Matiu 22 - mzwDBL

Hanfale kondikwaa sɛɡla

¹ Yeesu berɔ kpɔ sɛɡla dɛ bol waa baɡle nɛra la ja,

² dɛ ŋɔ, “Kenii Korowii Kora ɛɛ ba doe. Kooro bɛlee lawɛ hanfale tɛ o bie, dɛ ɡel ba ɛ o hanfale kondikwa.

³ O tomɛ o bonɔɔna ŋɔ bá ka yerɛ nɛra waa yer ba ŋɔ bá ba di hanfale kondikwaa la, asɛ ba sie ta on sui dɛ vɛh bala.

⁴ Anee o berɛ kwaa tomɛ banfala dɛ ŋɔ ba be ŋɔ, ‘Hé ka ŋɔ nɛra maa yer ba la be ŋɔ ba tonɛ kondikwaa la. N kpoo nabala ne nae aa do noorare kohona, anomanta, n tonɛ komɛlbwa kɛ bá ba.’

⁵ A bwa pɛpɛrɛ nɛ, ba vɛoh dɛ kaa ba tomare ta. Bɛl kaa o koo, bɛl ɡe kaa o bonadibɔr,

⁶ asɛ ba kar la ɡe lawɛ o bonɔɔna waa tom ba la dɛ ɛɛ ba hɔhɔrɔwa dɛ kpoo ba.

⁷ A ɛ kooro la bandia kohona dɛ ɡel o tomɛ o soojare ba ka kpoo banɔ la baa kpoo o bonɔɔna la, asɛ dɛ fuh ba bwɛjen la ɡe.

⁸ Anee o kwaa yerɛ o bonɔɔna bane ɡe ja, dɛ ŋɔ ba be ŋɔ, ‘Ba tonɛ n hanfale kondikwaa la, kɛ nɛra la maa yer ba ŋɔ bá ba di la, a ta ban chɛɛ.

⁹ Name te hé le kaa fɔɡbaahna, dɛ́ ka yerɛ nɛra haa na ba la bwa ba hanfale kondikwaa la mun.’

¹⁰ Asɛ bonɔɔna la le kaa fɔɡbaahna, dɛ ka yerɛ nɛra baa na ba la bwa. Nɛndɛɛɡa ne nɛnchɔɡa bwaa ba yerɛ, asɛ nɛra su bela baa lawɛ hanfale la maa ken.

¹¹ Kooro la aa dɛ jam hɔɔhra la aa baa cheme bela la, o na baa bɛl ba bini kɛ o te ta laala aa chɛ kɛŋɔ ó do dɛ ba hanfale dem bela la ane doe.

¹² Anee o bɔɔ baa la ŋɔ, ‘N dam, ŋwɛnɛ besoo taa a che he ba bonɔ, haa wola laala aa chɛ kɛ hé do dɛ́ ba hanfale dem bonɔ nɔ ane doe nɔɔ?’ Waa bɔɔro ɡɛ la, o ta waane dɔe dɛ bol.

¹³ Anee kooro la den ŋɔ o bonɔɔna la be ŋɔ, ‘Hé vɔrɔwe baa nɔ nɔɔra ne o nakpale, dɛ́ kpɔɔ ka ta dahara biro ta. Belaa wii ne weweele do.’ ”

¹⁴ Yeesu aa kpɔ sɛɡla nɔ bol waa baɡ ba tonɛ la, asɛ o ŋɔ, “Nɛra maa yer ba warɔ taeh, kɛ ba bini tamaa kenii n chale.”

Toɔ bɔe wepɛɛre

¹⁵ Farisii tena la le bokɛre dɛ ka vɔrɔwe ɡɛ baa ɛ dɛ́ dɔ Yeesu lawɛ webɔɔra ne.

¹⁶ Anomanta, ba tomɛ ba habɔteŋra bane ne Hɛrɔd nɛra bane, ba ba o be dɛ ba ŋɔ, “Nomoa, ya jemɔ kɛŋɔ kasinteŋ ɡboo hɛɛ bol, haa nyosone teŋe. Korowii ŋwɛnɛɛ hɛɛ chaɡle nɛra kasinteŋ ne. He ta bolɛ dɛɛ ɔmɛ a habɔɔ kɛŋɔ a dɛ do bane som, kɛɛ a dɛ we bane bambile nɔ. Haa nɛra siebɔr nyiŋi dɛɛ bol wa, kɛŋɔ bɛl ɛ kooro kɛɛ nomoa kɛɛ bechala nɔ.

¹⁷ Anomanta, chaɡle yaa ɡɛ haa na waa nɔ yá jemɛ. Ya mmarare dɛ tɛ yaa ŋwɛnɛ kɛ ya bɔ toɔ dɛɛ tɛ Rom Koojen Siisa la aa, kɛɛ waa yaa ŋwɛnɛ tɛ?”

¹⁸ Yeesu tɔ sie jemɛ ba liichɔɡa, anomanta, o ŋɔ ba be ŋɔ, “He nɛra haa nyiŋi nɛra sie mɔɔ dɛɛ ɛ wa! Ɛrɛɛ hɛɛ nyin dɛ́ har mɛ bel nɔɔ?

¹⁹ Hé kpɔ suuɡa haa kpɔa dɛɛ bɔ toɔ la tɛ mɛ ń na.” Baa kpɔ suuɡa la ba la,

²⁰ anee o pɛɛ ba ŋɔ, “Ume nyu ne o sɔnee nɔɔ?”

