Matiu 24 - mzwDBL

Gɛ Yeesu aa bol Korowii Dea chɔɡa wa

¹ Yeesu aa le Korowii Dea bela dɛɛ kaa la, o habɔteŋra la baa ŋɔ ó nyiŋi na Korowii Dea la kan waa doa ne ɡɛ waa wera.

² Anee Yeesu ŋɔ, “Hé nyiŋi deene nɔ bwa kɛrɛdɛ. N dɛ ŋɔ he be kɛ baa ba kuuɡi a bwaa ta. Bwe bɛlbwa aa lee do dɛ́ ta chɔŋɛ o dɔŋ nɛɛ kpa.”

Yeesu baɡle o habɔteŋra wahala baa na kerekere

³ Yeesu teehnɔ ka so Ɔlevere Bwejen la doa. Belaa o habɔteŋra la ɡbo ka puu bela, dɛ ba bɔɔro ŋɔ, “Chaɡle yaa ɡɛ saŋ ɡɛ waa nɔ bwa aa dɛ́ ba chiɡa, ne waa aa dɛ ba bala dɛ chaɡle kɛŋɔ he bala saŋ la ne waa bwa jaɡa saŋ la telo.”

⁴ Anee Yeesu chaŋ ba ŋɔ, “Hé nyiŋi kɛrɛdɛ dɛ bɛ ɡel nomɛlbwa neɡre heya.

⁵ Nɛra ɛɛ warɔɔ taeh dɛ́ ba neɡre heya, dɛ́ kpɔ n sɔn dɛɛ bol wa, hale dɛ́ ŋɔ banee Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la, dɛ́ neɡre nɛra kɛrɛdɛ bwa.

⁶ Hɛ́ɛ no laa ɡbɔɡaa he jwɛh, ásɛ dɛɛ no ane ɡe ɡbɔɡa bojaŋa. Kɛ dɛ he ba dɛ na ɡɛ naa, he bɛ ɔmɛ. A chɛ kɛ ɡɛ waa nɔ bwa chiɡ, kɛ dɛ a laa dɛɛ chaɡle kɛ waa bwa jaɡa saŋ la telo.

⁷ Harɛre ane ɛɛ yo dɔŋaa, koranar ɡe yo dɔŋa. Lɔr ɛɛ ba harɛ nɔ ta bobɛlbwaa, ásɛ harɛ ɡe ɛɛ jiɡri bobɛlbwa.

⁸ Kɛ anɔ bwa do kɛŋɔ haah loltea yon tɔ sie lɔɔ dɛ o lola ta tele mɔɔ la.

⁹ Ásɛ mɔɔ ba ta lawɛ heyaa tɛ nɛra, ba ɛ heyaa hɔhɔrɔwa dɛ́ kpoo heya. Nomɛlbwa ɛɛ koh n waa hah heya.

¹⁰ A ba ɡɛ naa, nɛra baa teŋɛ n nɛɛ nɔ kɛrɛdɛ ɛɛ le n habɔɔ, dɛ́ le ba bala tɛ, ásɛ dɛ hah dɔŋa.

¹¹ Ásɛ nɛra ir dɛ́ teŋe nyosone kɛŋɔ ba ɛ Korowii keamere, dɛ́ neɡre nɛra kɛrɛdɛ.

¹² Wechɔɡa ɛɛ perɛ harɛ nɔ ta bobɛlbwaa, ásɛ nɛra bane aa won nyin ba dɔŋa kɛrɛdɛ kpa.

¹³ Kɛ nomɛlbwa waa wola n habɔɔ leɛ, dɛ won teŋɛ n nɛɛ ka tonɛ la, wɛɛ dɔ o nyuu.

¹⁴ Baa bol Korowii Kora Amanesoma nɔ waa harɛ nɔ ta bobɛlbwaa, ásɛ nɛwɛnyini te bɛlbwa no mɔɔ waa bwa jaɡa saŋ la tel.”

Konchɔɡechɔɡe waa dɛ paɡre bwɛ

¹⁵ Yeesu berɔ ŋɔ, “Hé naate haa kure tɔn nɔ bonɔ la no a mun kɛrɛdɛ. Hɛɛ na konchɔɡechɔɡe Korowii keame Daneɛl fa aa bol o waa ŋɔ o dɛ paɡre bwɛɛ la cheɡa Korowii Dea boɡoroŋ bela.

¹⁶ Gɛ saŋ la telaa, a chɛ kɛŋɔ Juda harɛ tena chwa le Juda ka sɔh bwejena la baah.

