Matiu 5 - mzwDBL

Som nae ne tebinichɔɡ wa

¹ Yeesu aa na nɛnlaa la la, anee o teeh bwejen bɛl dɛ ka so, asɛ o habɔteŋra la baro cheme,

² asɛ wɛɛ baɡ ba waa dɛɛ ŋɔ,

³ “Nɛra baa kpɔ ba te dawɛ Korowii nɛɛ kɛ nyaara la, ba na som, dɛkalkɛ banee dɛɛ ba Korowii Kora la koobii ɛɛ.

⁴ Nɛra baa dɛ wi taraken la, ba na som, dɛkalkɛ Korowii ɛɛ larawe ba bwaraa.

⁵ Nɛra baa dɛ pwɛr ba te la, ba na som, dɛkalkɛ Korowii nyobaɡa la, banee o baɡɛ tɛ.

⁶ Nɛra ba sie aa beɡre waa aa toɡra dɛɛ su Korowii siwi la, ba na som, dɛkalkɛ Korowii ɛɛ cha baa a ta kɛrɛdɛɛ bá dɔa ba tetoora.

⁷ Nɛra baa dɛ na nɛra sum la, ba na som, dɛkalkɛ Korowii ɡee na ba sumii.

⁸ Nɛra ba tea bini aa toa la, ba na som, dɛkalkɛ banee dɛɛ ba Korowii nae.

⁹ Nɛra baa dɛ larawe waa dɛɛ sɔɔh waa nyoa la, ba na som, dɛkalkɛ Korowii ɛɛ yer ba o biirii.

¹⁰ Nɛra baa dɛ ɛ waa aa dɛ su Korowii siwi, nɛra koh a waa dɛɛ ɛɛ ba hɔhɔrɔwa la, ba na som, dɛkalkɛ banee dɛɛ ba Korowii Kora la koobii ɛɛ.

¹¹ Dɛ nɛra koh teŋa haa teŋɛ n nɛɛ nɔ waa dɛɛ chɛɡre heya, dɛɛ ɛ heyaa hɔhɔrɔwa, dɛɛ teŋe nyosone, dɛ bol musu waa bɛlbwa dɛɛ dawɛ he nɛ aa, he na som.

¹² Hé ɡel he sie lɛ kohona, dɛkalkɛ he kembɔr kan taeh Korowii be. Gɛɛ ba kpɔ ɛ Korowii keamere baa tɔ sie la.

Yar ne nii waa dɛ chaah wa

¹³ He do kɛŋɔ yar aa dɛ kwaa dɔr nɛwɛnyina bwa bini. Dɛ yar aa somɛ kpa aa, ɛrɛɛ baa ba a ɛɛ á do som jaɔ? A ta wejema dɔe bá ɛ kpa. Fuɡaa a den chɛ kɛŋɔ bá fuɡa ta dɛ́ tiɡri a ta.

¹⁴ He do kɛŋɔ nii waa dɛ chaah bɔr nɛwɛnyina bwa bini. Bwɛjen waa dawɛ deŋɡare doa la aa won sɔh.

¹⁵ Nomɛlbwa aa kandea choŋi dɛ́ kpɔ kon dɛɛ pi o ta. Kɛ ba dɛ choŋu dɛ́ kpɔ chɔŋɛ kon ta, ásɛ o chaah tɛ nɛra baa lɔ dem bela la bwa.

¹⁶ Gɛɛ chɛ kɛŋɔ hé chaah tɛ nɛra, ásɛ ba na he wedɛɛɡa ɛɛ, dɛ́ duu he Mɛɛ waa lɔ nyundua la.”

Korowii Mmara la waa baɡla

¹⁷ Yeesu berɔ ŋɔ, “Hé bɛ dɛɛ lii kɛ n balɔ dɛ́ ba chɔɡ Mosis Mmara la ne waa Korowii keamere la aa chaɡla la. A chɔɡa laa n ba. N balɔ dɛ́ ba ɡel á dɔ mun kɛrɛdɛ.

¹⁸ Kasinteŋ, nyundua ne harɛ taa lole nɔ, Mmara nɔ bini wejeɡa bɛlbwa aa lee ba, hale dɛ́ ka tel wobɛlbwa jaɡa saŋ.

