Matiu 21 - mzwDBL

Gɛ Yeesu aa jo Jerusalam jirima ne

¹ Yeesu ne o habɔteŋra la aa dɛ tel Jerusalam la, ba baa le Bɛtfej waa lɔ Ɔlevere Bwejen la bɔr. Belaa Yeesu tomɛ o habɔteŋra la bini banɛ,

² dɛ ŋɔ ba be ŋɔ, “Hé la bwɛɛ nɔ waa lɔ he sie nɔ ta. Haa den dɛɛ tel o ta la, hɛɛ nao kɛ baa vɔwɛ keeɡo bɛl ne o bie. Hé pura dɛ́ kpɔa ba tɛ mɛ.

³ Dɛ nomɛl bɔɔ heyaa waane aa, hé ŋɔ naate be ŋɔ he Dɔɔ dɛ nyina. Buɡ la ta, wɛɛ ɡeloo he pura, dɛ́ kpɔa ba.”

⁴ Gɛ waa nɔ chiɡo, asɛ dɛ ɡel waa Korowii keame fa aa bola la ɛ kasinteŋ. O bolɔ ŋɔ,

⁵ “Ŋɔ Saayɔn tena be ŋɔ bá nyiŋi na! Ba kooro dɛ ba ba be! O pwɛre. O soɡe keeɡo bie ta, keeɡo bale taa o so.”

⁶ Asɛ o habɔteŋra la la, dɛ ka ɛ ɡɛ waa tom ba la.

⁷ Ba ba keeɡo la ne o bie la ne, asɛ dɛ pa ba laala pa a nɛ. Yeesu soɡe o bie la nɛɛ baa kaa.

⁸ Nɛnlaa la ba ne Yeesu aa dɛ kaa la bane pa ba laala ne ba yale pa ŋwɛnɛ la ta, asɛ bane ɡe kɛ papooni ba pa ŋwɛnɛ la ta.

⁹ Nɛra baa tɔ o sie la ne banɔ la baa teŋɛ o nɛɛ la bwa pɛ nyoa dɛɛ tɛo jirima ŋɔ, “Woowo! Devid Naa nɔ! Korowii swee naate waa valɛ o sɔn ta dɛɛ ba nɔ andɛɛɡa. Ya dɛ jam Korowii waa lɔ nyundujaɡla la!”

¹⁰ Yeesu aa jo Jerusalam la, bwɛjen la bwa lɔɔ kpu, asɛ ba bwa ɛɛ pɛɛ dɔŋa ŋɔ, “Nɛn besoo nɔɔ?”

¹¹ Anee nɛnlaa la ŋɔ, “Korowii keamee. Yeesu waa le Nasarɛt waa lɔ Galilia harɛ ta laanee.”

Yeesu la Korowii Dea

¹² Yeesu kaa tel Korowii Dea bobɛl, asɛ dɛ doŋi kon-yoɡra ne nɛra baa dɛ yawɛ kwaa la bwa, dɛ beɡre nɛra baa dɛ peɡri suuɡare la ne banɔ la baa dɛ yoɡ borɔnomare la teeburre piiɡi,

¹³ dɛ ŋɔ ba be ŋɔ, “Ba chwerɔ do Korowii Tɔn la bini ŋɔ, ‘Baa yerɛ n Dea Korowii soŋebɔree,’ ɡɛɛ he te kpɔ bela berɛ ŋwɛɛra sɔɔhbɔr aa?”

¹⁴ Ba kpɔ nyoŋa ne boobie ba o be Korowii Dea bela, asɛ o chaah ba, nyoŋa la ɛɛ na, boobie la ɡe won vala.

¹⁵ Sɔfonomonome ne Tɔnjerema la aa na wejena waa dɛ ɛ la ne ɡɛ bechale la aa dɛ si ŋɔ, “Woowo! Devid Naa hen” la, ba baah di o nɛ.

¹⁶ Anomanta, ba pɛɛ Yeesu ŋɔ, “He dɛ no ɡɛ bechale nɔ aa dɛ si nɔ kenɛ?” Anee Yeesu ŋɔ, “Ɔɔh, n dɛ no. He ta Korowii Tɔn la bela baa chwera ŋɔ, ‘Bechale ne bechasɔɔhne nyoaa he kpɔ he kpɛɛra do’ la kure ka kɛɛ?”

¹⁷ Yeesu ɡel ba bwɛjen la ta, dɛ kaa Bɛtani ka chɔ.

Yeesu taah fiɡ daa bɛl

¹⁸ Tɔɔ aa pera chɔɔ, Yeesu le Bɛtani dɛ berɛ baa kaa bwɛjen Jerusalam la, dɛ lɔr dɛ kpoo.

