Mmarare 11 - mzwDBL

Korowii nyina ne o duura

¹ Mosis berɔ ŋɔ, “Anomanta, hɛ́ɛ nyin Korowii haa dɛ tomɔ nɔ waa dɛ́ɛ teŋɛ o Mmarare bwa ta.

² Fini, hé lii dɛ́ berɛ ta sie na waa Korowii aa ɛa dɛ baɡle heya. Heyaa, he bii laa. Hé na ɡɛ Korowii wa aa dɔ nyɛl, ne o kan ne o kpeɡri,

³ dɛ nyokpowaa waa kpɔa ɛ Ijipt kooro ne harɛ la bwa nɛra.

⁴ He na waa waa ɛ Ijipt laa tena ne ba jaɡre, ne kwaa aa do kɛ torɔɡo ba vɔwɛ dɛɛ pɛla la. Gɛ saŋ baa ti heyaa ka tel Mposwɛm la ta dɛ bwa ka nee ta kwaraa la,

⁵ ne ɡɛ waa ɛa tɛ heyaa pua hɛŋle ɡbo harɛ ta ba tel bonɔ nɔ.

⁶ He na waa waa kpɔa ɛ Eliab bibaala Datan ne Abiram baa le Rubin dea, ɡɛ waa ɡela harɛ pere asɛ ba ne ba haahna ne bii, ne ba tɛnte deene ne ba bonɔɔna dɛ ba kondɛɛra bwa jo kaa harɛ bini he baah ta la.

⁷ He siwi na wejena nɔ Korowii aa ɛa bwa sekwaraa.

⁸ Anomanta, hɛ́ɛ teŋɛ Mmarare nɔ bwa maa dɛ do heyaa fini nɔ ta, ásɛ dɛ won ɡale Jɔɔdan Moo la, dɛ́ ka kpɔ harɛ la so,

⁹ ásɛ dɛ dɔ mkpajaŋ harɛpare ondɛɛɡe, Korowii aa ŋwɛɛ o waa he naawa be ŋɔ wɛɛ kpɔɔ tɛ ba ne ba naanar la.

¹⁰ Harɛ haa dɛ kaa o ta la ta doe kɛŋɔ Ijipt harɛ haa le o ta la. Ijipt harɛ he yon du kwaa dɛ́ pere nee bɔra tɛa dɛ́ dɔ nee dɛɛ do a ta la.

¹¹ Harɛ haa dɛ ba Jɔɔdan ɡala ka so o ta nɔ ɛ bwejena ne nenabɔjena harɛ bwaala aa dɛ nɛ o ta.

¹² O ɛ harɛ Korowii haa dɛ tomɔ nɔ aa dɛ nyiŋi o ta saŋ te bɛlbwa, o siwi lɔ o ta tɔpere bɛlbwa ka tel benanyoa aa ba cheme.

¹³ Anomanta, dɛ he teŋɛ Korowii Mmarare maa kpɔa dɛɛ tɛ heyaa fini nɔ ta, dɛ nyin Korowii dɛ tomɔ he bambile ne he hweera bwa ne naa,

¹⁴ wɛɛ ɡeloo bwaala nɛ heyaa saŋ aa chɛa ta, bwaala loɡla ne yoo bwaala bwa, ásɛ mea ne senfala ne ɔleve noo bu he nɛ,

¹⁵ dɛ́ berɛ ɡel he kondɛɛra dɔ kpɔɡa di, he ɡe dɔ kondikwaa di dɛɛ vaɡɛ.

¹⁶ Hé nyiŋi kɛrɛdɛ dɛ́ɛ berɛ he te laa dɛ́ kpɔ Korowii nɛɛ dɛ́ kaa tomɛ voɡa dɛ́ɛ ɡuŋa.

¹⁷ Ásɛ Korowii baah bɛ he nɛɛ di, dɛ́ ɡel bwaala ɡel nɛɛ hwel che he kooni kondikwaa chɔɡ, ásɛ he serewe le harɛdɛɛɡe waa kpɔa dɛɛ tɛ heyaa la ta.

¹⁸ Hé kpɔ waa nɔ do he nyuune ne bambili bini dɛɛ liira, hé ɛa kɛŋɔ nɔnloɡ dɛ́ kpɔ do nɔɔra, dɛ́ kpɔa vɔwɛ hé tili ta á ɛ waa chɔ dɛ́ɛ lii heya.

¹⁹ Hé bol baɡle he bii, hɛ́ɛ bola he dem soɡa ne he vala bini. He chɔe ne ira bini bwa, hɛ́ɛ bol a wa.

²⁰ Hé chwera dawɛ he deene ɡbeni daa ta ne he ɡbeni ta,

²¹ ásɛ he ne he bii dɔ mkpajaŋ harɛ Korowii aa baɡɛ he naawa nyoa ŋɔ wɛɛ kpɔɔ tɛ heyaa la ta. Gɛ nyundua aa saɡa biɡri la, ɡɛɛ he ɡe ɛɛ ba biɡra harɛ la ta.

²² Dɛ he no waa maa dɛ do heya a ta nɔ kɛrɛdɛ dɛ teŋɛ a ta kasinteŋ ne, dɛ nyin Korowii haa dɛ tomɔ nɔ dɛ duuru, dɛ kpɔ he te pɛlo waa,

²³ ate Korowii ɛɛ doŋi harɛre aa lɔ he sie la bwa nɛra baa wara dɛ do kpeɡri ɡwaa heyaa laanee ta, ásɛ he ka kpɔ ba harɛre la so.

²⁴ Bobɛlbwa haa kpɔ kaa la ɛɛ ɛ he konee. He harɛ ɛɛ le pua hɛŋle ɡbo harɛ la taa, dɛ́ kaa Lɛbanɔn dɛ́ berɛ le Yufretis Moo ta dɛ́ kaa wee cholibɔr Mɛdetereenea Mpo la ta.

²⁵ Nomɛlbwa toole dɛ́ won che he sie. Korowii ɛɛ ɡeloo bobɛlbwa haa kpɔ la nɛra ɛɛ ɔmɛ heyaa kohona, ásɛ a ka ɡɛ, ɡɛ waa baɡɛ nyoa la.

²⁶ Fini n kpɔ andɛɛɡa sweera ne nyotaahna dɛɛ bil he sie.

²⁷ Dɛ hé no Korowii waa nɔ dɛ teŋɛ a ta naa, hɛɛ dɔ andɛɛɡaa,

²⁸ kɛ dɛ he vɛoh dɛ laa he te kpɔ a ta dɛ kaa tomɛ voɡa tenaa, amɔ te nyotaahna ɛɛ lawɛ heyaa.

²⁹ Dɛ Korowii baa tel he ne harɛ haa dɛ́ la ka kpɔ so la ta naa, hé bol wedɛɛɡa waa Geresim Bwejen ta, dɛ́ berɛ bol nyotaahna waa Ebal Bwejen la ɡe ta.

³⁰ Gɛ bwejena nɔ lɔ Jɔɔdan Moo ŋwɛnɛ wee cholibɔr, Araba Fɛlembɔjen bela Keenan tena aa soɡa harɛ ta. A bɛne More dajena Gelɡal sideŋ.

³¹ He dɛ ba Jɔɔdan Moo la lee dɛ́ ka kpɔ harɛ Korowii aa kpɔa dɛɛ ba heyaa tɛɛ he so o ta la ta. He kaa kpɔ dɛ so o ta naa,

³² hé nyiŋi kɛrɛdɛ dɛɛ teŋɛ mmarare la bwa maa kpɔa dɛɛ tɛ heyaa fini nɔ ta.”