¹⁹ Anomanta, naate waa berɛ Mmara la bini onjeɡa bɛlbwa dɛ́ berɛ chaɡle bane ɡe bá ɛ ɡɛ la, waa bɔr dɔe ba Korowii Kora bini. Naate ɡe waa dɛ teŋɛ Mmara la ta, dɛ́ chaɡle bane ɡe baa ɛ ɡɛ la, wɛɛ dɔ nomonsoŋnibɔree Korowii Kora bini.

²⁰ Kasinteŋ, n dɛ ŋɔ he be, dɛ he wedɛɛɡa ɛɛ ta Tɔnjerema ne Farisii tena wedɛɛɡa ɛɛ ɡwaalaa, haa won ja Korowii Kora ta ŋwɛnɛ bɛlbwa ta.

Nɛŋkpoa wa

²¹ He noɔ kɛ ba ŋɔ saŋ la tena be ŋɔ, ‘He bɛ nɛn kpo. Nomɛlbwa waa kpo nɛn la, o ɛ wechɔɡa kɛŋɔ bá bol o waa dɛ́ pa bole.’

²² Kɛ taraken, n dɛ ŋɔ he be, nomɛlbwa o baah aa di o dɔŋ nɛɛ la, o ɛ wechɔɡa kɛŋɔ bá bol o waa dɛ́ pa bole. Nomɛlbwa ɡe waa yerɛ o dɔŋ nɛnsala la chɛ kɛ ó che Juu tena nomonome bwa sie. Ásɛ nomɛlbwa o ɡe aa yerɛ o dɔŋ koŋɡɛne bɛl la, a chɛ kɛ bá tao Bɔnsam nii ta.

²³ Anomanta, dɛ he kpɔ jam kwaa dɛɛ la ká tɛ Korowii bela baa dɛ fuh kwaa dɛɛ tɛo la, dɛ lii kɛ he ne he dɔŋ bɛl dɔ waane aa,

²⁴ ɡel he kwaa la bela, dɛ́ la ka nyin he dɔŋ la hé ne o nyoa ka pɛ mɔɔ he ba kpɔ he kwaa la tɛ Korowii.

²⁵ Dɛ he ne he dɔŋ dɔɔ, asɛ o kpɔe dɛɛ kaa kɔɔto aa, larawo hé kwaa he baah. Gɛ laa aa, o dɔɔ tel he ne bela aa, kɔɔto nomoa la ɛɛ kpɔe tɛ prosiri bá ka doe dea.

²⁶ Kasinteŋ, dea belaa hɛɛ ba kae ka tel ɡɛ saŋ haa bɔ he kem la bwa, kapɛrɛ ɡba aa wola ka mɔɔ ba lee.”

Jwamane wa

²⁷ Yeesu berɔ ŋɔ, “He noɔ kɛ ba fa aa ŋɔa ŋɔ, ‘He bɛ jwamane dɛɛ bɔ.’

²⁸ Kɛ taraken n dɛ ŋɔ he be ŋɔ, he naate haa na haah dɛ nyiŋu he pɛla do o nɛɛ la, he bɔ jwamane he bambile bini.

²⁹ Anomanta, dɛ he diɡ siwi ɛɛ ɡeloo he ɛ wechɔɡa aa, fomo ta! He fomo ta kwaraa bɔ kɛ haa kpɔ sibie anɛ kaa Bɔnsam nii ta.

³⁰ Dɛ he nɔndiɡ ɛɛ ɡeloo he ɛ wechɔɡa aa, teŋo ta! He teŋo ta kwaraa bɔ kɛ haa kpɔ nɔɔra anɛ kaa Bɔnsam nii ta.

Baa ne haah dɔŋa vɛɛh wa

³¹ Ba fa ŋɔ nomɛlbwa dɛ ba o haah vɛɛh yaa, ó chwerɛ tɔn tɛo dɛ́ vɛoh.

³² Kɛ taraken te, n ŋɔ baa bɛlbwa o haah naa wola baala nyine, asɛ o vɛoh la, o di bolchɔɡe, dɛkalkɛ o ɡelɔ haah la bɔ jwamane. Asɛ naate ɡe waa bera ka mo haah la baa vɛoh la, o ɡe bɔ jwamane.”

