Mmarare 10 - mzwDBL

Korowii berɔ kpɔ bwepɛle anfala anɛ tɛ Mosis

¹ “Korowii berɔ ŋɔ men Mosis be a ɡɛ saŋ ja ŋɔ, ‘Sɛh bwepɛle anɛ á do kɛŋɔ wubwa kwaa la. Berɛ kwaa daa daka ja a ta, dɛ́ kpɔ teeh bwejen la ba n be.

² Ásɛ n chwerɛ waa n fa aa chwera dawɛ anɔ la haa laa paɡre la, ásɛ he kpɔ do daka la bini.’

³ Ate, n kpɔ akaasia daa dɛ kwaa daka la, dɛ berɛ sɛh bwea la a do kɛŋɔ wubwa kwaa la ken, dɛ kpɔa teeh bwejen la.

⁴ Asɛ Korowii ka chwerɛ waa o fa aa chwera dawɛ wubwa la, Mmarare fi o fa aa cheɡɛ nii ta bol he be bwe la ta, ɡɛ saŋ haa chema la, asɛ dɛ kpɔ tɛ mɛ.

⁵ Ate, n berɛ kpɔa tu dɛ ba kpɔ do daka la bini ɡɛ Korowii aa do mɛ la. A ta lɔ o bini ba le fini.”

⁶ Dɛ nɛra bane lole baa yer ba Jaakan tena. Israel tena baa tel ba buli ta dɛ so bela. Ba ir bela dɛ ba Mosera. Belaa sɔfo Arɔn sewɛ ba huɡo. O bibaa Eliasa ba chiɡ o naa ta, dɛ ɛ sɔfo.

⁷ Ba le bela dɛ kaa Gudɡuda, dɛ berɛ le bela kaa Jotbata. Nenabɔɔne ɡboo bela bwa.

⁸ Gɛ saŋee Korowii le Lewi dea tena ŋɔ baa nyiŋi O Ne Nɛwɛnyina Fɔo Daka la ta, dɛ́ berɛ ɛ sɔfore dɛ́ che o sɔn ta dɛɛ swee andɛɛɡa dɛɛ tɛ nɛra. A ta chɔ ɡɛ ba le fini.

⁹ Anee ɡela Lewi dea tena ta harɛ waa baɡ ba nyoa la pera dɔe kɛ ba bala la. Korowiirii ba kaparɛ kon, ɡɛ Korowii haa dɛ tomɔ nɔ aa ŋɔ ba be la.

¹⁰ “N berɔ so bwejen la ta tɔpera fifraanaarɛ webaŋa ne jwaana, ɡɛ n fa aa ɛa loɡla la, asɛ Korowii berɛ no n wesoŋa ja, dɛ ŋɔ waa heyaa kpoo.

¹¹ Ate, Korowii ŋɔ n be ŋɔ, ‘Kaa dɛ́ ka tɔ nɛra la sie, dɛ́ kpɔ ba kaa harɛ maa ŋwɛɛraa baɡle ba naawa ŋɔ mɛɛ kpɔɔ tɛɛ ba, bá ka so ó ɛ ba kon la ta.’ ”

Korowii ɔma

¹² Mosis berɔ ŋɔ, “Israel tena, waa Korowii aa dɛ nyin dɛ le he be taraken laanee kɛŋɔ, hɛ́ɛ ɔmɔ dɛ́ɛ teŋɛ o waa bwa ta, dɛ́ nyinu dɛ́ɛ tomɔ he bambile ne he hweera bwa ne,

¹³ ásɛ dɛ berɛ dɛɛ teŋɛ o Mmarare ne o waa maa dɛ do heyaa a ta fini nɔ, ásɛ a chiɡ heyaa kɛrɛdɛ.

¹⁴ Nyundua ne harɛ ne komɛlbwa aa lɔ o ta bwa ɛ Korowii haa dɛ tomɔ nɔ kwa.

¹⁵ Kɛ he naawa ɡbosoo nɛɛ Korowii kpɔ sie dawɛ kɛ wɛɛ nyin baa, dɛ berɛ le he nɛra haa ɛ ba naanar nɔ harɛre nɛra bwa bini, dɛ kpɔ heyaa ɛ o nɛra ɡɛ aa doa fini nɔ.

¹⁶ Anomanta, hé ɡel he tea to ásɛ dɛ bɛ deŋnekpeɡ ɛ kpa.

¹⁷ Korowii haa dɛ tomɔ nɔ ɡwaa voɡa bwa, onee dɔɔranar bwa Dɔɔ, O kan, o waa do ɔma kohona. Waa nɛn siebɔr nyiŋi, haa won yawɔ sen ɡe.

¹⁸ O dɛ nyiŋi bilalbii ne luhaahna kɛrɛdɛ dɛɛ nyin nɛŋhɔɔhra ɡe ba kondikwaa dii ne ba yale tɔe bini.

¹⁹ Anomanta, hé ɡe nyin hɔɔhra wa, dɛkalkɛŋɔ he ɡe fa ɛ hɔɔhra Ijipt harɛ ta ka.

²⁰ Hɛ́ɛ duu Korowii haa dɛ tomɔ nɔ, hé tomɔ. Hé kpɔ he te pɛlo, o ɡbo sɔn taa chɛ kɛŋɔ hɛ́ɛ ŋwɛɛ.

²¹ Hé kpɛɛro, onee Korowii haa dɛ tomɔ o ɛ wejena aa do ɔma kohona he na ka la.

²² He naawa ba fa aa kaa Ijipt harɛ ta la, dɛ ba lɔ nɛra fifraanuanɛ ɡbo. Kɛ taraken Korowii ɡelɔ he mun ya he warɛ kɛŋɔ weweela ken.”