Matiu 26 - mzwDBL

Yeesu kpoe vɔrɔwa wa

¹ Yeesu aa chaɡ ba ɡɛ waa nɔ tonɛ la, o ŋɔ o habɔteŋra la be ŋɔ,

² “Gɛ haa jema la, kerele ɡbosoroo baa di Galekaa Tɔpejen kondikwaa la. A taa baa ba Men Nɛn Bie lee tɛ nɛra bá kpaa mɛ pɛl daɡaɡre ta, dɛ́ kpo mɛ.”

³ Anee Sɔfonomonome ne bwɛɛ nomonome ka cheme Sɔfonomoa Kaefas dem,

⁴ dɛ ka so dɛɛ nyin ŋwɛnɛ baa che o ta dɛ́ lawɛ Yeesu dɛ́ kpoo nomɛlbwa aa wola jemɛ.

⁵ Baa chema la dɛ ba berɔ ŋɔ, “Yaa won lawɛ baa nɔ ɡɛ tɔpejen nɔ ta, dɛkalkɛ nɛra noɔ waa, aa werii do. Bwɛɛ nɔ ɛɛ vuuɡuu.”

Ba fuɡe noo do Yeesu nyu ta

⁶ Dɛ Yeesu lɔ Bɛtani dɛ do Seemɔn weechɔɡa fa aa chɔɡ o bwadabii la dem.

⁷ Yeesu aa lɔ dem bela dɛɛ di kwaa la, haah bɛl kpoŋe nosɔɔhsoma ane a yoɡ aa kpeɡa a su loŋ bɛl dɛ ba o be, asɛ dɛ ba fuɡe do Yeesu nyu ta.

⁸ Yeesu habɔteŋra la aa na ɡɛ haah la aa ɛa la, a di ba baah, ba kpɔ bandia pɛɛ ŋɔ, “Kwaa nɔ ɡe chɔɡa nɔ mun ɔ?

⁹ O fe yoɡ nosɔɔhsoma nɔ naa, o fe aa suuɡaa dɔ a warɛ ó kpɔ tɛ nyaaraa?”

¹⁰ Yeesu aa no ɡɛ baa dɛ bol la, o pɛɛ ba ŋɔ, “Ɛrɛ waa hɛɛ pwah haah nɔ nɔɔ? Wedɛɛɡa tentenee o ɛ tɛ mɛ la.

¹¹ Nyaara te, he ne banee lole tɔperee bwa, kɛ n te aa he bee do ka tonɛ.

¹² Haah nɔ nosɔɔhsoma nɔ waa fuɡa do n nyu ta nɔ, n seo waa o ɛ ɡɛ la.

¹³ Kasinteŋ, harɛ nɔ ta bela bwa baa bol Amanesoma nɔ la, baa bol waa haah nɔ aa ɛa nɔ belaa, a ɛ sɔn tɛo dɛɛ la.”

Judas sɛoh kɛ wɛɛ le Yeesuu tɛ

¹⁴ Ate, Yeesu habɔteŋra fi dɛ banɛ la bini beŋkpoŋ baa dɛ yerɔ Judas Eskareɔt la Sɔfonomonome la be

¹⁵ dɛ ka pɛɛ ba ŋɔ, “Dɛ n ba Yeesu ne ba tɛ heyaa aa, aŋwɛnɛɛ hɛɛ ba n tɛɛ yɔ?” Anee Sɔfonomonome la kure suuɡapoŋa fifraatoro do o nɔn ta.

¹⁶ Dɛ le ɡɛ saŋ la, Judas pa mun dɛɛ nyin ŋwɛnɛdɛɛɡe waa won che o ta, dɛ́ le Yeesu do ba nɔn ta.

Kondikwaa baa dia dɛ kpɔ dɛɛ lii Yeesu

¹⁷ Paanoo Iisi Aa Wola Toole a ta tɔpeloɡle la taa, Yeesu habɔteŋra la ba o be dɛ ba bɔɔro ŋɔ, “Leperaa hɛɛ nyin kɛŋɔ ya ka ɛ Galekaa kondikwaa la tɛɛ he dio?”