Korowii nyoa baɡa ne ŋwɛɛra wa

³³ Anee Yeesu berɛ ŋɔ, “He noɔ kɛ baa ŋɔ saŋ la tena be ŋɔ, ‘He bɛ waa haa baɡɛ nyoa dɛ ŋwɛɛ a ta la ta koni. Hé ɛ waa la tɛ Korowii.’

³⁴ Kɛ n dɛ ŋɔ he be ŋɔ, he bɛ ŋwɛɛ kwaraa. He bɛ nyundua ŋwɛɛ, dɛkalkɛ Korowii soŋnibɔree.

³⁵ He bɛ harɛ ŋwɛɛ, o natiɡribɔree. He bɛ bwɛjen Jerusalam ŋwɛɛ, Koojen bwɛɛ bela.

³⁶ He bɛ he nyu ɡba ŋwɛɛ. Haa won ɡel he nyumpon beŋkpoŋ ɡba to, ɡɛɛ haa wola won ɡel ó bir ɡe.

³⁷ Ba dɛ bɔɔre waa dɛ a ɛ kpela aa, sɛh ŋɔ, ‘Ɔɔh,’ dɛ nyosone ɡee yaa, ŋɔ, ‘Ɔɔhɔh.’ He bol waane ja a ta naa, amɔ a te le Bɔnsam be.

Wechɔɡa kem bɔe wa

³⁸ He noɔ kɛ ba fa aa ŋɔa ŋɔ, ‘Dɛ nɛn fome he siwi aa, hé ɡe fome o siwi. Dɛ nɛn fome he nyen aa, hé ɡe fome o nyen.’

³⁹ Kɛ taraken te n ŋɔ, dɛ nomɛl ɛɛ wechɔɡa aa, bɛ wechɔɡa kpɔ bɔɔ kem. Dɛ nomɛlbwa kpaa he diɡ lwɛɛma aa, berɛ ɡal lwɛɛma la ɡe tɛo ó kpaa ja.

⁴⁰ Dɛ nomɛl dɛ nyin kɛ ó kpɔe la kɔɔto, dɛ ka lɛ he batakaare aa, kpɔ he yal ɡe jao.

⁴¹ Dɛ kpeɡnɛn ɡe dɛ doe ŋɔ hé che o bone ka doo kwansini beŋkpoŋ naa, che ka doo kwansini anɛ.

⁴² Dɛ nomɛl soŋe komɛl aa, kpɔ tɛo. Dɛ nomɛl ɡe ŋɔ o dɛ nyin komɛl dɛ kemaa, kpɔ kemɔ.

Dɔma nyina wa

⁴³ He noɔ kɛ ba fa aa ŋɔa ŋɔ, ‘Hé nyin he daamanar dɛ́ hah he dɔma.’

⁴⁴ Kɛ taraken n dɛ ŋɔ he be, hé nyin he dɔma dɛ́ soŋe Korowii dɛɛ tɛɛ ba,

⁴⁵ ásɛ nɛra jemɛ kɛ he ɛ he Mɛɛ waa lɔ nyundua la bii, dɛkalkɛ o te ɡelɔ wee lɔ dɛɛ tɛ wechɔɡ-ɛɛra ne nɛndɛɛɡa bwa, dɛ nɛ bwaala ɡe dɛɛ tɛ nɛndɛɛɡa ne wechɔɡ-ɛɛra bwa.

⁴⁶ Dɛ he dɛ nyin nɛra baa dɛ nyin heyaa ɡbo aa, kembɔr besoo hɛɛ ba dɔe le Korowii be nɔ? Toɔ lɛɛra baa ɛ wechɔɡ-ɛɛra ɡba dɛ nyin nɛra baa dɛ nyin ba wa.

⁴⁷ Dɛ he ne he chamene tena ɡbo dɛ bol wa aa, dɛ amee he ɛ ɡwaa he bala ɔ? Hale nɛra baa wola Korowii tomɛ ɡba won ɡɛ ɛɛ!

⁴⁸ A chɛ kɛŋɔ hé we-ɛɛla bwa do kaih, ɡɛ he Mɛɛ waa lɔ nyundua la waa aa do kaih la.”