Matiu 23 - mzwDBL

Gɛ Yeesu aa ja nɛra Tɔnjerema ne Farisii tena wa

¹ Yeesu bol waa dɛ chaɡle nɛnlaa la ne o habɔteŋra la dɛ ŋɔ,

² “Tɔnjerema la ne Farisii tena nɔɔ dɔ ŋwɛnɛ kɛ bá chaɡle Mosis Mmara la bini baɡle nɛra.

³ Anomanta, a chɛ kɛ hé no ba be, dɛ́ teŋɛ waa baa dɛ baɡle heyaa ŋɔ hé ɛ la bwa ta. Kɛ he bɛ ba we-ɛɛla te hweli, dɛkalkɛ baa waa baa bola dɛɛ chaɡle heyaa la ɛ.

⁴ Ba kpɔ ba mmarare ɛ bontɔɡa, dɛ ɡel nɛra che dɛɛ koh, kɛ ba te ɡbaɡba aa berɛ ɛɛ nyin kɛ bá kpɔ nonii ɡba leɡa, ásɛ a ba ɛ kɛ baa choɡ baa ɡba.

⁵ Ba we-ɛɛla bwa la, nɛraa baa nyin kɛ bá na ba dɛɛ tɛɛ ba duure. Gɛ nɛra yon chwerɛ Korowii wobol dɛ kpɔ vɔwɛ ba tili ne ba vaama ta la, hé na ɡɛ ba te kwaa yon do paɡri. Hé na ɡɛ ba batakaani nyoo jɔɔra aa dɛ do jaŋne.

⁶ Bela nɛra yon cheme tɔpejena dɛɛ lɛ ba sie la, ba te la bela aa, kane dɛɛɡa ɡbo taa baa nyin soɡa. Asɛ ba la cheremi deene bini ɡe aa, nomonsobɔraa baa nyin.

⁷ Ba dɛ nyin kɛŋɔ nɛra ba harɛ, dɛɛ lea ba yawa ta ne fɔɡbaahna, dɛɛ yer ba ‘Nomoa, nomoa.’

⁸ He bɛ ɡel nomɛlbwa yerɛ heyaa ba nomoa, dɛkalkɛ he bwa kɛrɛdɛ. Nomoa beŋkpoŋ ɡbo ɡee he dɔ.

⁹ Ásɛ harɛ nɔ ta ɡe, he bɛ nomɛlbwa he Mɛɛ dɛɛ yerɛ, dɛkalkɛ he Mɛɛ lɔ beŋkpoŋ ɡbo dɛ do nyundua.

¹⁰ He bɛ ɡel nomɛlbwa ɡe yerɛ he bini bɛlbwa o dɔɔ, dɛkalkɛ dɔɔ beŋkpoŋ ɡboo lole, onee Kristo la.

¹¹ He bwa bini, naate waa ɡwaa heyaa la chɛ kɛ ó ɛ o te kɛŋɔ bechala dɛɛ tomɛ heya.

¹² Nomɛlbwa waa dɛ maŋkura o te la, Korowii ɛɛ ba o ne harɛɛ, asɛ nomɛlbwa waa dɛ pwɛr o te la, Korowii ɛɛ ɛo nɛnjenii.

¹³ Hé bwɛɛlɛ, Tɔnjerema ne Farisii tena, he nɛra haa nyiŋi nɛra sie mɔɔ dɛɛ ɛ wa!

¹⁴ He tɔ Korowii Kora la ŋwɛnɛ. Heyaa nɔɔ haa jo, he ɡe aa ŋwɛnɛɛ tɛ ásɛ banɔ la baa dɛ nyin bɔr dɛ́ jo la dɔ bɔr.