¹⁸ Anee Yeesu ŋɔ, “Hé la bwɛjen bini, hɛɛ na baa bɛl maa jemɔ ásɛ dɛ ŋɔ o be ŋɔ, ‘Nomoa la ŋɔ o tɔpere telo ŋɔ o ne o habɔteŋra dɛ ba bá di Galekaa kondikwaa la he dem.’ ”

¹⁹ Yeesu habɔteŋra la kaa ŋɔ ɡɛ waa ŋɔa la, asɛ dɛ daa Galekaa kondikwaa la cheɡ bela.

²⁰ Bɔr aa joa la, Yeesu ne o habɔteŋra la laŋɔ dɛ ka so dɛɛ di kwaa la.

²¹ Baa dɛ di kwaa la, Yeesu ŋɔ ba be ŋɔ, “Kasinteŋ, he bini bɛlee dɛɛ ba n lee tɛ bá kpo mɛ.”

²² Waa ŋɔ ɡɛ la, o habɔteŋra la teene bini chɔɡɔ kohona, asɛ baa pɛɛro beŋkpoŋa beŋkpoŋa ŋɔ, “N Dɔɔ, menee kɛɛ? N Dɔɔ, menee kɛɛ?”

²³ Yeesu chaŋ ba ŋɔ, “Naate n ne waa pɛ nɔn hɛna beŋkpoŋ bini laanee.

²⁴ Men Nɛn Bie nɔ ɛɛ sewɔɔ ɡɛ Korowii Tɔn aa dɛ baɡle la, kɛ naate waa lee mɛ tɛ bá kpo la, bwɛɛlɛ. Dɛ ba fe ta naate lolɛ ɡba fe bɔ!”

²⁵ Anee Judas waa dɛ ba o lee tɛ la ɡe pɛɛro ŋɔ, “N Dɔɔ, menee kɛɛ?” Anee Yeesu ŋɔ, “Anee he bol la.”

²⁶ Baa dɛ di kwaa la la, Yeesu kpɔ paanoo dɛ jam Korowii o wa, asɛ dɛ mɔne tɛ o habɔteŋra la dɛ ŋɔ, “N bo-olii la. Hé lɛ dɛ́ di.”

²⁷ Asɛ dɛ berɛ kpɔ numol ne sen dɛ jam Korowii dɛ ŋɔ, “Hé bwa nyɔ sen nɔ ane.

²⁸ Sen nɔɔ cheɡa tɛ n chal maa dɛ ba nɛra kɛrɛdɛ waa koeh dɛ́ fuɡe ta ásɛ Korowii che a ta dɛ́ kpɔ ba wechɔɡa kɛ ba. Á ɛ fɔo dɛ́ chɔ Korowii ne nɛwɛnyini baah ta.

²⁹ Kasinteŋ, maa sen nɔ anee nyɔ kpa bwa ka tel ɡɛ saŋ n ne haa berɛ ba nyɔ anfala n Mɛɛ Kora la ta.”

³⁰ Asɛ ba ɡo yel kpɛɛ Korowii dɛ ir le kaa Ɔlevere Bwejen la ta.

Pita tɔɔh ŋɔ waa Yeesu jemɛ

³¹ Yeesu ŋɔ ba be ŋɔ, “Jwaana nɔ ne he bwa ɛɛ chwao kaa ɡel mɛ, ɡɛ baa chwera Korowii Tɔn bini ŋɔ, ‘Korowii ɛɛ kpo peteɡre laanee, ásɛ peera la bwa lɔ peɡre’ la.

³² Kɛ dɛ n iro le seo ta naa, mɛɛ tɔ siee kaa Galilia harɛ ta he nɛ.”

³³ Anee Pita ŋɔ, “Dɛ n bala nɔ bwa chwao ɡele naa, n te aa chwa ɡele bwa.”