¹⁷ Nomɛlbwa waa soɡe saldoa ɡe, o bɛ berɛ koh o te ŋɔ o dɛ tu dɛ́ jo dea dɛ́ ka kpɔ komɛl kpa.

¹⁸ Nomɛlbwa waa lɔ koo ta bɛ berɛ ŋɔ o dɛ kaa dem dɛ́ ka kpɔ o yal kpa.

¹⁹ Ei! Aa do kpeɡrii tɛ tekpoŋra ne haahna baa kpoŋe bechasɔɔhne a ɡɛ saŋ nɔ noo!

²⁰ Hé soŋe Korowii ásɛ ɡɛ waa nɔ aa dɛ ba chiɡa he chwaaɡe nɔ bɛ waa saŋ chiɡ, dɛ bɛ Ona Tɔpere ta chiɡ,

²¹ dɛkalkɛ, dɛ le harɛ nɔ mumpar bwa ba le fini, wahala aa dɛ we dɛ do ɔma ɡɛ dɔŋ ta chiɡe bwa. Asɛ wahala aa do ɔma ɡɛ dɔŋ ɡe aa chiɡ kpa bwa.

²² Kɛ dɛ Korowii fe ta tɔpera la ane teŋe ta aa, nomɛlbwa fe aa o nyuu dɔ. Anomanta, ɡɛ aa ɛ ásɛ Korowii nɛra waa chal ba dɛ lɛɛ ba la dɔ ba nyu la, o teŋe tɔpechɔɡa la ane ta.

²³ Gɛ saŋ la dɛ nomɛl ŋɔ he be ŋɔ Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa la lɔ bonɔ kɛɛ le naa, he bɛ on yarada,

²⁴ dɛkalkɛ nɛra ɛɛ bao dɛ́ ba teŋe nyosone ŋɔ Kristo laanee ban, ásɛ bane ɡe teŋe nyosone ŋɔ Korowii keameree ban. Baa ɛ wejena ne nyokpowaa, dɛɛ nyin bɔr dɛ́ neɡre nɛra Korowii aa chal ba dɛ lɛɛ ba la kwara.

²⁵ N felo dɛɛ bol waa nɔ he be noo, ásɛ he pu sie jemɛ a wa.

²⁶ Dɛ nomɛl ŋɔ he be ŋɔ Kristo la lɔ kpɔɡ bini naa, he bɛ bela la. Dɛ nomɛl ɡe ŋɔ, ‘Nyiŋi na, o sɔh dea nɔ bini’ naa, he bɛ yarada,

²⁷ dɛkalkɛ Men Nɛn Bie bala ɛɛ ɛo kɛŋɔ bwaala yon nyɛɡle le wee leebɔr kaa wee cholibɔr la. Gɛɛ maa wola n balaa kpɔ sɔh nomɛlbwa.

²⁸ ‘Bela konlale aa lole la, belaa kokosakire ɛɛ cheme.’

²⁹ Wahala ne sibeɡra la aa chiɡ dɛ den dɛɛ tonɛ la, buɡ la ta ‘wee aa bɔr chaahna ba kpa, korobie ɡe aa bɔr chaahna ba kpa, weweela dɛ ba nyundua lee dɛ́ lee harɛ, ásɛ Korowii doa bwa yiiɡi dɛ́ chɔɡ.’

Men Nɛn Bie bala wa

³⁰ A taa hɛɛ ba waane nyundua nae a chaɡle Men Nɛn Bie la kpeɡri, ásɛ harɛ nɔ ta nɛra bwa na dɛ́ wi, ásɛ dɛ na kɛŋɔ Men Nɛn Bie la aa le nyundua baama bini dɛɛ ba kpeɡri ne jirima tenten ne.

³¹ Nɛra ɛɛ no Korowii bɛla la sii, ásɛ Korowii tomɛ o nyundua toroma bá ba harɛ nɔ ta bobɛlbwa, dɛ́ ka boa o nɛra waa chal ba dɛ lɛɛ ba la bwa nyoa.

Fiɡ daa wehwela wa

³² Hé kpɔ fiɡ daa hweli wa. O baa foɡre dɛɛ le papo-lwɛɛne aa, dɛ nomɛlbwa jemɔ kɛŋɔ bɔwɔb saŋ telo tonɛ.

³³ Gɛɛ dɛ waa nɔ maa bol he be nɔ bwa baa dɛɛ chiɡ aa, ásɛ he jemɛ kɛ tɔpere maa dɛ bol o waa la bala telo.