¹⁵ Hé bwɛɛlɛ, Tɔnjerema ne Farisii tena, he nɛra haa nyiŋi nɛra sie mɔɔ dɛɛ ɛ wa! Heyaa yon ɡaaɡe aaa ɡɛ haa ɛ dɛ́ dɔ nɛn waa wola Juu te ɛɛ ó ba ja he nɛɛ dɛ́ tomɛ Korowii. Kɛ dɛ he baa dɔ bɛl aa, he yon berɛ ɛo o chɔɡ kwaraa, asɛ a yon berɛ do kɛŋɔ o tenee bera chɛ Bɔnsam nii ta laŋa ɡwaa heya.

¹⁶ Nyoŋa haa dɛ tɔ nɛra sie, hé bwɛɛlɛ! He yon dɛɛ chaɡle nɛra ŋɔ, ‘He naate haa ŋwɛɛ Korowii Dea la, ate aa won hen waane ɛ. Kɛ suuɡaswɛm waa lɔ Korowii Dea bela la te, baa o te ŋwɛɛ.’

¹⁷ Nyoŋeɡɛna bane! Suuɡaswɛm la ne Korowii Dea la waa ɡela suuɡaswɛm la do ɔma la, umee do ɔma ɡwaa o dɔŋ ɔ?

¹⁸ He berɔ dɛɛ chaɡle nɛra ŋɔ, ‘He naate haa ŋwɛɛ kon baa kpo kwaa dɛɛ tɛ Korowii o ta la, a ta waane ɛɛ. Kɛ kwaa baa kpoa tɛ Korowii bela la te, baa an ŋwɛɛ.’

¹⁹ He nyoɡrɔ kwara! Kwaa baa kpoa tɛ Korowii la, ne kon baa kpo kwaa la dɛ ɡel kwaa la do ɔma la, a bini umee do ɔma ɡwaa o dɔŋ ɔ?

²⁰ Anomanta, nomɛlbwa waa ŋwɛɛ kon baa kpoo kwaa dɛɛ tɛ Korowii o ta la, bela baa kpoo kwaa la ne kwaa aa dawɛ o ta la bwaa o ŋwɛɛ la.

²¹ Asɛ nomɛlbwa waa ŋwɛɛ Korowii Dea la, Korowii ne Dea la bwaa o ŋwɛɛ la.

²² Dɛ nomɛlbwa ɡe ŋwɛɛ Korowii doa aa, Korowii soŋnibɔr ne Korowii ɡbaɡbaa o ŋwɛɛ la.

²³ Hé bwɛɛlɛ, he Tɔnjerema ne Farisii tena, he nɛra haa nyiŋi nɛra sie mɔɔ dɛɛ ɛ wa! He kondiili do tamaa ɡɛ bɛlbwa naa, he won a bini pera bɔre fi dɛ́ kpɔ bɔrbeŋkpoŋ aa ɛ Korowii kwaa la ka tɛo, ɡɛ Mmara la aa baɡla la, kɛ dɛ ɡel Mmara la bini waa aa tɔ sie dɛɛ baɡle ŋɔ hɛ́ɛ di kasinteŋ, dɛ́ɛ na nɛra sum, ásɛ dɛ ɡel nɛra ɛɛ yarada heyaa la te. Gɛ waa nɔɔ chɛ kɛŋɔ hɛɛ ɛ, dɛ́ ja anɔ la haa dɛ ɛa la ta.

²⁴ Nyoŋa haa dɛ tɔ nɛra sie dɛɛ maŋkura wejeɡre ɡwaa anjena! He waa haa dɛ ɛ la do kɛŋɔ nɛn o yon nyiŋi o nenyɔɔle ta, dɛ́ won na pereware dɛ́ laa kpɔ ta, kɛ dɛ nyoɡma te lɔ a ta naa, waa o te na, dɛ yon kpɔ lile.

²⁵ Tɔnjerema ne Farisii tena, nɛra haa nyiŋi nɛra sie mɔɔ dɛɛ ɛ wa, hé bwɛɛlɛ! He waa haa dɛ ɛ ɡelɔ he do kɛŋɔ baa loo numol kɛɛ loɡ habɔɔ o do wer, asɛ doŋa su o bini te la. Dɛ́ ɛɡre nɛn lɛ o kondɔɔh o be, ne kafonyin ɡboo su he bwa.

