɛ tomɔ nɔ aa kpɔa dɛɛ ba heyaa tɛɛ la.

¹⁰ Kɛ hɛɛ le Jɔɔdan Moo la baŋee, dɛ́ ka so bela Korowii haa dɛ tomɔ nɔ aa kpɔa dɛɛ ba heyaa tɛɛ ó ɛ he kapɛrɛ kon, dɛ́ ɡel he onɛ le he dɔma nɔn ta, ásɛ dɛ so deŋnesɔɔhna ta.

¹¹ Korowii haa dɛ tomɔ nɔ ɛɛ baɡle heyaa bobeŋkpoŋ bela he bwa aa ka cheme dɛɛ tomɔ. Belaa chɛ kɛŋɔ hé kpɔ saraha kwaa haa fuh dɛ́ kpɔ dɛɛ jaamo, ne kwaa haa kpoa dɛɛ tɛo, ne he komɛlbwa haa dɔa bɔre fi bini bɔrbeŋkpoŋ, ne he koŋkɛɛla kpɔe tɛo, ne he nyobaɡa kwaa ɡɛ maa ŋɔ he be saŋ bɛlbwa dɛɛ la.

¹² Belaa he ne he bibaala ne bihaahna ne bonɔɔna, dɛ he toli sie ɛɛ ba lɛɛ Korowii haa dɛ tomɔ nɔ sie, ne Lewi dea tena baa soɡe he bwɛɛre ta ba ɡbaɡba aa wola harɛ dɔe la.

¹³ Hé nyiŋi kɛrɛdɛ dɛ bɛ saraha kwaa haa kpo dɛ́ fuah tɛ Korowii la dɛɛ ɛ bobɛlbwa haa dɛ nyin.

¹⁴ Hé kpɔa ba bela Korowii aa le tɛ heya dɛ le he deene la bɛl harɛ ta la, belaa chɛ kɛ hé ɛ wobɛlbwa maa dɛ do heyaa a ta nɔ.

¹⁵ Kɛ kondɛɛra haa di he deremi te, hɛɛ wonoo kpoora bela haa soɡa, dɛ́ won chwe ɡɛ bɛlbwa Korowii haa dɛ tomɔ nɔ aa tɛ heya, ɡɛ haa dɛ chwe kweɡli ne ahre la. He banɔ la haa kah doŋa ne banɔ la haa wola doŋa kaeh Korowii be pera bwa ɛɛ wono chwe.

¹⁶ He bɛ a chale te di, hé teŋni a baŋa ásɛ chal la fuɡe kɛŋɔ nee ken.

¹⁷ Komɛlbwa haa wola kpɔe tɛ Korowii la, hé dia bela haa soɡa, nemenɛ he mea bɔre fi bini bɔrbeŋkpoŋ, he sen bɔre fi bini bɔrbeŋkpoŋ, ɔleve noo bɔre fi bini bɔrbeŋkpoŋ, ne he nae ne peera biloɡla, dɛ he nyobaɡa kwaa ne he bambile bini kwa, dɛ saraha bɛlbwa aa jaa.

¹⁸ He ne he bibaala ne bihaahna ne bonɔɔna ne toli, dɛ Lewi dea tena baa lɔ he bwɛɛre ta bwa chɛ kɛŋɔ hɛ́ɛ di a ɡɛ saraha kwaa nɔ Korowii haa dɛ tomɔ sie, bobeŋkpoŋ waa le tɛ heyaa la, dɛ́ ɡel he sie lɛ wobɛlbwa haa ɛa ta.

¹⁹ Hé nyiŋi kɛrɛdɛ dɛ bɛ Lewi dea tena la ba ta he soɡa bini bwa harɛ la ta.

²⁰ Dɛ Korowii haa dɛ tomɔ nɔ baa ɡel he harɛre do kan ɡɛ waa baɡɛ nyoa ŋɔ wɛɛ ɛo, asɛ he pɛla lawɛ ol kohona naa, hɛɛ wonoo chwe saŋ bɛlbwa haa dɛ nyin.

²¹ He harɛre la baa do kan asɛ bela haa chema dɛɛ tomɛ Korowii la do jaŋne aa, saŋ bɛlbwa haa dɛ nyin la, hɛɛ wonoo kpoo nae kɛɛ peera Korowii aa tɛ heyaa la, ásɛ dɛ chwe ola la he deremi ɡɛ maa ŋɔ he be la.

²² Hɛ́ɛ won dia ɡɛ haa dɛ di kweɡli ne ahre, hale nɛra baa kah doŋa ne banɔ la baa wola doŋa kaeh Korowii be pera bwa.

²³ Hé nyiŋi kɛrɛdɛ dɛ bɛ a chale la te di, dɛkalkɛŋɔ komɛlbwa chal ɛ o mkpa, a ta chɛ kɛŋɔ hé di chal la ja ol la ta.

²⁴ He bɛ chal la di, hé fuɡe ta kɛŋɔ nee ken.

²⁵ He bɛ an di, ásɛ a chiɡ he ne he bii ba taa dɛ ba bala la kɛrɛdɛ. He dɛ ɛ ɡɛ naa, dɛ he dɛ ɛ waa aa wera Korowii be.

²⁶ Saraha kwaa ne nyobaɡa kwaa la te, hé kpɔa la bela Korowii aa le cheɡ tɛ heyaa la.

²⁷ Ásɛ he kpɔ ol la ne chal la bwa ɛ saraha bela baa kpoo kwaa dɛ fuah dɛɛ tɛ Korowii la, dɛ́ fuɡe ol la bɛl ɡe chal ta bela baa kpoo kwaa dɛɛ fuah la, ásɛ dɛ di ol la te.

²⁸ Hé nyiŋi kɛrɛdɛ dɛɛ teŋɛ waa maa ŋɔ he be bwa ta, ásɛ a chiɡ he ne he bii ba taa dɛ ba bala bwa kɛrɛdɛ, ɡɛ haa dɛ ɛ waa aa wera dɛ toɡre Korowii haa dɛ tomɔ nɔ be.

²⁹ Dɛ Korowii haa dɛ tomɔ nɔ chɔɡ harɛre haa dɛ la ka so a ta la nɛra dɛ ɡel he so a ta naa,

³⁰ hé nyiŋi kɛrɛdɛ dɛ bɛ ŋwɛnɛre baa cheɡɛ a ta dɛɛ tomɛ ba voɡare la ba nyiŋi, dɛ́ ɡe ɛɛ teŋɛ a ta, a do kɛŋɔ bela, dɛ́ lawɛ heya.

³¹ He bɛ Korowii haa dɛ tomɔ nɔ tomɛ ŋwɛnɛ baa cheɡɛ o ta dɛ tomɛ ba voɡa la, dɛkalkɛŋɔ ba dɛ ɛ kii waa bwa soo siwi Korowii aa haah. Hale ba kpoo ba bibaala ne bihaahna dɛ fuuh ba dɛɛ tɛ ba voɡare.

³² Hé do sie dɛ́ ɛ waa maa do heyaa a ta nɔ, he bɛ waane kpɔ ja a ta, he bɛ ane ɡe laa kpɔ le a ta.”