Matiu 25 - mzwDBL

Bitoli fi bane sɛɡla

¹ Yeesu berɔ ŋɔ, “Men Nɛn Bie bala la telaa, kenii Korowii Kora ɛɛ ba doe. O dɛ ba doe kɛŋɔ toli fi bane baa ira dɛ kpɔ ba kandere dɛɛ la ká cheme hanfale jaa.

² Ba bini banue ɛ ɡɛna, banue ɡe ɛ wejerema.

³ Gɛna la ta noo kpɔe ásɛ dɛ ba kandere la bini noo tonaa bá kpɔ do.

⁴ Kɛ wejerema la te kpɔ noo do loŋa ta dɛ ja ba kandere la ta.

⁵ Hanfale jaa la ta fele ba, anomanta, dom chuɡli bitoli la, ba bwa chɔɔɡe doromi.

⁶ Harambaŋa la, nɛra bane nao kɛŋɔ hanfale jaa la dɛ ba, asɛ dɛ kpɔ takpeɡ ŋɔ, ‘Hanfale jaa laanee la oo! Hé le ka chemo!’

⁷ Bitoli fi la bwa ir doromi ta, dɛ kwaa ba kandere.

⁸ Gɛna banue la ŋɔ wejerema la be ŋɔ, ‘Hé tɛ yaa he noo nɔ ane. Gɛ laa aa, ya kandere dɛ dirimi.’

⁹ Anee wejerema la ŋɔ ba be ŋɔ, ‘Aa ya ne he bwaa tel, anomanta, hé chwa la bela baa dɛ yoɡa la ka yawɛ ane.’

¹⁰ Gɛ saŋ bitoli ɡɛna la aa chiɡ ŋwɛnɛ ta kaa noo la yawa la taa hanfale jaa la ba. Wejerema la aa kpɔ ba te la, ba dɔ bɔr teŋɛ hanfale jaa la nɛɛ dɛ ka di hanfale kondikwaa la. Baa joa tonɛ la, dem te den laa ɡbera la tɔ.

¹¹ A habɔɔ la banɔ la balɔ, dɛ baa yerɛ ŋɔ, ‘Ya dɔɔ, ya dɛ soŋe, ya yaa ásɛ ya jo.’

¹² Anee hanfale jaa la ŋɔ, ‘Kasinteŋ, maa heyaa jemɛ.’ ”

¹³ Yeesu aa bol ɡɛ tonɛ la, o berɛ ŋɔ, “Anomanta, hé ɡel he sie do le hɛɛ kpa, dɛkalkɛ haa tɔpere la ne ɡɛ saŋ maa dɛ ba bala la jemɛ.”

Bonɔɔna batoro bane sɛɡla

¹⁴ Yeesu berɔ ŋɔ, “Awola Men Nɛn Bie la aa ba la, kenii Korowii Kora la ɛɛ ba doe. Baa bɛlee ira dɛɛ ba o ŋwɛnɛ bɛl kaala, dɛ yerɛ o bonɔɔna dɛ kpɔ o suuɡa bwa do ba nɔn ta.

¹⁵ Gɛ del ba bɛlbwa aa dɛ ba wona kpoŋe la taa o nyiŋi dɛ bɔne tɛɛ ba. O tɛ sitɔte la bɔre anue, dɛ tɛ nɛɛte la bɔre anɛ, asɛ dɛ tɛ toorote la ɡe bɔrbeŋkpoŋ, mɔɔ dɛ kaa o ŋwɛnɛ la.

¹⁶ A ta biɡre bɛlbwa onɔ la waa dɔ bɔre anue la den kpɔ o kwaa ka ɛ toma dɛ berɛ dɔ a dɔŋa ja a ta.

¹⁷ Gɛ tentenee onɔ la waa dɔ bɔre anɛ la ɡe berɛ dɔ a dɔŋa ja o kwaa ta.