²⁶ Farisii tena nyoŋa bane! Hé loo doŋa aa lɔ numol la bini la mɔɔ. O bini la dɔɔ lea, dɛ o habɔɔ leɔ.

²⁷ Hé bwɛɛlɛ, Tɔnjerema ne Farisii tena, nɛra haa dɛ nyiŋi nɛra sie mɔɔ dɛɛ ɛ wa! He do kɛŋɔ ŋwam baa teɡɔ wɛɛ nyɛɡle. O nyundua la ɡboo wera, kɛ o bini te, hoɡa ne kompɔɔhla ɡboo.

²⁸ Gɛɛ he den do. Ba na heya aa, he wer siwi ta kɛŋɔ nɛndɛɛɡa, kɛ he bini te, neɡra ne wechɔɡa ɡboo su he bwa.

²⁹ Hé bwɛɛlɛ, Tɔnjerema ne Farisii tena, nɛra haa nyiŋi nɛra sie mɔɔ dɛɛ ɛ wa! Heyaa yon kwaa bela baa huɡe Korowii keamere a do wer. Nɛndɛɛɡa baa serewa la ɡe, he yon kwaa ba ŋwama a do wer ken,

³⁰ dɛɛ chaɡle kɛŋɔ dɛ heyaa fe he naawa ɡɛ saŋ la aa, he te fe aa wola ja dɛ́ kpo Korowii keamere la.

³¹ Kɛ he ɡe aa berɛ ɛɛ tɔh kɛŋɔ banɔ la baa kpoo Korowii keamere la naanaree heya!

³² Hé takapɔ dɛ ɛ wechɔɡa la he naawa aa pa mun ɛa la ka tonɛ.

³³ Nɛnchɔɡa kɛŋɔ harɛkwa, domkpuli bii! Ɛrɛɛ hé ɛ haa wola Bɔnsam nii taa joɔ?

³⁴ N ɡelɔ hɛɛ no kɛŋɔ mɛɛ tomɛ Korowii keamere, wejerema ne Tɔnjerema he bee. Hɛɛ kpoo banee, dɛ́ kpaa bane pɛl daɡaɡra ta, dɛ́ kpɔ chweremi lɔɔ bane cheremi deene ta, dɛ́ doŋ ba jo bwɛɛre ta dɛɛ nyin ba dɛ́ lawɛ.

³⁵ Anomanta, nɛndɛɛɡa baa nya ba nɛɛ dɛ kpoo ba la, dɛ́ le kpoe baa kpo Ebel waa wola wechɔɡa bɛlbwa ɛɛ la, ka tel kpoe baa kpo Bɛrekea bie Sekaria Korowii Dea la, ne bela baa kpoo kwaa dɛɛ tɛo la baah ta bela la, ba bwa waa ɛɛ ɡure he nɛɛ.

³⁶ Kasinteŋ, nɛndɛɛɡa baa kpoo ba la bwa waa ɛɛ ba ɡure fini nɛra nɔ nɛɛ!

³⁷ Oo, Jerusalam tena! Korowii tomɛ o keamere he be naa, ɡɛɛ he kpoo ba, o tomɛ toroma he be naa, ɡɛɛ he foɡ ba bwea. Saŋ bɛlbwaa mɛɛ nyin kɛ ń kpɔ nɔn tɔ he nɛɛ kɛ jal aa lawɛ o bii dɛɛ do o kena lɔɡre la, kɛ haa nyin kɛ ń lawɛ heyaa pɛ.

³⁸ Anomanta, Korowii ɛɛ ta he waa tɛ heya.

³⁹ Kasinteŋ, n dɛ ŋɔ he be, haa men na kpa ka tel ɡɛ saŋ maa ba ja, asɛ he ŋɔ, ‘Woowo! Korowii Biee cheɡɛ o sɔn ta dɛɛ ba la!’ ”