Matiu 8 - mzwDBL

Yeesu aa chah baa bɛl weechɔɡa aa ɛ o bwara

¹ Yeesu aa le bwe la doa dɛ tu harɛ la, nɛnlaa teŋɛ o nɛ.

² Asɛ baa bɛl weechɔɡa aa ɛ o bwara ba, dɛ ba ɡuŋi o sie dɛ ŋɔ, “N Dɔɔ, hɛɛ sɛoh waa, hɛɛ wonoo ɡel n bwara kwaa.”

³ Yeesu tɛr o nɔn dɛ leɡo dɛ ŋɔ, “N sɛoh. N ɡelɔ he bwara kwaa.” Buɡ la ta, weela la den le o nɛ.

⁴ Anee Yeesu kaoh ŋɔ, “Bɛ nomɛlbwa be ŋɔ. Pa sie kaa Sɔfo be, dɛ́ kpɔ he te ka baɡlo ó pɛne, ásɛ he kpɔ kwaa ka tɛo ó kpo ɡɛ Mosis aa chaɡla la, á baɡle kɛ he weela la toole he nɛɛ kpa.”

Rom sooja nomoa bɛl bonɔɔ chaeh wa

⁵ Yeesu la Kapeeneɔm. Waa dɛ jo bwɛɛ la ta la, Rom sooja nomoa bɛl ba dɛ ba soŋo ŋɔ,

⁶ “N Dɔɔ, n bonɔɔ bwara dɛ weo. O kuuɡo chɔ dea, o bwara dɛ nyɛɡo taeh.”

⁷ Anee Yeesu ŋɔ, “Mɛɛ ka chaoh.”

⁸ Sooja nomoa la ŋɔ Yeesu be ŋɔ, “N Dɔɔ, n ta chɛɛ kɛŋɔ he ba n dem. Kɛ he cheɡɛ bonɔ ŋɔ wéela la le o nɛ aa, wɛɛ ɡbaŋroo,

⁹ dɛkalkɛ he dɔ wobɛlbwa kpeɡri. N ɛ nɛn maa lɔ nomonome bane lɔɡa, dɛ dɔ soojare do n ɡe lɔɡa. Mɛɛ wonoo ŋɔ bɛl be ŋɔ, ‘Kaa,’ ó kaa, dɛ́ berɛ ŋɔ onfale be ŋɔ, ‘Ba,’ ó ɡe ba. Mɛɛ wonoo ŋɔ n bonɔɔ be ŋɔ, ‘Ɛ ken tɛ mɛ,’ ásɛ o ɛ.”

¹⁰ Yeesu aa no ɡɛ la, o nyoa kpoo, o ŋɔ o habɔteŋra la be ŋɔ, “Kasinteŋ, n ta nɛn waa dɔ yarada kɛ baa nɔ nae bwa. N ta o yarada dɔŋ nae Israel tena kwaraa bini.

¹¹ Kasinteŋ, nɛra ɛɛ le wee leebɔr ne wee cholibɔree ba so Korowii Kora ta, ásɛ ba ne Abraham ne Aesek ne Jekɔb pɛ di kondikwaa bela.

¹² Ásɛ nɛra Korowii Kora la fe aa chɛ ba la, bá kpɔ ba ta biro ta, belaa wii ne weweele do.”

¹³ Anee Yeesu ŋɔ sooja nomoa la be ŋɔ, “Kaa dem. Gɛ haa yaradaa nɔ, á ɛ ɡɛ tɛɛ.” Buɡ la taa, nomoa la bonɔɔ la dɔ bokpeɡa.

Yeesu chah nɛndamanta bane

¹⁴ Yeesu la Pita dem dɛ ka na kɛ Pita helahaah bwara wɔrɔbɔ o chɔ kalaŋ ta.

¹⁵ Yeesu lawɛ o nɔn, weela la le o nɛ o bwara sɔɔhno, asɛ o ir dɛ daa kwaa tɛo.

¹⁶ Bɔr aa joa la, ba kpɔ nɛra kwaa aa dɛ ir ba nɛɛ ba Yeesu be, o kpɔ o nyoa wobol doŋi kwaa la le ba nɛ, asɛ dɛ chah weela tena ɡe.

¹⁷ Anɔ nɔɔ ɡela Korowii keame Aesaya waa waa bola bil la ɛ kasinteŋ. O bolɔ ŋɔ, “Onee laa ya ɡwɛɡra ne ya weela kpɔ ya nɛ.”