¹⁸ Bonɔɔ la waa dɔ bɔrbeŋkpoŋ la te kpɔ o kwaa ka huɡe harɛ.

¹⁹ Aa baa biɡri la, bonɔɔna la dɔɔ la balɔ dɛ ba ŋɔ bɛ́lbwa ba chaɡle ɡɛ waa kpɔ o suuɡa ɛ.

²⁰ Bonɔɔ la waa tɛo bɔre anue la kpɔ anɔ la waa dɔa ja la ja anɔ waa kpɔa tɛo la ta dɛ ŋɔ, ‘N Dɔɔ, bɔre anuee he tɛ mɛ, kɛ n ɡe berɔ dɔ a dɔŋa ja a ta. Anee la.’

²¹ Anee o dɔɔ la ŋɔ, ‘Jam, bonɔndɛɛɡe, kasinteŋ te! Tama nɔ haa kpɔ kasinteŋ dɛ ɛ a ne toma nɔ, mɛɛ kpɔe so andamanta nyoa. Ba puu mɛ so silɛɛ ta.’

²² Bonɔɔ nɛɛte la ɡe ba dɛ ba ŋɔ, ‘N Dɔɔ, bɔre anɛɛ he tɛ mɛ, kɛ n ɡe berɔ dɔ a dɔŋa ja a ta. Anee la.’

²³ Anee o dɔɔ la ŋɔ, ‘Jam, bonɔndɛɛɡe, kasinteŋ te! Tama nɔ haa kpɔ kasinteŋ ɛ a ne toma nɔ, mɛɛ kpɔe so andamanta nyoa. Ba puu mɛ so silɛɛ ta.’

²⁴ Asɛ bonɔɔ waa dɔ bɔrbeŋkpoŋ la ɡe ba, dɛ ba ŋɔ, ‘N Dɔɔ, n jemɔ kɛ he waa kpeɡri. Bela haa wola mea due laanee hɛɛ koma, asɛ bela haa wola kwaa ane komɛ laanee hɛɛ nyin a cheɡbɔr.

²⁵ Anomanta, n ɔmɔ dɛ kpɔ suuɡa haa tɛ mɛ la ka huɡe harɛ. Anee la.’

²⁶ Anee o dɔɔ la ŋɔ, ‘Bonɔnchɔɡe bɔhwaah kohona! He jemɔ kɛ bela maa wola mea duee mɛɛ koma, asɛ bela maa wola kwaa komɛ laanee mɛɛ nyin a cheɡbɔr aa?

²⁷ A fe chɛ kɛŋɔ he kpɔ n suuɡa la ka cheɡ nɛra baa kpɔ suuɡa dɛɛ cheɡ ba be ba kpɔ dɛɛ kemɛ nɛra la, ásɛ n balaa, ń ka lɛ n kwaa ne a nee bwa.

²⁸ Anomanta, hé lɛ o kwaa la o be dɛ́ kpɔ tɛ onɔ maa tɛo anue o dɔ a dɔŋa ja a ta la.

²⁹ Anomanta, naate waa dɔa la, baa jao anee ó dɔ kohona. Kɛ naate waa wola komɛlbwa dɔe la, tama kwaraa waa dɔa la ɛɛ le o nɔn taa.

³⁰ Bonɔnsala nɔ te, hé kpɔɔ le dahara ka ta biro ta, belaa wii ne weweele do.’ ”

Nɛn Bie la bala dɛ́ ba bol nɛra waa pa bole

³¹ Yeesu berɔ ŋɔ, “Dɛ Men Nɛn Bie la balɔ jirima ne, nyundua toroma la ja n nɛ aa, mɛɛ ba so n kookara taa,

³² ásɛ nɛwɛnyina baa lɔ harɛ bɛlbwa ta ba cheme n sie. Mɛɛ peɡri ba bini bɔre anɛɛ, ɡɛ peteɡre aa dɛ peɡri o peera ne o boohna bini la.

