Matiu 27 - mzwDBL

Ba lawɛ Yeesu ka che Paelet sie

¹ Tɔɔ aa pera chɔmbibi la, Korowii Dea Sɔfonomonome bwa ne ba harɛ la nomonome chemo dɛ vɔrɔwe Yeesu kpoe vɔrɔwa,

² dɛ vɔrɔwe o nɔɔra, dɛ kpɔɔ ka tɛ Rom nomoa Paelet waa dɛ nyiŋi bela harɛ ta.

Judas seo wa

³ Judas la waa le Yeesu tɛ ba dɔɔ lawɛ la aa bera na kɛ ba dɛ nyin ba kpo Yeesu la, a we o nɛ, asɛ o berɛ charɛ o liire kɛŋɔ o fe jemaa, o fe ta suuɡa la lɛɛ dɛ le Yeesu tɛ, asɛ dɛ berɛ kpɔ suuɡapoŋa fifraatoro la ka tɛ Sɔfonomonome la ne bwɛɛ nomonome la, dɛ ŋɔ,

⁴ “N ɛ wechɔɡa kɛ maa le nɛn waa wola wechɔɡa bɛlbwa ɛɛ tɛ heyaa ŋɔ hé ka kpoo nɔ.” Anee nɛra la ŋɔ, “Ya te waane laa, a bwa do kɛ hen.”

⁵ Anee Judas kpɔ suuɡapoŋa la viɡri Korowii Dea bela, asɛ dɛ ka saɡɛ o te.

⁶ Sɔfonomonome la pa suuɡa la dɛ ŋɔ, “Suuɡa nɔ ɛ chal suuɡa, asɛ ya mmarare ɡe aa yaa ŋwɛnɛ tɛ kɛŋɔ ya won kpɔ suuɡa nɔ ja Korowii Dea suuɡa ta.”

⁷ Anomanta, ba bwa nyoa pɛo kɛŋɔ bá kpɔ suuɡa la ka yawɛ harɛ bɛl waa ɛ vimamaa harɛ, ásɛ dɛɛ huɡe hɔɔhra baa wola Juu tena ɛɛ bela.

⁸ A waa ɡela baa yerɛ bela harɛ la Chal Harɛ dɛ ba le fini la.

⁹ Waa Korowii keame Jeremia fa aa bola la ɛ kpela. O fa ŋɔ, “Ba lɛ suuɡapoŋa fifraatoro, ɡɛ Israel tena nyoa aa pɛa ba di o yoɡ la,

¹⁰ asɛ dɛ kpɔ ɡɛ suuɡa la ka yawɛ vimamaa harɛ la ɡɛ Korowii aa ŋɔ n be la.”

Yeesu aa cheɡɛ Paelet sie wɛɛ pɛɛro wa

¹¹ Dɛ Yeesu ɡe cheɡɛ nomoa Paelet sie. Asɛ Paelet bɔɔro ŋɔ, “Henee Juu tena kooro ɛ?” Asɛ Yeesu ŋɔ, “Anee he bol la.”

¹² Sɔfonomonome ne harɛ nomonome la teŋe nyosone dawɛ Yeesu nɛ, kɛ Yeesu ta ban chaŋɛ.

¹³ Asɛ Paelet bɔɔro ŋɔ, “Wedamanta nɔ bwa baa kpɔa dɛɛ dawɛ nɔ, haa no kɛɛ?”

¹⁴ Yeesu ta wobɛlbwa chaŋɛ, o ta a bɛlbwa tɔeh, asɛ nomoa Paelet nyoa kpo kohona.

Ba ŋɔ a chɛ kɛ bá kpo Yeesu

¹⁵ Dɛ o dɔ we-ɛɛle bɛl waa dɛ ɛ bena bɛlbwa. A ɡɛ tɔpejen la baa tel aa, wechɔɡ-ɛɛ te bɛlbwa baa doo dea asɛ bwɛɛla la ŋɔ ó fooru ta la, a chɛ kɛŋɔ ó fooru ta.

¹⁶ A ɡɛ saŋ la, dɛ ba do baa bɛl baa dɛ yerɔ Barabas nomɛlbwa aa dɛ no o sɔnchɔɡe dea.