Gɛ Yeesu nɛɛ teŋa aa kpeɡa

¹⁸ Yeesu aa na nɛnlaa la aa baro cheme la, o ŋɔ o habɔteŋra la be ŋɔ bá le Galilia Moo baŋ.

¹⁹ Tɔnjereme bɛl balɔ dɛ ba ŋɔ o be ŋɔ, “Nomoa, bobɛlbwa haa dɛ la la, mɛɛ teŋɛ he nɛɛ kaa.”

²⁰ Anee Yeesu ŋɔ o be ŋɔ, “Manyajeɡre kwaraa dɔ bɔɔne dɛɛ chɔ a bini, asɛ jumbii aa dɛ ɡah nyundua ɡe dɔ a kɔne. Kɛ Men Nɛn Bie te ta bobɛlbwa dɔe ń chɔ dɛ́ onɛ.”

²¹ Anee o habɔteŋra la bɛl ŋɔ, “N Dɔɔ, ɡel n la, ásɛ n mɛɛ baa sewaa ń huɡo mɔɔ dɛ́ ba teŋɛ he nɛ.”

²² Anee Yeesu chaŋo ŋɔ, “Hé te teŋɛ n nɛ, dɛ́ ɡel nɛra baa wola Korowii mkpa dɔe, dɛ do kɛ nɛra baa sewa Korowii ta la ɛɛ huɡe ba dɔŋa.”

Yeesu sɔɔh peujen bɛl nyoa

²³ Yeesu jo ɡbera bini, o ne o habɔteŋra la ɛɛ kaa.

²⁴ Buɡ la ta, dɛ peujen bɛl dɛ ta moo la sie, asɛ nehɛma ɡel ba ɡbera la ɛɛ ba mora. A ɡɛ saŋ nɔ dɛ Yeesu te chɔ dom ɡbera la bini.

²⁵ O habɔteŋra la kaa chumu dɛ ŋɔ, “Ya Dɔɔ, lɛ yaa! Ya dɛ ba serewa!”

²⁶ Anee Yeesu ŋɔ, “Oo! Ɛrɛɛ hɛɛ ɔmɛ kohona ɡɛ nɔɔ? Haa men yarada kwaraa!” Asɛ o den ir, dɛ kɔr peujen la ne nehɛma la ŋɔ á ɡel ɡɛ. Waa bol ɡɛ la, dɛ bɔr denɔ hel kerkerker ken.

²⁷ A ɛ nɛra la bwa nyokpoa baa pɛɛ dɔŋa ŋɔ, “Nɛn besoo siwii nɔ, peu ne nehɛma ɛɛ no o wobol nɔɔ?”

Baala banɛ bane kwa aa dɛ ir ba nɛɛ weela chaeh

²⁸ Yeesu aa le moo la baŋ dɛ ba Gadara harɛ ta la, baala banɛ bane kwa aa dɛ ir ba nɛɛ le lala huɡribɔr dɛ ba chemo. Wechɔɡa baa dɛ ɛ nomanta, dɛ nomɛlbwa aa won bela baa lole kpɔ.

²⁹ Baa chemo la, ba den kpɔ takpeɡ ŋɔ, “Bɔkwaa hɛɛ nyin ya be nɔ, Korowii Bie? He dɛ ba ba do yaa weweele mɔɔ ya weweele nae saŋ la tel kɛɛ?”

³⁰ Dɛ parako damanta ane lɔ ba jwɛɛh bela dɛɛ di kwa.

³¹ Anee kwaa aa dɛ ir baala la nɛɛ la soŋe Yeesu ŋɔ, “Dɛ hɛɛ doŋi yaa te naa, ya dɛ soŋe, ɡel ya ka so parakooni nɔ nɛ.”

³² Yeesu kɔra ŋɔ, “Hé kaa!” Asɛ a bwa den le ka so parakooni la nɛ, asɛ a ɡe bwa den ɡbomɛ biribiribiri, dɛ wili diŋɡoŋ ka le moo la ta dɛ serewe.

³³ Nɛra baa dɛ nyiŋi parakooni la chwao kaa bwɛɛ la ta, dɛ ka bol waa aa chiɡ bela la bwa, ne waa aa pu baala la kwaa aa dɛ ir ba nɛɛ la wa.

³⁴ Anomanta, nɛra baa lɔ bwɛɛ la ta la bwa chwao dɛ ba cheme Yeesu, asɛ baa baa nao la, ba soŋo ŋɔ ó le ba harɛ ta.