Matiu 9 - mzwDBL

Gɛ Yeesu aa chah baa bɛl waa kuuɡa so

¹ Yeesu jo ɡbera ta dɛ ɡale moo la kaa o ɡbaɡba bwɛɛ ta.

² Belaa nɛra bane kpɔ weela te bɛl waa kuuɡa so fɔɔ kalaŋ ta dɛɛ chemo. Yeesu aa na ɡɛ baa yaradao la, o ŋɔ naate waa kuuɡa la be ŋɔ, “Sɔɔh bwara. Aa maɡroo, n bie. N kpɔ he wechɔɡa kɛɛ.”

³ Anee Tɔnjerema bane lii ba nyu bini ŋɔ, “Baa nɔ dɛ ɛ Korowii nɛnhɛla!”

⁴ Yeesu aa jemɛ waa aa lɔ ba nyu bini la, o ŋɔ, “Ɛrɛɛ hɛɛ lii musu waa nɔɔ?

⁵ Maa ŋɔ o be ŋɔ n kpɔ o wechɔɡa kɛo nɔ, ne kɛŋɔ maa ŋɔ o be ŋɔ ó ir dɛ́ valɛ, a bini umee kpeɡa ɔ?

⁶ Mɛɛ chaɡle heyaa kɛŋɔ Men Nɛn Bie dɔ kpeɡri harɛ nɔ ta kɛ ń kpɔ nɛra wechɔɡa kɛ ba.” Belaa o ŋɔ naate waa kuuɡa la be ŋɔ, “Ir dɛ́ kpɔ he kalaŋ kaa dem!”

⁷ Baa la den ir che dɛ kaa o dem.

⁸ Nɛnlaa la aa na a ɡɛ waa nɔ la, ɔmee laɡ ba, ba kpɛɛ Korowii kɛŋɔ waa tɛ nɛwɛnyini ɡe kpeɡri ŋɔ ó ba won ɛ a ɡɛ waa nɔ la.

Gɛ Yeesu aa yerɛ Matiu

⁹ Yeesu aa le bela dɛ valɛ dɛɛ kaa la, o kaa na baa bɛl waa dɛ lɛ toɔ baa yerɔ Matiu, dɛ o soɡe o toma ta dɛɛ lɛ toɔ. Anee Yeesu ŋɔ o be ŋɔ, “Ba teŋɛ n nɛ.” Asɛ Matiu ir dɛ teŋɛ o nɛ.

¹⁰ Yeesu la Matiu dem dɛ ka so tiɡ ta. Waa dɛ di kwaa la, toɔ lɛɛra baa dɛ bɔ apoo ne wechɔɡ-ɛɛra pirim baa ja o ne o habɔteŋra la nɛɛ baa di.

¹¹ Farisii tena bane aa na ɡɛ la, ba pɛɛ Yeesu habɔteŋra la ŋɔ, “Ɛrɛ waa he dɔɔ nɔ ne a ɡɛ nɛra nɔ pɛ dɛɛ di kwaa nɔɔ?”

¹² Yeesu no waa baa pɛɛra la, dɛ chaŋ ba ŋɔ, “Weela tenaa hiah tɛɛɡa te, bokpeɡa tena laa.

¹³ Hé ka kwaa hweli waa baa chwera bil heyaa ŋɔ, ‘He dɛ na he dɔŋa sum aa, anee mɛɛ nyin dɛ ɡwaa kɛ haa kpoo kwaa dɛɛ tɛ mɛ’ la. Nɛra baa dɛ lii ba te nɛndɛɛɡa waa laa n ba. Wechɔɡ-ɛɛra waa n ba, ásɛ ba charɛ ba liire.”

Nyoa vɔwa wepɛɛre

¹⁴ Jɔn waa dɛ sɔ nɛra Korowii nee la habɔteŋra ɡe baa pɛɛ Yeesu ŋɔ, “Ɛrɛ waa ya ne Farisii tena nɔ te yon dɛɛ vɔwɛ nyoa, asɛ he te habɔteŋra nɔ te aa wola nyoa vɔwɛ kwaraa nɔɔ?”

¹⁵ Anee Yeesu sɛɡ ba ŋɔ, “Baa aa lawɛ hanfale dɛ yerɛ o daamanar ŋɔ bá ba lɛ ba sie nɔ, baa berɔɔ so lɔr aa? Baa lɔree so. Kɛ tɔpere bɛl ɛɛ bao kɛŋɔ baa lawɛ hanfale jaa laanee le ba bini. Gɛ saŋ la te, baa vɔwɛ nyoaa.

¹⁶ Baa yafale yakwara kpɔe dɛɛ tɔ yabene bɔɔ. A ba ɡɛ naa, yafale yakwara la ɛɛ kɛɛroo le yabene la ta, ásɛ bɔɔ la berɛ do kan kohona.

¹⁷ Gɛɛ baa wola senfala kpɔe dɛɛ do loŋbena aa kɔɔhna bini dɛɛ tɔ a nyoa. Gɛ laa, dɛ sen la baa peraa, aa do kpeɡrii dɛ́ pere loŋa la á chɔɡ, ásɛ sen la fuɡe. Loŋfale binii baa do senfala, ásɛ a bwa won do wer.”