³⁴ Belaa Yeesu ŋɔ Pita be ŋɔ, “Kasinteŋ, jabal loɡle ne sii fini, dɛ he tɔɔh kera atoro ŋɔ haa men jemɛ.”

³⁵ Anee Pita ŋɔ, “Dɛ seo kwaraa yaa, n ne hɛɛ sewɔɔ, kɛ maa tɔh ŋɔ maa hen jemɛ bwa.” Asɛ Yeesu habɔteŋra baa jaa la bwa ɡe bol ɡɛ.

Yeesu soŋe Korowii Gɛtsɛmane

³⁶ Asɛ Yeesu ne o habɔteŋra la kaa bobɛl baa dɛ yerɛ bela Gɛtsɛmane, asɛ o ŋɔ ba be ŋɔ, “Hé so bonɔ ń la le ka soŋe Korowii dɛ́ ba.”

³⁷ O kpɔ Pita ne Sebedii bii banɛ la dɛ kaa bela. Dɛ o loo kuu, o ta nae ɡɛ bwa waa ɛ o te.

³⁸ Asɛ o ŋɔ ba be ŋɔ, “N tea bini chɔɡɔ kohona to. A ɡbo ɛɛ kpo mɛɛ kwara. Hé so bonɔ dɛɛ were ń la ba.”

³⁹ Yeesu la sie tama dɛ ka kpɔ sie pi harɛ dɛ soŋe Korowii ŋɔ, “N Mɛɛ, dɛ a fe ɛɛ maɡroo waa, he bɛ ɡel a ɡɛ wahala nɔ ba n nɛ. Kɛ anla aa too n tea laa mɛɛ nyin, kɛ ɛ he tetoowa.”

⁴⁰ Yeesu berɔ ba o habɔteŋra batoro la be, dɛ ba na kɛ ba chɔɔɡe doromi, asɛ o ŋɔ Pita be ŋɔ, “He ta wone cha mɛ dɛ so were dɔŋ beŋkpoŋ ɡba naa?

⁴¹ Hɛ́ɛ nyiŋi kɛrɛdɛ dɛɛ soŋe Korowii, ásɛ Bɔnsam bɛ won neɡre heya. He bambile fe dɛ nyin wedɛɛɡa ɛɛ, kɛ he bwadabii pwɛre.”

⁴² Yeesu berɔ ka soŋe Korowii ja dɛ ŋɔ, “N Mɛɛ, dɛ nae chɛ kɛŋɔ ń na ɡɛ wahala nɔ, ásɛ he laa kpɔ n nɛɛ aa wola maɡre aa, ɛa ɡɛ aa too he tea.”

⁴³ Yeesu aa bera ba o habɔteŋra la be ja la, dɛ ba fe ŋɔ bá hamɛ sie dɛ bɛ dom chɔ, kɛ ba ta wone, dɛ chɔɔɡe doromi.

⁴⁴ Yeesu berɔ ɡel ba ja dɛ ka soŋe Korowii toorotena ɡɛ o fa aa soŋo la tenten.

⁴⁵ O berɔ ba o habɔteŋra la be dɛ ba pɛɛ ba ŋɔ, “Domii he chɔ dɛɛ onaa? Saŋ baa dɛ ba Men Nɛn Bie la kpɔe do wechɔɡ-ɛɛra nɔn ta la telo.

⁴⁶ Hé ir yá kaa. Hé na, naate waa dɛ ba n lee tɛ bá kpo mɛ laanee la.”

Yeesu lawa wa

⁴⁷ Yeesu nyoa ta aa lɔ waa ta wɛɛ bol la, dɛ Judas waa ɛ o habɔteŋra fi dɛ banɛ la bini bɛl la denɔ ba. Dɛ nɛnlaa tenten Sɔfonomonome ne bela nomonome aa tom ba kpoŋe keri ne ɡule ja Judas nɛɛ ba ba.

