Matiu 3 - mzwDBL

Jɔn waa dɛ sɔ nɛra Korowii nee wa

¹ A ɡɛ saŋ la, dɛ baa bɛl waa dɛ sɔ nɛra Korowii nee baa yerɔ Jɔn ba Juda harɛ pua hɛŋle ɡbo harɛ la ta, dɛ baa bol Korowii Waa ŋɔ,

² “Hé charɛ he liire le he wechɔɡa ta, dɛkalkɛ Korowii Kora pu heyaa tonɛ.”

³ Jɔn nɔ waa Korowii keame Aesaya faa bol la. O ŋɔ, “Nomɛl dɛ bol waa takpeɡ ne pua hɛŋle ɡbo harɛ ta dɛ ŋɔ, nɛ́ra ɡel ba we-ɛɛla toɡre, dɛ́ kpɔ ba te dɛɛ kpa ba Dɔɔ bala.”

⁴ Gɛ Jɔn nɔ, nyoɡma pona nee ba sɔh o yal, asɛ o kpɔ ol tɔn ɛ kiriso dɛɛ vɔwɛ o chara. O kondikwaa ɡee tontombɛ ne tooh.

⁵ Dɛ nɛra le Jerusalam ne Juda harɛ ta bobɛlbwa, ne bwɛɛre aa lɔ Jɔɔdan Moo la nyoa bwa dɛɛ ba o be.

⁶ Ba bol ba wechɔɡa chaɡlo waa, dɛ o sɔ ba Korowii nee moo la ta.

⁷ Jɔn aa naa kɛ Farisii ne Saduki tena ɡe warɔ dɛɛ ba o be ó sɔ ba Korowii nee la, o ŋɔ ba be ŋɔ, “Nɛnchɔɡa kɛŋɔ domkpuli bii baa do nii kpɔɡ ta asɛ a le dɛ chwa dɛɛ kaa la! Umee ŋɔ he be ŋɔ hɛɛ wonoo chwa le Korowii bandia ta nɔ?

⁸ Hɛ́ɛ ɛ waa aa dɛ chaɡle kɛŋɔ he charɛ he liire le he wechɔɡa ta.

⁹ He bɛ dɛɛ lii kɛŋɔ haa ɛ Abraham naanar la ɡbo ɛɛ wonoo ɡel he chwa Korowii bandia la. Kasinteŋ, Korowii ɛɛ wonoo ɡel bwea nɔ beɡre Abraham naanar.

¹⁰ He do kɛŋɔ daa. Daa bɛlbwa waa wola nɔndɛɛɡa nɔnɛ la, baa teŋoo ta dɛ́ fuuh. Gɛɛ Korowii ɡe ɡɔɔ o kpanfɛ nɛra baa wola ba liire charɛ la nɛɛ dɛɛ ba ba teŋna ta, dɛ́ kpɔ ba do nii ta bá fuh.

¹¹ N te, nee n kpɔ dɛɛ sɔ heyaa Korowii nee dɛ chaɡle kɛ he charɛ he liire le wechɔɡa ta. Kɛ naate waa ba n habɔɔ la te, wɛɛ kpɔ Korowii Domadɛɛɡe ne niinii sɔ heya. O ɡwaa mɛ. Maa o napaa tee kwaraa dɔ.

¹² O do kɛŋɔ paa waa cheɡɛ o pɛla ta, dɛ kpɔ o te dɛɛ ba mea pala. Wɛɛ palɛ a bwaa kɛrɛdɛ ken, ásɛ dɛ pa ka do dɔndɔŋ bini cheɡ. Kɛ a pɛɡa la te, wɛɛ kpɔ nii aa wola dime bwaa fuah.”

Yeesu Korowii nee sɔe wa

¹³ Gɛ saŋee Yeesu le Galilia harɛ dɛ ba Jɔɔdan Moo la nyoa Jɔn be ŋɔ ó sɔɔ Korowii ne.

¹⁴ Dɛ Jɔn fe dɛ nyin vɛɛh, dɛ ŋɔ, “Menee chɛ kɛŋɔ ń ba he be hé sɔ mɛ Korowii ne, ɡɛɛ he ba n be naa?”

¹⁵ Anee Yeesu ŋɔ, “Taraken nɔ te, sɔ mɛ. He sɔ mɛ naa, ɡɛɛ yaa ba wona ɛ wedɛɛɡa aa dɛ su Korowii siwi la bwa.” Asɛ mɔɔ Jɔn sɛh dɛ sɔɔ nee la.

¹⁶ Waa sɔɔ Korowii nee la tonɛ la, Yeesu le nee la ta dɛ ba che baŋ. Nyundua pilo, asɛ o na Korowii Domadɛɛɡe o do kɛŋɔ borɔnoma ken dɛ ba so o nɛ.

¹⁷ Asɛ taa bɛl le nyundua ŋɔ, “N bie maa dɛ nyinu o wa ɛɛ su n siwii nɔ.”