¹⁷ Asɛ baa ba Paelet be o bɔɔ ba ŋɔ, “Barabas ne Yeesu baa dɛ yerɔ Kristo la, ba bini umee hɛɛ nyin ń fooru ta tɛ heya ɔ?”

¹⁸ Dɛ o ɡbabir jemɔ kɛŋɔ bɔweela waa ba che Yeesu nɛɛ pɛɛpɛɛ dɛ kpɔɔ ba o be la.

¹⁹ Nomoa Paelet aa soɡe o kara ta dɛɛ bol waa la, o haah tomɛ nɛn o be ŋɔ, “Nyiŋi kɛrɛdɛ dɛ bɛ baa la wobɛlbwa ɛ. Nɛndɛɛɡe tentenee. Gɛ maa dee o waa fini nɔ la, a we n nɛɛ taeh.”

²⁰ Jaah dɛ Sɔfonomonome ne bwɛɛ nomonome la do nɛnlaa la bwa ŋɔ bá ŋɔ Barabasee baa nyin kɛ Paelet foo ta ásɛ dɛ kpo Yeesu.

²¹ Anee Paelet bɔɔ ba ŋɔ, “Nɛra banɛ nɔ bini umee hɛɛ nyin ń foo ta tɛ heya ɔ?” Asɛ ba ŋɔ, “Barabas.”

²² Belaa o berɛ bɔɔ ba ŋɔ, “Aah ɛrɛɛ he ŋɔ ń ɛ Yeesu nɔ baa dɛ yerɔ Kristo nɔɔ?” Asɛ ba bwa pɛ ŋɔ, “Kpaaro pɛl daɡaɡre ta!”

²³ Anee Paelet bɔɔ ba ŋɔ, “Ɛrɛɛ yɔ? Bɔkwa wechɔɡaa o ɛɔ?” Ate, dɛ ba berɔ kwaa ŋɔ kohona ŋɔ, “Kpaaro pɛl daɡaɡre ta!”

²⁴ Nomoa Paelet aa naa kɛ dɛ o ŋɔ o saɡɛ waa la ta naa, waa aa ba la aa wer doe ba la, o ɛ nee dɛ samɛ o nɔɔra nɛnlaa la bwa sie dɛ ŋɔ, “N laa dɛɛ do heyaa ŋɔ hé kpo nɛndɛɛɡe nɔ. He ɡbaɡbaa dɛɛ ɛ he wa!”

²⁵ Anee nɛra la ŋɔ, “Ɔɔh, hé te ɡel o seo wobɛlbwa dawɛ ya ne ya naanar nɛ!”

²⁶ Belaa Paelet le Barabas ta, ɡɛ baa dɛ nyin la, dɛ ɡel ba lɔɔ Yeesu bampɔrɔ ŋwɛɛra ne mɔɔ dɛ kpɔɔ tɛ ŋɔ bá ka kpaaro pɛl daɡaɡre ta.

Gɛ soojare aa muɡli Yeesu baah

²⁷ Asɛ soojare la kpɔ Yeesu le kaa nomoa Paelet dem, dɛ yerɛ ba bala soojare la bwa ba ba baro cheme,

²⁸ dɛ laa o laala foo, dɛ kpɔ yaswɛm bɛl kɛŋɔ ba bela kooro yal ba tɔɔ,

²⁹ dɛ kpɔ sɔɔhne sɔh kooɡbɛrɛ piu, dɛ kpɔ daa bɛl do o nɔndiɡ ta, dɛɛ ɡuŋu harɛ kɛŋɔ baa dɛ ɛ kooro la dɛɛ taramo dɛɛ si, “Woowo, Juu tena kooro!”

³⁰ Asɛ dɛ ta nentane dɛɛ ta o nɛ, dɛ kpɔ daa la dɛɛ cha o nyu.

³¹ Baa muɡli o baah tonɛ la, ba laa yal la foo o bwara ta, dɛ kpɔ o ɡbaɡba laala o fa aa doa wubwa la doo, dɛ kpɔɔ le dɛɛ kaa dɛ́ ka kpaaro pɛl daɡaɡre ta.

Ba kpaa Yeesu pɛl daɡaɡre ta

³² Baa dɛ kaa la, ba kaa na Sairini baa bɛl baa dɛ yerɔ Seemɔn. Ba ɛɡro o lɛ Yeesu daɡaɡre la che.