Bitolo bɛl waa sewa ne hanweela te bɛl wa

¹⁸ Yeesu ta aa dɛ bol waa nɔ la, cheremi dea nomoa bɛl baa ɡuŋi o sie dɛ ŋɔ, “N bie sewɔ taraken. Kɛ ba kpɔ nɔn dawɛ o nɛ, ásɛ o berɛ ir.”

¹⁹ Anee Yeesu ne o habɔteŋra la bwa ir teŋɛ o nɛ.

²⁰ Belaa haah bɛl chal aa fuɡo bene fi dɛ anɛ ba kpɔ Yeesu habɔɔ, dɛ ka leɡe o batakaare nyoa.

²¹ Dɛ o tɔ sie lii o nyu bini kɛŋɔ dɛ o leɡe Yeesu batakaare nyoa ɡbo kwaraa naa, wɛɛ ɡbaŋroo.

²² Yeesu ke nyiŋi dɛ na haah la, asɛ dɛ ŋɔ, “Tolo, sɔɔh bwara. He yarada haa yarada mɛ la ɡelɔ he ɡbaŋre.” Gɛ waa nɔ taa haah la ɡbaŋre.

²³ Belaa Yeesu jo cheremi dea nomoa la dem. Waa na ɡɛ nɛra aa dɛ hoh kalipere ne nɛra baa dɛ ɛ lwe la aa dɛ do ɡbɔɡa la,

²⁴ o ŋɔ ba be ŋɔ, “Hé bwa le dem bonɔ! Bie la ta sewɛ, domii o chɔ.” Waa ŋɔ ɡɛ la, ba mamɔ.

²⁵ Baa doŋi nɛra la bwa le dem bela tonɛ la, Yeesu jo dea bela tolo la aa chɔa la dɛ lawɛ o nɔn, asɛ tolo la ir dɛ dɔ bokpeɡa.

²⁶ Gɛ waa nɔ perɛ baah bela bwɛɛre la kɛrɛdɛ bwa ta.

Gɛ Yeesu aa chah nyoŋa banɛ bane

²⁷ Yeesu aa le bela dɛɛ kaa la, nyoŋa banɛ bane no o ɡbɔɡa, dɛ ir teŋɛ o nɛɛ dɛɛ yerɔ dɛɛ ŋɔ, “Devid Naa, na ya sum!”

²⁸ Yeesu aa kaa jo dem la, nyoŋa la joɔ puu, anee o pɛɛ ba ŋɔ, “He dɛ yarada mɛ kɛŋɔ mɛɛ wonoo chah heya aa?” Anee ba ŋɔ, “Ɔɔh, ya Dɔɔ.”

²⁹ Anee Yeesu kpɔ nɔn leɡe ba sie dɛ ŋɔ, “Gɛ haa dɛ yarada la, á ɛ ɡɛ tɛ heya.”

³⁰ Asɛ ba bwa berɛ dɛɛ na. Anee Yeesu kah ba sibeɡra ne ŋɔ, “He bɛ waa nɔ taa baɡle nomɛlbwa.”

³¹ Kɛ ba ɡarɔ le dɛ ka ɡel waa la perɛ baah bela bwɛɛre la bwa ta.

Gɛ Yeesu aa chah amumu bɛl

³² Nɛra la aa le dem bela dɛɛ kaa la, nɛra bane ɡe berɔ kpɔ baa bɛl kwaa aa dɛ ir o nɛɛ o bol waa kahonɛ ba Yeesu be.

³³ Yeesu aa doŋi kwaa la le o nɛɛ la, baa la den dɛɛ bol wa, asɛ nomɛlbwa waa lɔ bela la nyoa kpo. Ba ŋɔ, “Ya ta waa nɔ dɔŋa nae Israel harɛ nɔ ta bwa!”

³⁴ Anee Farisii tena la te ŋɔ, “Kwaa aa dɛ ir nɛra nɛɛ bwa kooroo tɛo kpeɡri o won kwaa doŋa nɛra nɛɛ la.”

Gɛ Yeesu aa na nɛra sum

³⁵ Yeesu ɡaaɡe bwɛjena ne anjeɡre bwa ta, dɛ bol Korowii Kora Amanesoma baɡ ba ba cheremi deene, dɛ chah nɛra baa we weela te bɛlbwa soo siwi.

³⁶ Waa na nɛnlaa la ɡɛ la, o dɔ tedoma tɛɛ ba, dɛkalkɛ ba ɛ nɛra ba bwara aa dɛ nyɛɡ baa wola Lɛɛ dɔe kɛ peera aa wola teɡre dɔe ken.

³⁷ Anee o kpɔ nɛra la maɡɛ konduula dɛ ŋɔ o habɔteŋra la be ŋɔ, “Koo kondikwaa la kan, kɛ tom-ɛɛra la lɔ tamaa ken dɛɛ ba a koma.

³⁸ Anomanta, hé soŋe Koo Te ásɛ o kpɔ tom-ɛɛra bane ba ja, bá ka ɛ a toma.”