Matiu 7 - mzwDBL

Dɔŋa pwaeh wa

¹ Yeesu berɔ ŋɔ, “He bɛ he dɔŋa dɛɛ pwah, ásɛ Korowii ɡe bɛ heyaa pwah,

² dɛkalkɛ ɡɛ haa dɛ pwah he dɔŋa la, ɡɛɛ Korowii ɡee ba heyaa pwaeh. Kon haa kpɔa maɡɛ kwaa tɛ he dɔŋ la tentenee baa ba kpɔe maɡɛ tɛ he ɡe.

³ Ɛrɛɛ hɛɛ bol he dɔŋ wechɔɡa tama wa, haa wola he te wechɔɡdamanta dawɛ nɔɔ?

⁴ A do kɛŋɔ dabor aa lɔ he siwi ta haa wola on kpɔe, dɛ ŋɔ he dɔŋ be ŋɔ ó ɡel he laa dapuɡri kpɔ o siwi ta.

⁵ Nɛn haa dɛ nyiŋi nɛra sie mɔɔ dɛɛ ɛ wa! Tɔ sie laa dabor la kpɔ he siwi ta mɔɔ, dɛ́ won na kɛrɛdɛ dɛ́ laa dapuɡri waa lɔ he dɔŋ siwi ta la kpɔ.

⁶ Dɛ hé dɛ bol Korowii Amanesoma dɛɛ baɡle nɛra, asɛ baa no dɛ ɛa kɛ wesalee yaa, hé ɡel ba, dɛkalkɛŋɔ he kpɔ kondɛɛɡa tɛ nyootena aa, aa wola a waa jemɛ la, aa ɡelaa dɛ́ ba dorome. He kpɔ kondɛɛɡa ta parakooni ɡe aa, aa tiɡri a taa dɛ́ laa chɔɡ.”

Konnyina soŋa Korowii be wa

⁷ Anee Yeesu berɛ ŋɔ, “Hɛ́ɛ soŋe Korowii, wɛɛ tɛ heyaa. Hɛ́ɛ nyin he konnyina o be, hɛɛ dɔɔ. Hé swɛɛ siwi dɛɛ lɔ ɡbera, wɛɛ ya heyaa.

⁸ Nomɛlbwa waa dɛ soŋo la dɛ dɔ, asɛ nomɛlbwa waa dɛ nyin o konnyina dɛɛ le o be la, o dɛ tɛo. Gɛɛ Korowii ɛɛ ba ɡbera yae dɛ́ tɛ nomɛlbwa waa dɛ lɔ la.

⁹ He bini umee o bie ɛɛ nyin paanoo, ásɛ o kpɔ bwe tɛo wɔ?

¹⁰ Kɛɛ dɛ o dɛ nyin pɛŋe aa, ó ka lawɛ harɛkon ba tɛo wɔ?

¹¹ Dɛ he wechɔɡ-ɛɛra nɔ kwara jemɔ dɛ kpɔ kondɛɛɡa dɛɛ tɛ he bii aa, ɛrɛ waa he Mɛɛ waa lɔ nyundua la te aa wola kondɛɛɡaa kpɔ tɛ nɛra baa dɛ soŋo wɔ?

¹² Gɛ haa dɛ nyin kɛ nɛra ɛ dɛɛ tɛ heyaa la, hé ɡe ɛ ɡɛ tenten dɛɛ tɛɛ ba. A ɡɛɛ dɛɛ baɡle Mosis Mmara la, ne Korowii keamere la webaɡla la bini kɛrɛdɛ.”

Ŋwɛnɛ waa feela wa

¹³ Yeesu berɔ ŋɔ, “Ŋwɛnɛre anɛɛ lole, bɛl do feelɔɔ ken, bɛl ɡe paɡri. Hé kpɔ ŋwɛnɛfeelɔɔ la ta, dɛkalkɛ onɔ la waa paɡa la dɛ́ kaa he ne seo ta. O ta kpɔe pwɛre. Anomanta, nɛra baa dɛ kpɔ o ta warɔ.

¹⁴ Kɛ onɔ la waa do feelɔɔ la dɛ́ kaa he ne mkpa ta. O ɡe ta kpɔe kpeɡri. Anomanta, nɛra tama kenii jema dɛɛ kpɔ o ta.

Daa ne o nɔna wa

¹⁵ Hɛ́ɛ nyiŋi nyosonteŋna baa ŋɔa Korowii keameree ban la kɛrɛdɛ. He na ba aa, ba pwɛre kɛŋɔ peera ken. Kɛ ba bini te, ba sie beɡre kwaa kɛ ɡboli ken.

¹⁶ Ba we-ɛɛla taa hɛɛ ba cheɡa dɛ́ jem ba. Kpeele aa won nɔnɛ kɛɛ, ɡɛɛ sɔɔh daa ɡe aa wola won nɔnɛ fiɡ nɔna.

¹⁷ Dadɛɛɡe nɔna wer, dachɔɡe te nɔna aa were.

¹⁸ Dadɛɛɡe aa won nɔnɛ nɔnchɔɡa, ɡɛɛ dachɔɡe ɡe aa wola won nɔnɛ nɔndɛɛɡa.

¹⁹ Daa bɛlbwa waa wola nɔndɛɛɡa nɔnɛ la, baa teŋo ta dɛ́ fuuh.

²⁰ Anomanta, nyosonteŋna la we-ɛɛla taa hɛɛ ba cheɡa, dɛ́ jemɛ kɛ Korowii keamere laa ban.

²¹ Nɛra baa dɛ yer mɛ ‘N Dɔɔ, n Dɔɔ’ la bwa laa dɛɛ ba Korowii Kora la bini dɔe dɛ́ ja, nemenɛ banɔ la baa dɛ ɛ n Mɛɛ waa lɔ nyundua la tetoowa.

²² Tɔpejen maa ba la baa tel aa, nɛra ɛɛ warɔɔ dɛ́ baa bol n be ŋɔ, ‘N Dɔɔ, he sɔn ne laa ya bol Korowii Waa la aa? He sɔn ne laa ya doŋi kwaa nɛra nɛɛ la aa, kɛɛ he sɔn ne laa ya ɛ nyokpowa damanta la bwa la aa?’

²³ A taa mɛɛ ba ba be ŋɔe ŋɔ, ‘Maa heyaa jemɛ bwa. Hé le n sie bonɔ, wechɔɡ-ɛɛra bane!’

Demamaala banɛ bane wa

²⁴ Nomɛlbwa waa no n waa nɔ, dɛ ɛ ɡɛ aa dɛ baɡle la, do kɛ wejereme bɛl waa ma o dea chɔŋɛ bwe ta.

²⁵ Bwaala nɛo, nenapala suuɡi, asɛ peujena ta. Kɛ dea la ta chole, dɛkalkɛ dɛ o chɔŋɛ bwe ta.

²⁶ Nomɛlbwa waa no n waa nɔ, asɛ o ta ɡɛ aa dɛ baɡle la ɛɛ la do kɛ ɡɛne bɛl waa ma o dea hɛŋle harɛ ta.

²⁷ Bwaala nɛo, nenapala suuɡi, asɛ peujen ta, asɛ dea la chole biram!”

²⁸ Yeesu aa bol waa la tonɛ la, o webaɡla la ɛ nɛnlaa la nyokpoa,

²⁹ dɛkalkɛ a ta do kɛ ɡɛ Tɔnjerema la yon dɛɛ baɡle la. O te dɛ bol waa kɛ nɛn waa dɔ waa bwa kpeɡri ken.