³³ Asɛ ba ba bela baa dɛ yerɔ Gɔlɡɔta la. Gɔlɡɔta munii Nyuhoɡ Bɔr.

³⁴ Asɛ ba kpɔ koŋkpelakpela ane koo sen ta dɛ kpɔ tɛ Yeesu ŋɔ ó nyɔ. Waa daɡa na la, o vɛh nyɔe.

³⁵ Ba foo o laala, dɛ kpaa o nɔɔra ne o nakpale pɛl daɡaɡre ta. Dɛ soojare la dɛ nyin Yeesu laala bɔna, dɛ ta chacha mɔɔ dɛ́ won jemɛ laala ba bɛlbwa aa di.

³⁶ Gɛɛ ba ɛ mɔɔ dɛ ba so dɛɛ nyiŋu.

³⁷ Ba chwerɛ o wechɔɡa waa ɛa ba koh a waa kpoo la pɛl o daɡaɡre la ta o nyundua. A ɡɛ waa laanee, yeesu, juu tena kooroo nɔ.

³⁸ Belaa ba kpaa ŋwɛɛra banɛ pɛl daɡaɡra ta ja Yeesu nɛ, bɛl saɡɛ o diɡ ta, bɛl ɡe saɡɛ o ɡal ta.

³⁹ Nɛra baa kpɔ bela bɔr baa kaa la chɛɡre Yeesu dɛɛ muɡli o baah ŋɔ,

⁴⁰ “Chwa! Nɛn waa dɛ ba Korowii Dea paɡra dɛ́ won kpɔ tɔpera atoro mao la laa nɔ ɡbao? Lɛ he te! Dɛ henee Korowii Bie la aa, le daɡaɡre la doa tu harɛ yá na!”

⁴¹ Gɛɛ Sɔfonomonome ne Tɔnjerema ne bwɛɛ nomonome muɡli o baah ɡɛ banɔ la aa ɛa la,

⁴² dɛ ŋɔ, “Ao! O won bane te lɛɛ, kɛ waa won lɛ o te ɡbaɡba. Kɛ Israel tena kooroo yɔ. Hé ɡel ó tu le daɡaɡre la doa ba harɛ yá na ásɛ dɛ yaradao.

⁴³ O ŋɔ Korowii nɛɛ o sie dawɛ, dɛ ŋɔ Korowii Biee on. Dɛ o waa dɛ lɛ Korowii sie te naa, amɔ Kórowii ba lɛo taraken.”

⁴⁴ Dɛ ɡɛɛ ŋwɛɛra baa kpaa ba pɛl daɡaɡra ta ja o nɛɛ la ɡee chɛɡro.

Yeesu seo

⁴⁵ Wee aa baa che nyufala la, bɔr biro jumaa ken dɛ ka tel wekee saŋ mɔɔ dɛ berɛ chaah ja.

⁴⁶ Wekee saŋ aa baa tel la, Yeesu do lɔŋɔ kpeɡri nɛɛ dɛ ŋɔ, “Eli, Eli, lama sabaktani?” O munii kɛŋɔ, “N Mɛɛ Korowii, n Mɛɛ Korowii, ɛrɛɛ he chwa mɛ nɔɔ?”

⁴⁷ Nɛra baa cheɡɛ bela la aa no ɡɛ la, ba ŋɔ, “Hɛ́ɛ no! Elaejaa wɛɛ yerɛ la.”

⁴⁸ Asɛ bɛl chwa buɡ la ta, dɛ ka kpɔ konjɔɡɔjɔɡɔ bɛl waa dɛ lɛ nee ka li sennyɛɡa ta dɛ kpɔ toh daa ta, dɛ kpɔ pao ó nyɔ.

⁴⁹ Nɛra baa kaa la ɡe ŋɔ, “Hé ɡel ya na, dɛ Elaeja ɛɛ ba lɛo wa aa?”

⁵⁰ Belaa Yeesu berɛ do lɔŋɔ kohona, asɛ dɛ ɡel o doma kaa, o den sewɛ.

⁵¹ Waa sewa la, ate dɛ yal waa teŋe Korowii Dea la baah ta la pere anɛ le nyundua ba ta harɛ. Harɛ jiɡro, asɛ bwetala bini peɡri,

⁵² lalbɔɔne pili, asɛ Korowii nɛra baa serewa kɛrɛdɛ ir seo ta.