⁴⁸ Dɛ Judas tɔ sie ŋɔ ba be ŋɔ, “Baa la maa ɡbaaro pɛl n bambile dɛ́ mo o lwɛɛma la, amɔ dɛ onee. Hé den lawɔ dɛɛ la o ne.”

⁴⁹ Judas den pa sie Yeesu be dɛ ŋɔ, “N Dɔɔ, he leaa?” O ɡbaaro pɛl o bambile dɛ mo o lwɛɛma.

⁵⁰ Anee Yeesu pɛɛro ŋɔ, “N dam, ɛrɛ balaa he ba bonɔ nɔɔ?” Belaa nɛra la den ba ɡuɡri Yeesu dɛ lawɔ.

⁵¹ Nɛra baa ja Yeesu nɛɛ la bɛl pamɛ o kere le o tɔɔ ta, dɛ kpɔ ŋwɛnɛ Sɔfonomoa la bonɔɔ deŋne laa cha.

⁵² Anee Yeesu ŋɔ, “Kpɔ he kere la do o tɔɔ ta. Nomɛlbwa waa kpɔ kere dɛ ɛ wechɔɡa la, kere nee baa ba o ɡe kpoe.

⁵³ Haa jemɛ kɛŋɔ n fe ɛɛ wonoo yerɛ n Mɛɛ ŋɔ ó ba cha mɛ, ásɛ o ɡel nyundua toroma baa wola nyoa dɔe ba dɛ́ ba yo lɛɛ mɛ kɛɛ?

⁵⁴ Kɛ n ɡelɔ a ba ɡɛ naa, dɛ waa baa chwera bil ŋɔ ɡɛɛ chɛ kɛŋɔ á ba la ta berɛ ɛ ɡɛ kpa.”

⁵⁵ Anee Yeesu pɛɛ nɛra la ŋɔ, “Ŋwɛɛree men he kpɔ keri ne ɡule dɛɛ ba dɛ́ ba laɡ mɛ naa? Tɔpere bɛlbwaa n ne heyaa yon so Korowii Dea bela, ásɛ mɛɛ baɡle nɛra wa, kɛ he ta men bela lawɛ.

⁵⁶ Anɔ bwa ɛo ásɛ waa Korowii keamere la aa chwera Korowii Tɔn bini la ɛ kpela.” Belaa Yeesu habɔteŋra la bwa chwa peɡre a kao.

Yeesu kaa che Juu tena nomonome sie

⁵⁷ Nɛra la baa lawɛ Yeesu la kpɔɔ kaa Sɔfonomoa Kaefas dem, dɛ Tɔnjerema ne bwɛɛ la nomonome la cheme bela.

⁵⁸ Baa dɛ kaa la, Pita ɡe teŋɛ ba nɛɛ bojaŋ dɛ ka jo Sɔfonomoa la dem, dɛ ka pu nɛra baa dɛ daah dem bela la so, dɛɛ nyin ó na ɡɛ bwa baa dɛ ba kpɔe ɛ Yeesu.

⁵⁹ Sɔfonomonome ne Juu tena nomonome baa dɛ bol waa dɛɛ pa bole la bwa nyoa pɛo baa nyin waa dɛ́ kpɔ dawɛ Yeesu nɛɛ dɛ́ won che a ta kpoo.

⁶⁰ Anomanta, nɛra kɛrɛdɛ bwa teŋe nyosone dawɛ o nɛ, kɛ ba ta wone dɔ waane dɛ́ che a ta dɛ́ dɔɔ kpo. Anee nɛra banɛ bane den le che baah ta

⁶¹ dɛ ŋɔ, “Baa nɔɔ fa ŋɔa wɛɛ wonoo paɡre Korowii Dea nɔ dɛ kpɔ tɔpera atoro mao ja la.”

⁶² Anee Sɔfonomoa la ir che dɛ ŋɔ Yeesu be ŋɔ, “Ɛrɛɛ he na waa nɔ baa kpɔa dawɛ he nɛɛ nɔɔ? He ta waane dɔe hé chaŋe aa?”