²¹ Anee ba chaŋo ŋɔ, “Koojen Siisa nyu ne o sɔnee.” Anee Yeesu ŋɔ ba be ŋɔ, “Gɛɛ a do te naa, hé kpɔ kwaa aa ɛ Koojen Siisa kwaa tɛo, dɛ́ kpɔ kwaa aa ɛ Korowii kwaa la tɛ Korowii.”

²² Baa no ɡɛ Yeesu aa bola la, ba nyoa kpoo, ba le o be dɛ kaa.

Seo ta ira wepɛɛre

²³ Awola tenten la, Saduki tena ba Yeesu be. Dɛ baa yarada kɛŋɔ nɛn sewaa, wɛɛ berɔɔ ir ja.

²⁴ Ba baa bɔɔ Yeesu ŋɔ, “Nomoa, Mosis fa ŋɔ dɛ baa sewɔ ɡel o haah ba ta bii dɔe yaa, a chɛ kɛŋɔ o nime kɛɛ o dɔɔ kpɔ haah la mo dɛ́ loɡle bii, ásɛ a ɡɛ bii la ɛ lale la bii.

²⁵ Asɛ baa bɛl ne o nimanar banumɛlee fa lole. Nomoa la mo haah dɛ ba sewɛ, dɛ o ne haah la ta bie lolɛ, anomanta, o nime waa teŋɛ o nɛɛ la kpɔ haah la mo.

²⁶ O ɡe ne haah la ta lolɛ, o sewɛ. Gɛɛ toorote la ne banɔ la baa kaa la mo haah la ka lɔ nyoa, dɛ ba serewe.

²⁷ A habɔɔ la, luhaah la ɡe baa sewɛ.

²⁸ Taraken nɔ, dɛ tɔpere nɛra baa sewa bwa aa dɛ ba ira nɔ telaa, baala banuanɛ la bini, umee dɛɛ ba haah la jaa ɛɛ yɔ? Ba bwa ɡee moo ka.”

²⁹ Anee Yeesu chaŋ ba ŋɔ, “He kono kwaraa! Haa wola Korowii Waa baa chwera ne o kpeɡri waa jemɛ la waa.

³⁰ Dɛ nɛra baa sewa la berɔ iraa, baala aa haahnaa mo, haahna ɡe aa yalɛ. Baa soo kɛŋɔ nyundua toroma ken.

³¹ Nɛra seo ta ira ɡe la nɔ, he ta ɡɛ Korowii aa bol he be la kure dɛ no a mun kɛɛ?

³² O ŋɔ, ‘Menee Korowii Abraham ne Aesek dɛ Jekɔb aa tomɔ la.’ Lala laa dɛɛ tomɛ Korowii, weeraa dɛɛ tomɔ.”

³³ Nɛnlaa la aa no ɡɛ waa nɔ la, ba nyoa kpo o webaɡla ta.

Korowii Mmarare la bini onjen

³⁴ Belaa Farisii tena la aa no ɡɛ Yeesu aa chaŋe Saduki tena la kɛrɛdɛ ba ta berɛ won dɔ waane dɛ́ bol kpa la, ba kaa cheme,

³⁵ asɛ ba bini Tɔnjereme bɛl pɛɛ Yeesu waane, dɛ́ kpɔ harɔ bel.

³⁶ O pɛɛro ŋɔ, “Nomoa, mmarare nɔ te bwa bini umee dena ɡwaa a bwa nɔ?”

³⁷ Yeesu chaŋɔ ŋɔ, “ ‘Hé nyin N Naa Korowii he bambile bwa, he hweera ne he liire bwa ne.’

³⁸ Onɔɔ ɡwaa a bwa dɛ tɔ a bwa sie.

³⁹ Onɔ la waa jaa dɛ teŋɛ nɛɛ o waa hiah la ɡee kɛŋɔ, ‘Nyin he dɔŋ kɛ he ɡbaɡba.’

⁴⁰ Gɛ mmarare anɛ nɔ binii Mosis Mmara la ne waa Korowii keamere la aa baɡla la bwa le.”

Kristo la wepɛɛre

⁴¹ Farisii tena la bane aa kaa pɛ so la, Yeesu pɛɛ ba ŋɔ,

⁴² “Ɛrɛɛ hɛɛ lii Kristo la Korowii aa baɡɛ nyoa ŋɔ wɛɛ tomɔɔ ó ba lɛ yaa laɔ? He dɛ lii kɛ ume naa yɔ?” Anee ba ŋɔ, “Devid naa.”

⁴³ Anee Yeesu berɛ pɛɛ ba ŋɔ, “Aah ɛrɛ waa Korowii Domadɛɛɡe la aa ir Devid nɛɛ la o berɛ yerɔ o dɔɔ nɔɔ? Devid fa ŋɔ,

⁴⁴ ‘N Naa Korowii ŋɔ n Dɔɔ be ŋɔ ó so nomombɔr o diɡ ta ka tel kɛŋɔ waa ba o dɔma ne harɛ ásɛ o tiɡri ba nɛ.’

⁴⁵ Dɛ Devid fa yerɔ o dɔɔ raa, ŋwɛnɛ besoo taa a che Kristo la berɛ ba ɛ Devid naa ɔ?”

⁴⁶ Nomɛlbwa ta wone chaŋe waa Yeesu aa pɛɛra la, anomanta, le awola tɔpere la dɛɛ kaa la, nomɛlbwa ta wone ba che o sie, dɛ pɛɛro waane kpa.