⁵³ Yeesu aa ir seo ta la, ba ɡe le ba lalbɔɔne bini dɛ ka jo bwɛjen Jerusalam, asɛ nɛra kɛrɛdɛ na ba.

⁵⁴ Sooja nomoa ne o soojare baa dɛ daah Yeesu la aa na ɡɛ harɛ aa jiɡra ne waa aa chiɡa la, ba ɔmɔ, asɛ ba ŋɔ, “Korowii Biee baa nɔ kpela!”

⁵⁵ Dɛ haahna warɔ dɛ che bojaŋ dɛɛ nyiŋi. A ɡɛ haahna nɔɔ teŋɛ o nɛɛ le Galilia harɛ dɛ daa kondikwaa dɛɛ tɛo.

⁵⁶ Ba bini banee Mɛɛre waa le Maɡdala la, ne Jems ne Josef nya Mɛɛre, dɛ Sebedii bii la nya.

Yeesu huɡa

⁵⁷ Awola jɔmɔra la baa bɛl baa dɛ yerɔ Josef, o le Arimatea dɛ ɛ suuɡate balɔ. Dɛ o ɡba ɛ Yeesu habɔteŋra la bɛl,

⁵⁸ dɛ ɡe la Paelet be dɛ ka soŋo ŋɔ ó tɛo ŋwɛnɛ ó ka kpɔ Yeesu lale la. Paelet sɛh dɛ kpɔ tɛo.

⁵⁹ Anee Josef kpɔɔ, dɛ kpɔ yapondɛɛɡe bɛl dɛ fɔrɔwo,

⁶⁰ dɛ kpɔɔ ka huɡe lalbɔɔ o ɡbaɡba aa forɛ bwe bɛl ta o do kɛŋɔ dea ken baa wola nomɛlbwa o bini huɡe mɔɔ la, dɛ ɡbili bwejen bɛl tɔ o nyoa, asɛ dɛ le bela kaa.

⁶¹ Dɛ Mɛɛre waa le Maɡdala la ne o dɔŋ Mɛɛre la soɡe bela, asɛ ba sie pa lalbɔɔ la ta baa nyiŋi.

Yeesu lalbɔɔ daahna

⁶² Awola tɔpere la, dɛ Juu tena dɛ kpɔ ba te ásɛ tɔɔ peraa, bá di ba Ona Tɔpere. Tɔ aa pera la, Sɔfonomonome ne Farisii tena la kaa cheme nomoa Paelet dem,

⁶³ dɛ ŋɔ o be ŋɔ, “Nomoa, ɡɛ saŋ a ɡɛ nyosonteŋni nɔ aa wola sewɛ mɔɔ la, dɛ o dɛ bol ŋɔ dɛ o sewaa, tɔpera atoro wɛɛ iruu ja.

⁶⁴ Anomanta, do nɛra bá kaa daah lalbɔɔ la mɔɔ tɔpetooro wee la tel. A waa laa aa, o habɔteŋra la ɛɛ ka ŋwɛ lale laanee le bɔɔ la bini, dɛ́ ka teŋe nyosone baɡle nɛra bwa ŋɔ iraa ba Dɔɔ la ir. Dɛ ɡɛ laa aa, neɡra baa dɛ ba ŋwɛnɛ dɔe ka neɡre nɛra nɔ ɛɛ dɔ bɔree che ɡwaa ɡɛ baa tɔ sie neɡre nɛra la bwa.”

⁶⁵ Anee nomoa Paelet ŋɔ ba be ŋɔ, “Soojaree la. Hé ɡel bá ka daah bɔɔ la. Ŋwɛnɛ te bɛlbwa haa kpɔ o ta ásɛ ba bɛ won ka ŋwɛ lale la la, hé kpɔ o ta.”

⁶⁶ Anee ba ka ɛ ɡɛ baa ɛ bwa nɛn bɛ won ka ŋwɛ lale la. Ba kaa maa lalbɔɔ la ne bwe la baa kpɔa tɔ o nyoa la bobɛl pɛ ɡɛ aa ɛ dɛ nomɛl ŋwɛo jo bɔɔ la bini naa, ba won jemɛ, asɛ dɛ berɛ kpɔ soojare so bela ŋɔ báa daah bela.