³⁴ Kasinteŋ, a ɡɛ waa nɔ bwa dɛ ba chiɡa mɔɔ fini nɛra nɔ bwa serewe.

³⁵ Nyundua ne harɛ ɛɛ chɔɡoo. Aa lee ba do kpa. Kɛ n waa maa bola te bwa ɛɛ do lee saŋ te bɛlbwa.

Nomɛlbwa aa tɔpere ne saŋ la jemɛ

³⁶ Nomɛlbwa aa Korowii Tɔpere la ne saŋ ɡɛ waa la aa dɛ ba chiɡa jemɛ. Nyundua toroma la ne Men Nɛn Bie la ɡba aa jemɛ. N Mɛɛ la ɡboo jema.

³⁷ Men Nɛn Bie bala ɛɛ piɡri nɛraa kɛ Nowa saŋ nesuuli la aa baa piɡri nɛra la.

³⁸ Gɛ saŋ nee la aa wola sui dɛ chɔɡ harɛ mɔɔ la, dɛ nɛra dɛ di kwaa dɛɛ lɛ ba sie, dɛɛ mo haahna, dɛɛ yalɛ jaranar. Ba lɔ ɡɛ waa nɔ ta dɛɛ ɛ dɛ ka tel ɡɛ saŋ Nowa aa jo daka la bini ɡel ba.

³⁹ Kɛ ba ta wone jemɛ waa aa dɛ ba bala ka tel ɡɛ saŋ nee la aa sua dɛ ba kpɔ ba bwa kaa. Gɛɛ Men Nɛn Bie la bala la ɛɛ ba nɛra piɡra.

⁴⁰ Gɛ saŋ la, nɛra banɛ ɛɛ dɛɛ ɛ toma koo taa, ásɛ ba ba kpɔ beŋkpoŋ kaa, dɛ́ ɡel bɛl.

⁴¹ Haahna banɛ ɛɛ pɛo dɛɛ namɛ kwaa nambwe ta, bá ba kpɔ beŋkpoŋ kaa, dɛ́ ɡel bɛl bela.

⁴² Anomanta, hɛ́ɛ do dɛɛɡɔ, dɛkalkɛ haa tɔpere la ne saŋ la he Dɔɔ la aa ba jemɛ.

⁴³ Hɛ́ɛ no. Dɛ dem te fe jemɛ ɡɛ saŋ ŋwɛɛ aa ba ŋwɛo waa, o fe aa domii chɔ dɛ́ ɡel o ba jo dem dɛ́ ŋwɛo.

⁴⁴ Gɛɛ chɛ kɛŋɔ hé ɡe kpɔ he te, dɛ́ so kpa, dɛkalkɛ piɡraa Men Nɛn Bie la ɛɛ ba ba piɡri heya.

Bonɔndɛɛɡe ne bonɔnchɔɡe wa

⁴⁵ Bonɔɔ waa dɔ kasinteŋ dɛ dɔ liire la nɔn taa o dɔɔ kpɔ o dem tena dɛɛ do, dɛ ŋɔ bɔr dɛ maɡre aa, ó tɛɛ ba kondikwa.

⁴⁶ Dɛ o dɔɔ la baa puu, dɛ o dɛ ɛ ɡɛ waa kpɔa do o nɔn ta la aa, o sie ɛɛ lɛo.

⁴⁷ Kasinteŋ, n dɛ ŋɔ he be, o dɔɔ la ɛɛ kpɔ o komɛlbwaa do o nɔn ta ŋɔ wɛ́ɛ nyiŋi a ta.

⁴⁸ Kɛ dɛ o ɛ bonɔnchɔɡe, asɛ dɛ ŋɔ, ‘N dɔɔ ŋwɛnɛ nɔ waa kaala nɔ, waa ba taraken,’

⁴⁹ dɛ do o bonɔndɔŋa la nɛɛ dɛɛ lɔɔ, dɛɛ di kwaa waa dɛ nyin, o ne sennyɔɔra ɛɛ dɛɛ raa, amɔ wɛɛ na waa.

⁵⁰ Tɔpebeŋkpoŋii o dɔɔ la ɛɛ ba bala ba piɡru,

⁵¹ dɛ́ tɛr o deŋne taeh, dɛ́ doŋu ka pu nɛra baa dɛ nyiŋi nɛra siebɔr mɔɔ dɛɛ ɛ waa la. Belaa wɛɛ ba doe dɛɛ wi dɛɛ na weweele.”