¹⁹ O na fiɡ daa bɛl cheɡa ŋwɛnɛ la nyoa dɛ fee la kɛ ó ka nyin o nɔna di. Waa laŋa la, dɛ papooni ɡboo o bwa. Anee o taah daa la ŋɔ, “He te aa wola ba he ba nɔnɛ kpa bwa!” Buɡ la ta, dɛ daa la denɔ sewɛ dɛ chure.

²⁰ O habɔteŋra la aa na ɡɛ la, ba nyoa kpoo, baa pɛɛ dɔŋa ŋɔ, “Ɛrɛɛ fiɡ daa nɔ den chure warane ken?”

²¹ Anee Yeesu ŋɔ ba be ŋɔ, “Kasinteŋ, dɛ he dɔ yarada, haa tɔŋla di he bambile bini naa, hɛɛ wonoo ɛ ɡɛ maa ɛa dɛ ɡel daa nɔ sewɛ nɔ. A ɡbo laa. Hɛɛ wonoo kpɔ yarada ŋɔ bwé nɔ chuɡri ka le mpo ta, ásɛ o chuɡri ka le mpo ta.

²² Dɛ he kpɔ yarada dɛɛ soŋe Korowii aa, komɛlbwa haa soŋo la, hɛɛ dɔɔ.”

Kpeɡri Yeesu aa dɔa dɛɛ ɛ wa

²³ Yeesu berɔ la Korowii Dea, dɛ kaa chaɡle nɛra Korowii Wa. Asɛ Sɔfonomonome ne bwɛɛ la nomonome ba bɔɔro ŋɔ, “Umee tɛɛ ŋwɛnɛ ŋɔ hé ɛ ɡɛ waa nɔ haa dɛ ɛ nɔɔ? Umee tɛɛ kpeɡri kwaraa te nɔ?”

²⁴ Anee Yeesu ŋɔ, “N ɡba dɔ waane mɛɛ nyin n pɛɛ heya. Dɛ he wono chaŋ mɛ kɛrɛdɛ naa, n ɡee chaɡle heyaa kpeɡri maa dɔa dɛɛ ɛ a ɡɛ waa nɔɔ.

²⁵ Umee tɛ Jɔn o fa aa dɛ sɔ nɛra Korowii nee la kpeɡri o kpɔ dɛɛ sɔ nɛra nee laɔ? Korowiirii tɛo waa, kɛ nɛnee tɛɔ?” Ate, dɛ ba ɡboɡbo berɔ kpoŋe dɔŋa dɛ ŋɔ, “Aah ɛrɛɛ yaa ba o chaŋa ɔ? Ya ŋɔ Korowiirii tɛo waa, wɛɛ berɔɔ pɛɛ yaa ɡɛ aa ɛa yaa wola o waa yaradae.

²⁶ Dɛ ya berɔ ŋɔ nɛnee tɛo waa, ya dɛ ɔmɛ waa bwɛɛla nɔ aa kpɔ ɛ yaa, dɛkalkɛ ba bwa dɛ yarada kɛŋɔ Jɔn ɛ Korowii keame.”

²⁷ Anomanta, ba ŋɔ Yeesu be ŋɔ, “Yaa jemɛ.” Anee Yeesu ŋɔ ba be ŋɔ, “Dɛ haa jemɛ te naa, n ɡe aa heyaa kpeɡri maa dɔa dɛɛ ɛ ɡɛ toma nɔɔ baɡle.”

Bibaala banɛ bane sɛɡla

²⁸ Yeesu berɔ ŋɔ, “Hé no waa nɔ, dɛ́ baɡle ɡɛ haa naa. Baa bɛlee ira dɛ dɔ bibaala banɛ. Awola bɛl, o la o binomoa la be dɛ ka ŋɔ, ‘N bie, fini la n koo la ta ka ɛ toma.’ Anee o bie la ŋɔ,

²⁹ ‘Maa la,’ asɛ a habɔɔ la, o berɛ charɛ o liire dɛ ka ɛ toma koo la ta.

³⁰ Asɛ baa la berɛ la o bie bechala la ɡe be, dɛ ka ŋɔ o be ɡɛ waa bol o dɔɔ la be la. O te den sɛh ŋɔ, ‘Yoo, mɛɛ lao,’ dɛ berɛ vɛh laŋa.