⁶³ Yeesu mwaa o ne, o ta wobɛlbwa chaŋɛ. Anee Sɔfonomoa la berɛ ŋɔ o be ja ŋɔ, “N ŋwɛɛ Korowii waa lole saŋ bɛlbwa nɔ kɛŋɔ, dɛ henee o Bie Kristo la waa baɡɛ yaa nyoa ŋɔ wɛɛ tomɔɔ ó ba lɛ yaa la aa, ɡel ya jemɛ fini.”

⁶⁴ Anee Yeesu chaŋo ŋɔ, “Anee he bol la. Kɛ n berɔ dɛɛ ŋɔ he bwa be ŋɔ, tɔpebɛl hɛɛ ba na Men Nɛn Bie laanee kɛŋɔ maa soɡe Korowii Waa Ɛ Kpeɡnɛn la diɡ ta, ásɛ dɛ na ɡɛ n ne baama aa le nyundua dɛɛ ba!”

⁶⁵ Belaa Sɔfonomoa la laa o ɡbaɡba laala waa doa la laa kɛɛ dɛ ŋɔ, “Hé no musu wa! Bɔkwa danseɛ yá berɛ dɛɛ nyin jaɔ? Kɛ he bwa no musu waa nɔ waa dena bol nɔ?

⁶⁶ Ɛrɛɛ he na waa nɔɔ, bwɛɛla?” Ba bwa den pɛ nyoa ŋɔ, “O chɛ kpoe.”

⁶⁷ Ba ta nentane ta o siebɔr dɛ lɔɔro, dɛ tɔɔ kande. Banɔ la baa dɛ kpaa o lwɛrɛme dɛɛ chuɡru kwɛɛrɛre la yon berɛ pɛɛro ŋɔ,

⁶⁸ “Dɛ henee Kristo la aa, na chaahna dɛ́ won jemɛ naate waa lɔe nɔ!”

Pita tɔɔh ŋɔ waa Yeesu jemɛ

⁶⁹ Dɛ Pita soɡe buse dem baah bela, asɛ Sɔfonomoa la tolo bɛl ba o be dɛ ŋɔ, “Kɛ he ɡe fa teŋɛ Yeesu waa le Galilia harɛ la nɛɛ laɔ?”

⁷⁰ Asɛ Pita tɔh pelepele ken ba bwa sie dɛ ŋɔ, “Waa nɔ haa dɛ bol nɔ, maa a bini jemɛ kwara!”

⁷¹ Waa bol ɡɛ tonɛ la, o le bela dɛ ka che dem la doonyoa. Tolo bɛl berɛ nao bela dɛ ŋɔ nɛra baa cheɡɛ bela la be ŋɔ, “Baa nɔ ɛ Yeesu waa le Nasarɛt la habɔteŋra la bɛl.”

⁷² Asɛ Pita berɛ tɔh dɛ ŋwɛɛ ŋɔ waa on jemɛ.

⁷³ A ta biɡre bɛlbwa asɛ nɛra baa cheɡɛ bela la ba o be dɛ ba ŋɔ, “Kpela, haa won tɔh ŋɔ Yeesu nɛra la bɛl laa hen, dɛkalkɛŋɔ he dɛ bol Galilia tena wobol.”

⁷⁴ Asɛ Pita ŋɔ, “N ŋwɛɛ Korowii kɛ dɛ n jemɛ baa nɔ bobɛlbwa naa, ó bɛ men ɡel!” Buɡ la ta, dɛ jabal sio,

⁷⁵ asɛ Pita lii ɡɛ Yeesu fa aa ŋɔ o be ŋɔ, “Jabal ne sii dɛ he tɔɔh ŋɔ haa men jemɛ kera atoro bwa” la. Waa lii a ɡɛ waa nɔ la, o le dahara dɛ ka wi lokua ne.