³³ Mɛɛ kpɔ wedɛɛɡa tena laanee che n nɔndiɡ ta, ásɛ ba kar la ɡe che n nɔŋɡal ta.

³⁴ Belaa mɛɛ ba n ŋɔ banɔ la baa lɔ diɡ ta la be ŋɔ, ‘He banɔ n Mɛɛ aa swee andɛɛɡa tɛ heyaa la, hé ba di kora waa le harɛ mumpar dɛ kwaa cheɡ heyaa la,

³⁵ dɛkalkɛŋɔ lɔr aa dɛ kpo mɛ la, he tɛ mɛ kondikwaa n di, nyɔɡre aa dɛ kpo mɛ la, he tɛ mɛ nee n nyɔ. Maa ɛ hɔɔh la, he kpɔ mɛ kaa he deremi,

³⁶ maa valɛ mumɡbal la, he tɛ mɛ yal n tɔ. N bwara wee mɛ, he nyiŋi n nɛ, asɛ baa do mɛ dea ɡe la, he kaa na mɛ.’

³⁷ A taa wedɛɡ-ɛɛra la ɛɛ ba ŋɔe ŋɔ, ‘Ya Dɔɔ, bɛweeree ya na kɛŋɔ lɔr aa dɛ kpoe ya tɛɛ kondikwaa he di, asɛ nyɔɡre ɡe kpoe ya tɛɛ nee he nyɔɔ?

³⁸ Bɛweeree ya na kɛŋɔ he ɛ hɔɔh ya kpɔe kaa ya deremi, dɛ berɛ na kɛŋɔ haa valɛ mumɡbal ya tɛɛ yal he tɔɔ?

³⁹ Bɛweeree ya na kɛ he bwara wee kɛɛ ba doe dea asɛ ya ka nae nɔ?’

⁴⁰ Ásɛ n ŋɔ ba be ŋɔ, ‘Kasinteŋ, ɡɛ haa cha n nimanar baa ɛ nɛŋɡwɛɡra waa nɔ dɔŋa puu ba la, menee he cha la.’

⁴¹ Ásɛ n berɛ ŋɔ banɔ la baa lɔ n ɡal ta la be ŋɔ, ‘He banɔ Korowii nyotaahna aa lawɛ heyaa la, hé le n sie bonɔ, dɛ́ ka jo nii aa wola dime bwa ba mara tɛ Bɔnsam ne o toroma la ta,

⁴² dɛkalkɛ lɔr kpo mɛ, he ta men kondikwaa tɛɛ ń di, nyɔɡre kpo mɛ, he ta men nee tɛɛ ń nyɔ.

⁴³ Maa ɛ hɔɔh la, he ta men lawɛ kaa dem, maa valɛ mumɡbal ɡe la, he ta men yal tɛɛ ń tɔ. N bwara wee mɛ, ba do mɛ dea ɡe, kɛ he ta balɛ dɛ ba na mɛ.’

⁴⁴ Ásɛ ba ɡe chaŋo ŋɔ, ‘Ya Dɔɔ, bɛweeree ya na kɛ lɔr ne nyɔɡre dɛ kpoe, kɛɛ he ɛ hɔɔh, kɛɛ dɛɛ valɛ mumɡbal, kɛɛ he bwara wee, kɛɛ ba doe dea, asɛ ya ta balɛ dɛ ba chae nɔ?’

⁴⁵ Ásɛ n ŋɔ ba be ŋɔ, ‘Kasinteŋ, ɡɛ haa wola n nimanar baa ɛ nɛŋɡwɛɡra waa nɔ dɔŋa puu ba he ta bɛlbwa chae la, menee haa wola chae la.’

⁴⁶ Banɔ te ɛɛ kaa weweele aa wola jaɡa dɔe bwa la taa, ásɛ wedɛɡ-ɛɛra la te dɔ Korowii mkpa aa wola jaɡa dɔe bwa la.”