³¹ Nɛra banɛ nɔ, ba bini umee ɛ o mɛɛ tetoowaa tɛo wɔ?” Anee ba ŋɔ, “O binomoa laanee.” Belaa Yeesu ŋɔ ba be ŋɔ, “Kasinteŋ, toɔ lɛɛra baa dɛ bɔ nɛra apoo ne jwamane tena bwa ɛɛ tɔ siee dɔ Korowii Kora la ta jo ɡel heya,

³² dɛkalkɛ Jɔn o fa aa dɛ sɔ nɛra Korowii nee la ba he be dɛ ba chaɡle heyaa ŋwɛnɛdɛɛɡe la ŋɔ hé kpɔ o ta, asɛ he vɛh o waa la yaradae. Kɛ toɔ lɛɛra ne jwamane tenaa bera yarada o waa la. Hale haa bera na ɡɛ la, he ta he liire charɛ dɛ berɛ ba yaradao.”

Nɛra baa dɛ daah koo sɛɡla

³³ A habɔɔ la, Yeesu berɔ ŋɔ, “Hé no sɛɡla nɔ ɡe. Baa bɛlee fa lole dɛɛ parɛ kwaane baa kpɔa dɛɛ daa sen. O ke a ɡɛ koo la, dɛ kwaa bɔr baa dɛɛ harame a nee dɛɛ do, dɛ chiɡri jɛŋla bela bá so o ta dɛɛ daah koo la, a koma telaa, ba dɔ ba bɔr. A habɔɔ la, o kpɔ koo la tɛɛ ba bá nyiŋi o ta tɛo, dɛ kaa harɛ bɛl ta.

³⁴ Nɔna la koma aa tela la, o tomɛ o bonɔɔna ŋɔ bá la nɛra la aa dɛ nyiŋi koo la ta la be, dɛ́ ka lɛ o dibɔr ba tɛo.

³⁵ Anee nɛra la lawɛ bonɔɔna la, dɛ lɔɔ bɛl, dɛ kpo bɛl, asɛ dɛ foɡre bɛl ɡe bwea.

³⁶ Baa la berɔ kwaa tomɛ bonɔɔna la banfala ba warɛ ɡwaa banɔ la baa tɔ sie la, asɛ nɛra la berɛ ɛ ba ɡe ɡɛ tenten baa ɛ banɔ la la.

³⁷ Name te dɛ o ɡbaɡba biee kaa ó tomɛ. Asɛ o tomɛ o bie la ɡe dɛ ŋɔ, ‘N ɡbaɡba bie nɔ te, baa heeh o siebɔree.’

³⁸ Nɛra la aa dena na o bie la, ba den ŋɔ, ‘Yoowa, koo te la ɡbaɡba biee la. Hé ɡel ya lawɔ dɛ́ kpoo, ásɛ o mɛɛ kapɛrɛ la bwa berɛ ya kwa.’

³⁹ Anomanta, ba lawɔ dɛ le o ne koo la ta dɛ ka kpoo ta.”

⁴⁰ Asɛ Yeesu pɛɛ ba ŋɔ, “Dɛ koo te la kaa ba naa, ɛrɛɛ wɛɛ ba a ɡɛ nɛra la baa dɛ nyiŋi koo la ta la ɛɛ yɔ?”

⁴¹ Anee ba chaŋo ŋɔ, “O balaa, wɛɛ ba kpoo nɛnchɔɡa la bwaa, dɛ́ kpɔ koo la tɛ nɛnfala, banɔ la dɛ ba komɛ daa nɔna la aa, baa dɛ ba on o dibɔr tɛɛ.”

⁴² Yeesu pɛɛ ba ŋɔ, “Hé ta waa nɔ Korowii Tɔn la bini nae kaa? Ba chwerɔ ŋɔ, ‘Bwe la mamaala aa vɛoh dɛ liiru konsala laanee bera ba lawɛ dea la kpoŋe la. Korowiirii ɡela a ɛ ɡɛ, asɛ a ɛ yaa nyokpowa.’

⁴³ Anomanta, n dɛ ŋɔ he be ŋɔ, Korowii ɛɛ lɛ o kora laanee le he be, dɛ́ kpɔ ka tɛ banɔ la baa dɛ ba wona nyiŋi o ta kɛrɛdɛ la.

⁴⁴ Nomɛlbwa waa chole Bwe la waa lawɛ dea la kpoŋe la ta la, wɛɛ kuuɡuu. O berɔ le ba le nomɛlbwa nɛɛ ɡe aa, wɛɛ pweremoo.”

⁴⁵ Sɔfonomonome la ne Farisii tena la aa no ɡɛ waa nɔ la, ba jemɔ kɛ ba waa Yeesu ɛɛ bol la.

⁴⁶ Anomanta, dɛ ba fe dɛ nyin o lawa. Kɛ ba berɔ ɔmɛ nɛnlaa la, dɛkalkɛ dɛ ba te dɛ yerɛ Yeesu Korowii keame.